Nô Y Quân Hđơk, rnoi Rđe tâm ƀon Alê A, Phường Ea Tam, nkuăl ƀon têh Buôn Ma Thuột, n’gor Dak Lak mhe geh rnglăp Đảng tâm khay 1 năm 2025. Nô Y Quân nkoch, saơ ăp đảng viên tâm ƀon lan nŭih leo trong, geh nau rnơm, ân kônh wa kơt tĭng ri ma nô nsôih ân geh lăp đảng viên. Ndrel ma nau kan ƀư ueh nau dơi bah nŭih kan tâm Rmôt njroh mprơ bah rnoi mpôl Dak Lak, nô Y Quân hôm nsôih râng nau kan tâm nkuăl. Nô ndrel druh ndăm tâm ƀon ƀa ƀơ ƀư ăp nar rƀŭn nkoch nau ơm, njroh mprơ, bonh đă ƀon lan mât nâp nau ueh ơm bah rnoi nơm. Nô Y Quân nkoch:

‘Săk gâp nơm mro geh nau ntŏ n’hao rnôk geh nglăp tâm Đảng Cộng sản Việt Nam. Gâp mra nsôih ntĭm nti, nchiăr săk gay ân geh dơi lah nŭih đảng viên nâp”.

Wa Lê Văn Nhuần, Bí thư Chi bộ Buôn Alê A, Phường Ea Tam, nkuăl ƀon têh Buôn Ma Thuột, n’gor Dak Lak mbơh: Nau hun hao đảng lah nau kan chính trị geh nkuăl leo trong lor. Yor tâm nkuăl geh rlau 90% lah rnoi Rđe, âk kônh wa hăn pah kan ngai ri ma nŭih ân geh lăp Đảng mâp nau jêr ngăn. Ndri ma, năm 2024 Chi bộ hôm dơi rnglăp geh 2 đảng viên mhe. Wa Lê Văn Nhuần mbơh, lam chi bộ geh 76 đảng viên, ƀư ueh nau kan bah nơm, ngăn lah nkoch trêng, bonh đă kônh wa tâm nau hun hao văng sa, rêh jêng, đăp mpăn neh dak ndrel ndâk ntrong kan chính trị tâm dâng:

“N’ăp ma đảng viên dôl rƀŭn tâm chi bộ ta aơ, mô lah đảng viên rƀŭn tâm ntŭk gŭ kŏ geh râng ueh ăp nau kan tâm rlong bah nkuăl. Ngăn lah ăp đồng chí đảng viên tâm ntŭk gŭ rgop âk ngăn n’ăp ma drăp ndơ, nuih n’hâm ndrel nau rgop gay ndâk nkuăl. Ndri ma nkuăl hên ăp năm kŏ geh n’gâng kan ba lơ rnê ueh, ngăn lah nau kan tâm ƀon lan”.

Đah ăp nkuăl geh âk nŭih rnoi mpôl đê̆ rêh, nau saơ, ntĭm, ân rnglăp đảng mô êng lah săch nŭih ntoh lư, ma hôm lah nau ntĭm nti, n’hao nau blau nâp chính trị ndrel ndâk nau dơi bah nsum mpôl. Ngăn lah tâm xã Yang Tao, nkuăl Lăk, n’gor Dak Lak, ntŭk geh 95% rnoi mpôl đê̆, yơn đah nau nsôih ‘ndâk, hun hao chi bộ nâp nâl” ăp ntŭk kan bah đảng hŏ ndâk nau nchrăp, mbơh nau ntrŭnh mpeh nau dơi ân geh lăp bah đảng viên ăp năm. Ndrel ma nê, ăp đảng viên tâm ăp chi bộ, nsôih leo trong, njêng nau ntul rlong jêng nau hun hao văng sa, rêh jêng tâm nkuăl. Wa Y Wu Sruk, Groi Kruanh UBND xã Yang Tao, nkuăl Lăk, mbơh:

‘Nơm ân gĭt nau vay tâm ntŭk aơ, ngăn lah tâm nau dŏng nau ngơi tâm rnôk nơm mbơh nkoch nau ma kônh wa. Jêh nê nơm ân gĭt nau vay tâm nau rêh ăp nar bah kônh wa, nơm ân gĭt n’ăp ma nau jêr bah kônh wa đŏng. Tâm nau nê ri nơm ân geh dŏng, leo ăp nau ntrŭnh ntrong kan bah Đảng, pháp luật bah Ngih dak tât ma kônh wa gay kônh wa nơm gĭt dơi ndrel ndăn tâm nau rêh jêng”.

Ndơn saơ nau khlay bah nau rnglăp đảng bah nau kan hun hao đảng viên, rđau kan n’gâng kan Dak Lak hŏ ndrel dôl ƀư âk nau kan gay pơk trong nơih ân ăp đảng viên, ngăn lah ăp đảng viên rnoi mpôl đê̆ râng lăp đảng. Ndrel ma nê lah nau kơl an mpeh ntĭm nti, mbơh nkoch lý luận, pơk trong nơih ân nar rƀŭn đảng tâm nkuăl jru, nkual ngai, hŏ rgop nau n’hao nau tam tâm nau mât ndrel rđau đă bah n’gâng kan. Wa Lê Nam Cao, Groi Kruanh Rnâng kan ƀư kan cán bộ n’gor Dak Lak, mbơh:

‘Gưl uỷ ăp gưl uănh ngăn tât nau joi săch nŭih lah oh kon rnoi mpôl đê̆ gay ma njoăl lăp tâm ăp ngih săm ƀŭt Phổ thông Dân tộc nội trú gưl nkuăl ndrel gưl n’gor. Tal 2 lah ƀư nau ntrŭnh săch lăp nti đah kon nŭih rnoi mpôl đê̆ mra geh săch ndrel pă ƀư nau kan. Ntơm bah nau pă đă ƀư aơ lah ntŭk gay ma nơm ân geh nŭih khlay dơi geh rgum ƀư nau kan bah rđau mât ăp gưl”.

Đah nau dơi mpeh văng sa, nau geh bah ƀon lan tâm Dak Lak, nau n’hao hun hao đảng viên tâm nkuăl rnoi mpôl đê̆ mô êng lah nau khlay chính trị ma hôm rgop nau âk tâm nau ntrŭt dăng nau rgâl tâm ăp nau geh jêng bah nkuăl. Ăp đảng viên lah rnoi mpôl đê̆ dôl lah ntung njŏ ngăn gay leo nau ntrŭnh, ntrong kan bah đảng tât ma ƀon lan, dăp rgum tay nau rnơm bah ƀon lan đah Đảng, lah nau nthoi nâp tâm nau tâm rnglăp ăp rnoi, ndâk nau rêh ueh, kơl an kônh wa hun hao văng sa, rgop nau ueh tâm nau ƀư dơi nkô̆ nau mpeh hun hao văng sa, rêh jêng n’hao nau dơi rđau đă, n’hâm tâm lơh, ndâk ntŭk kan đảng, ntrong kan chính trị nar lơn ma kloh, nâp nâl./.