Bah rnôk aơ 60 năm, lơ 15/4/10965, N’gâng kan rđau Công an ƀon lan (rnôk aơ lah N’gâng kan rđau tahen Biên phòng) hŏ rgum âk cán bôk blau nau kan ntơm bah ăp n’gor mpeh ba lơ kơl an ân Gia Lai. Tât khay 7 ndrel năm, rmôt mât đăp mpăn Gia Lai geh ƀư tâm 3 gưl, ntrŭnh tam ăp nau kan kơt lơh, rdâng phung tih, mât kơl an ƀon lan, nsĭt n’gâng kan ƀư tơm. Tâm lôch 10 năm lor a rklaih miền Nam, rmôt aơ hŏ râng ma rhiăng nau tâm lơh têh jê̆, nkhĭt ndrel ƀư rmanh ma rhiăng phung rlăng, rgop nau ndrel tahen lam dak đăp mpăn neh dak.

  Jêh năm 1975, rmôt tahen Biên phòng n’gor Gia Lai lŏ n’hao nau mât nkuăl n’har bri neh dak, ngăn lah rgop tâm nau lơh rdâng phung Khmer Đỏ. Nar aơ, rmôt tahen Biên phòng n’gor dôl mât rlau 80 km trong tâm dăch ma n’gor Rattanakiri, dak Campuchia, tâm nkuăl geh 7 xã tâm 3 nkuăl n’har bri. Tâm nau jêr, cán bộ, tahen Biên phòng n’gor Gia Lai hôm ƀư jêh nau kan ‘bar ntil”: Nkre mât đăp mpăn n’har bri, nkre nsôih râng hun hao văng sa, rêh jêng tâm nkuăl.

Bah âk nau kan kot ‘Kơl an kon se hăn nti” ‘Ngih gŭ ân nŭih ach o nkuăl n’har bri” “Ndrôk ntil kơl ân rnăk ach o”... rmôt Biên phòng hŏ rgop nau kơl an nau rêh ân kônh wa, ndâk nkual n’har bri nâp dăng, ƀư nâp nau rnơm đah tahen ndrel ƀon lan nkuăl n’har bri.

Di rnôk aơ, N’gâng kan rđau tahen Biên phòng n’gor Gia Lai geh ndơn Huân chương mât neh dak hạng Nhì bah Kruanh dak pă ân yor ăp nau rgop têh tâm nau mât n’gâng kan, đăp mpăn n’har bri. Kruanh UBND n’gor pă Bằng khen ân 6 rmôt ndrel 9 nŭih geh nau rgop ngăn tâm nau kan biên phòng. Thượng tá Ngôn Ngọc Cương, Kruanh Đồn Biên phòng Ia Púch, nkuăl Chư Prông, ngoai tâm ăp nŭih geh pă Bằng khen, nkoch:

‘Săk gâp nơm rhơn ngăn rnôk geh UBND pă bằng khen di rnôk nkah 60 năm. Rơh tât gâp mra ndrel ma rmôt kan, gưl uỷ, Đảng uỷ Rnâng kan rđau kan Đồn rgum rđau, đă rmôt kan ƀư jêh ueh nau kan mât nau ƀư tơm bah nau rnă njrăng nkuăl n’har bri bah neh dak. Nsôih ngăn nau rgum rđau, đă cán bộ tahen n’hao ăp nau kan  mêt uănh nkuăl n’har bri. Nkoch trêng bonh đă ƀon lan ƀư tĭng nau ntrŭnh ntrong kan bah Đảng, pháp luật bah Ngih dak’.

Ntoh nau tâm nar rƀŭn, Thiếu tướng Nguyễn Đức Mạnh, Groi rđau tahen Biên phòng rnê ndrel rhơn ăp anu rgop, nau dơi ma ăp gưl cán bộ, tahen Biên phòng n’gor Gia Lai tă geh dơi tâm 60 năm ndâk njêng, tâm lơh ndrel têh jêng. Wa lah rjăp, bah ăp rơh, rmôt tahen Biên phòng n’gor mro geh ƀư nâp mpeh ntŭk kan, ndâk rmôt kan, trạm nâp, n’hao nau dơi ân rmôt cán bộ gay tŏng dơi nau đă nau kan tâm rơh mhe.

Tâm nar pah kan, wa Hồ Văn Niên, Uỷ viên Trung ương Đảng, Bí thư n’gor uỷ Gia Lai ntoh nau kơp dơn ndrel rnê prêh nau kan bah rmôt tahen Biên phòng tâm nau tâm lơh ndrel ndâk njêng, mât nkual n’har bri Tây Nguyên. Lah rjăp, tahen Biên phòng n’gor Gia Lai ƀư ueh nau dơi n’gâng tơm tâm nau mât nau dơi, mât rnă njrăng n’har bri, rgop nau hun hao văng sa, rêh jêng tâm ăp nkuăl jru, nkuăl ngai.

Bí thư n’gor uỷ Gia Lai đă tâm rơh tât, Đảng uỷ, N’gâng kan rđau tahen Biên phòng n’gor lŏ tâm rgop rjăp đah ăp ntŭk kan, n’gâng kan bah n’gor ndrel rmôt tâm nkuăl n’har bri Campuchia ntrŭnh ƀư ăp nau kan ndâk ntrong n’har bri đăp mpăn, tâm boh nâp, tâm boh hun hao nâp nâl; n’hao nau kan nkoch mbơh, ntĭm đă, n’hao nau gĭt bah cán bộ, đảng viên ndrel nŭih mât nau ƀư tơm n’har bri ndrel ntŭk kan, nau kan khlay bah rmôt tahen Biên phòng tâm rơh tât./.