Nkuâl Dak Mil geh rnoh neh tăm tơm công nghiệp dŭt dĭ hvi n’gor Dak Nông. Aơ lah ngoăy tâm 3 nkuâl mpeh bah lơ n’gor Dak Nông, geh tât khuch dŭt hô bah nô nău mô tŏng dak tŏ lam hvi.

Rnăk wa Nguyễn Công Ngãi ta xã Đắk Lao, nkuâl Dak Mil geh rlău 2 ha cà phê tăm rlŭ sầu riêng. Păng an gĭt, rnăk tŏ rơh 2 mô hŏ lôch jêh ri tơm dak ta n’glău 40 (thôn Đắk Thọ) hŏ suăt kroh.

“Năm aơ dak rhuăt ngăch ngăn, ƀon lan mpôl hên mô năn rdâng lơh. Aƀaơ ăp nar geh bar pe jât máy bơm kâp dak wăch meng n’glău 40, hôm tơm dak wăch sĭt tât n’glău lơn âk nsing tâm máy bơm bah Công ty thủy lợi Dak Nông. Lah khân păng bơm dak sĭt ta n’glău mbro ri tŏng nklăp 1/5 nău ŭch geh dak tŏ bah kônh wa dơm”.

Tĭng UBND nkuâk Dak Mil, duh phang ƀư bơi 5.000 ha tơm tăm ta nkuâl geh ma nău mô tŏng dak tŏ. Bah meng nê, bơi 300 rnăk geh ma nău mô tŏng dak dŏng kêng dŭt khay wai kro phang.

Ta nkuâl Krông Nô, du đêt nkual njok dak Dak Sôr dôl mô tŏng dak tŏ. Lah trôk nar mô mih, geh ma nău duh phang mbra geh nklăp 1.000 ha tơm tăm.

Tĭng wa Võ Văn Minh, Groi Giám đốc Sở Nông nghiệp n’hanh Môi trường Dak Nông, nô nău duh phang hŏ ntơm khuch hô tât hang rbăn ha tơm tăm, lơn âk lah cà phê, tiêu n’hanh tơm sa play. Ntơm bah n’gul khay 3, n’gâng kan dơi kan hŏ mpêt nkrem dak ta du đêt ntŭk gay rdâng lơh đah duh phang. Na nê̆, dak rhôp bah n’glău hồ Tây n’hanh du đêt n’glău kiău ma ta nkuâl Dak Mil gay ntop an nkual duh phang mpeh ăp nkuâl Dak Mil n’hanh Krông Nô.

UBND n’gor Dak Nông hŏ geh siƀŭt rđău n’gâng kan tuch tăm mât rong n’hanh UBND ăp nkuâl, nkual ƀon têh, công ty mât dŏng ăp dak bât way hăn ôp uănh, groi nđôi nô nău duh phang n’hanh tĭng ƀư ăp trong nkra rdâng lơh đah duh phang. N’gor rđău đă ntrôl ngăch an ƀư 2 trong nchrăp kan n’hao nău dơi tam dŏng dak ta nkuâl Cư Jút n’hanh nkuâl Dak Mil (đah lĕ rngôch rnoh prăk dŏng ƀư rlău 500 rmen prăk) gay đăp mpăn ăp dak bât n’glăp dŏng di rnoh ngăch, năn tŏng geh  tơm dak dŏng an nău  kan tuch tăm, rêh jêng bah nuĭh ƀon lan.

(Hưng Thịnh – TTXVN)