Nkhêp nkah ndray 50 năm Nar rklaih luh miền Nam, dơn ngoăy neh dak, ôi 20/4, Tổng Bí thư Tô Lâm ƀư tơm rơh mâp măt kruanh rđău kan Đảng, Ngih dak đah cán bộ kruanh rđău kan cách mạng ơm, nuĭh geh n’hâm suan, rnăk dơi kơl ntoh lư nkual miền Nam. Ta rơh mâp măt, ăp đại biểu lah Tahen ƀon lan dăng janh, tahen ơm, druh ndăm xung phong ơm hŏ nkoch âk nău nkah rngot rhơn kăl e mpeh rơh tâm lơh mbro mbrăng, mpơl nuih n’hâm rôih dăng, nuih n’hâm mô plơ̆ rŭch đah n’gâng kan cách mạng bah Đảng, bah rnoi nuĭh.

Ăp đại biểu mpơl nău nsing nơm n’hanh ŭch rŏng rgop n’hâm suan, bôk rngok nău gĭt blău tâm n’gâng kan rdâk njêng, mât njrăng neh dak tâm rơh hun hao mhe. Lah ta rơh mâp măt, Tổng Bí thư Tô Lâm lah rjăp lịch sử cách mạng Việt Nam nchih nkah mbro n’hâm suan têh kuâng bah ăp nuĭh tă tâm lơh ta ăp ntŭk tâm lơh. Tổng Bí thư mbơh gĭt tât ăp nuĭh ntơh măt mpeh ăp trong nchrăp têh mbra dơi an ƀư tâm let năp tay, rgum tâm pe nău dơn kan têh jong: mât nâp ntŭk gŭ rêh đăp mpăn, bah tâm lơh tâm su; hun hao wăng  sa- rêh jêng kon nuĭh ngăch, nâp dăng: n’hao săk geh nău rêh ƀon  lan, lơn lah nuĭh ach o, nuĭh mô geh nău lap, đăp mpăn mô an geh nuĭh ntlơi êng bah kơi.