Nuĭh Jrai way kuăl lah ba phe lah yor brah an kon nuĭh. Brah lah nuĭh yang têh, kuăng ngăn, mô saơ săk, geh ta ăp ntŭk. Nuĭh Jarai rnôk ba mir mô rek, mprah ma kăch đah ty. Yor khân pơng lah nău rek ba, mprah ba ƀư ji tơm ba, jêng lah ƀư brah ji yang ji. Yuh H’Uyên Niê, Groi Kruanh rmôt bu ur xă Ia Mơ Nông, nkuăl Chư Păh, n’gor Gia Lai, an gĭt:

Tĭng nău way bah nuĭh Jrai bu ur an gĭt peh ba, hăn joi long, bâk dak n’hanh cheh tanh. An geh tŏng nkô̆ nău nĕ ri nuĭh kon bu ur mư sŏk sai. Bu ur ƀư piăng trau hôm bu klô lah nuĭh mbak anh ăp nău kan jâk mbăn êng.

Gay geh phe, tâm rnôk nuĭh Yoăn dŏng âk ndơ, kơt: mpăl kĭn, mpăl peh, r’i, dông, nĭr ri đah nuĭh Jrai knŭng geh mpăl, rnăi n’hanh dông khŭm lah tŏng. Aơ lah ăp ndơ dŏng bên, hăn ndrel lôch săk đah nuĭh bu ur. Ri lah yor ndrĭ ma rnôk nuĭh kon bu ur Jrai sŏk sai, hăn gŭ êng, mpăl rnăi geh tâm ndrăp ndơ an tâm rnăk wâl dơi djôt pă an bu ur. Yuh Rơ Châm H’Xuyết an gĭt:

Peh ba ri geh bah kăl e hôm, knŭng bu ur dơm têh jêt moh nău an gĭt peh ba. Gâm ŭch peh ba geh rnăi, mpăl. Kon bu ur an geh mpang ty blău. Peh ba dŏng mpăl têh, rnăi jêt tĭng rnăk wâl khân pơng ƀư.

Mpăl peh ba dơi ƀư bah si têh, kuar jru. Rnăi lah si sŏng, du gâl tâm di mpang ty djôt, du bôk têh lơn hôm bôk rnăi jêt lơn. Ŭch peh ngăch, bu peh 2 hê, jêng lah geh 2 nuĭh peh ndrel, tâm rgop đah nău rbân lêr ên. Yuh Siu Thỏi ta xă Ia Mơ Nông, nkuăl Chư Păh, n’gor Gia Lai, an gĭt:

Peh an ngăch ri 2 hê peh. Mpăl an săch ăp tơm si dăng, nâp, rnăi ndrĭ đŏng. Peh 10kg ba roh nklăp 2 mông. Bu ur gĭt peh phe yơn mô gĭt khŭm yor mô blău ty kơt bu ur.

Rnôk peh ba, nuĭh Jrai an ba tâm mpăl, sŏk chông rnăi jêt an kloh lư̆k kranh, jêh nĕ plơ̆ tơm rnăi gay khoh phe gay bok phe. Bu nkra rnăi m’hâm ƀư an jŭr di rnôk, tŏng dăng gay luh lư̆k ma mô ƀư hăch phe, phe mbra bok. Yuh Rơ Chăm Hà ta xă Ia Mô Nông, nkuăl Chư Păh, n’gor Gia Lai, an gĭt:

Gưl bôk năp peh ba gay luh lư̆k kranh, gưl tal 2 khŭm ba luh lư̆k, tal 3 khoh tay an jêng phe bok gay sa. Way ri geh 2 nuĭh peh an ngăch luh phe. Du hê du mlâm rnăi, tĭng tâm soan bah ăp nuĭh. Nuĭh ranh rnăi jêt hôm mom dŏng rnăi têh lơn. Du tơ̆ peh way an tâm mpăl nklăp 3-4 kg ba.

Jêh ăp rut rnăi peh ba, mpang ty blău bah bu ur lŏ đah nău kan khŭm nsiăng. Khân pơng dŏng ndơ rsang khŭm ma dŏng dông gay khŭm phe. Yuh Rơ Châm H’Xuyến ta xă Ia Mơ Nông, nkuăl Chư Pă, n’gor Gia Lai, an gĭt:

Bu ur dâk bah 4h ôi peh ba. Jêh peh khŭm n’hanh khoh tay du tơ̆. Rơh 2 aơ peh mư luh phe, khŭm nsiăng ƀư 2 tơ̆.

Nar aơ, măy mŏk lĕ rdơn, ntrok soan pah kan kon nuĭh. Yơn lah, tâm yan lễ hôị, mô lah rnôk wơt năch pâl nđaih, ăp ƀon lan lŏ n’gŭr răm nteh rnăi mpăl peh ba rnôk mbrơi mbrơi, rnôk ndôt ndal ndrel đah nteh chĭng n’gôr răm. Ăp nău nteh aơ lĕ jêng du ntŭk ntô uĕh lăng khuh mpưm Tây Nguyên.