Ôi 22/4, Kruanh dak Lương Cường n’hanh Mpôl đại biểu Quốc hội Nkual ƀon têh Hồ Chí Minh mâp nuĭh ƀon lan ta nkuăl Cu Chi n’hanh Hóc Môn gay djôt dơn, djăt nău rgop ƀon lan bah năp Rơh rƀŭn tal 9, Quốc hội khóa 15. Ntoh ngơi ta rơh mâp ƀon lan, Kruanh dak Lương Cường uănh lah prêh ăp nău rgop jru hvi, geh nău ndâk njêng, mpơl nău đah nău kan, nuih n’hâm đah nău hun hao uĕh lăng n’hanh hôm e rêh jêng bah neh dak.

Ăp nău rgop nkoch nău rhơn ta năp ăp trong mkra mhe geh nău cách mạng bah Trung ương; nău lăp têh dăng, tâm ban bah lĕ trong chính trị, nsum mpôl doanh nghiệp n’hanh ăp rơh kơn nuĭh ƀon lan, rgop geh âk săk rnglăy khlay ta ăp ntil nău wăng sa, rêh jêng, mât njrăng bri dak, rnă njrăng ta nkual. Nkre, ăp ƀon lan dăn đă âk nău hôm e jêr bah nău ngăn geh tât nău rêh nuĭh ƀon lan an dôh rklaih, mkra.

Ôi ndrel nar, ta Ntŭk têl ơm yau kăl e ngih dak Ngã Ba Giồng (xă Xuân Thới Thượng, nkuăl Hóc Môn), Kruanh dak Lương Cường lĕ tât an nkao, mpoh su nhang n’hanha du mnĭt kuh mbah nkah gĭt jru hvi, nkah gĭt n’hâm soan têh bah Kruanh Hồ Chí Minh n’hanh nkah gĭt ăp đồng chí tă ƀư kruanh Trung ương Đảng, ăp gưl Cách mạng hăn lor, ăp tahen janh dăng, ƀon lan lĕ roh yor đăp mpăn, dah rŏng bah rnoi nuĭh, yor uĕh lăng bah Nuĭh ƀon lan.