Tĭng Đề án ntlơi jăng jay truh sat, nkưp nde bah Chính phủ, n’gor Dak Lak mbra ntop kơl ƀư jay an 4.285 rnăk, đah lĕ rngôch prăk dŏng ƀư 343 rmen prăk. Rlău ma nê, n’gor Dak Lak mbra ntop kơl nkra an rlău 1.120 rnăk. Đề án tă bah Công an n’gor Dak Lak ƀư tơm, kan nsum n’gâng kan ăp nkuâl ƀư bah bôk khay 3 n’hanh lôch jêh tâm n’gul khay 8/2025. Lôch rlău 2 pơh an ƀư Đề án ntlơi jăng jay truh sat, nkưp nde n’gor Dak Lak hŏ rdâk ƀư rlău 1.000 mblâm jay, nchrăp ƀư lôch  jêh tâm khay puăn tât.

Ăp jay hôm ƀa ƀă mbra dơi ƀư ngăch n’hanh lôch jêh bah năp nar 15/8/2025. Krông Bông lah ngoăy tâm  ăp nkuâl jru ngai n’gor Dak Lak. Rơh dja nkuâl geh 513 rnăk jêr jŏt mpeh jay gŭ dơi ntop kơl mon mhe, đah lĕ rngôch rnoh prăk dŏng ƀư 41 rmen prăk; n’hanh 96 rnăk êng ƀa ƀă dơi ntop kơl 2,88 rmen prăk gay nkra.