Dŭt năm e, Bộ Chính trị ntrŭnh nau mrô 57 mpeh nau rgâl mhe hun hao khoa học, công nghệ, ntrơn rgâl nau blau mhe ndrel ntrơn rgâl mrô neh dak. Jêh nê, ta Ngih rƀŭn Diên Hồng geh rơh rƀŭn lam dak ntrŭnh nau mrô 57, Tổng Bí thư Tô Lâm geh nau ntoh ngơi rđau đă khlay tâm nau rƀŭn ndrel Kruanh Quốc hội Trần Thanh Mẫn kŏ mbơh nkô̆ nau aơ. Đảng đoàn Quốc hội ntrŭnh nau mrô 3260 gay ƀư nau ntrŭnh mrô 57. Tâm rơh rƀŭn ndal tal 9, Quốc hội hŏ uănh, nchră nau ntrŭnh mrô 193 mpeh du đê̆ nau kan rgâl mhe ân hun hao khoa học, công nghệ, ntrơn rgâl mhe ndrel ntrơn rgâl mrô neh dak. Aơ lah nau ntrŭnh gay rklaih ăp nau bah năp măy, mpeh jŏ jong mra rgâl ăp luật gay ntrŭt dăng nau kan khoa học, công nghệ.

            Ntoh nau tâm nar rƀŭn, Kruanh Quốc hội Trần Thanh Mẫn lah rjăp, Nau ntrŭnh mrô 57 ndŏ luh nkô̆ nau tât năm 2030, Việt Nam dâk tal 3 rmôt leo bôk bah Đông Nam Á, dâk tâm rnoh 50 dak dâk bôk năp bah lam ntur neh mpeh nau ntul rlong mrô ndrel rnoh hun hao Chính phủ điện tử. Việt Nam ŭch dâk tâm rnoh 3 dak leo bôk Đông Nam Á mpeh nau mĭn ƀư ndrel hun hao nau blau njêng mhe, nau dơi gay hun hao du đê̆ nau kan, ntŭk kan mrô. Kruanh Quốc hội Trần Thanh Mẫn đă Rnâng kan Hội đồng Dân tộc, ăp Uỷ ban bah Quốc hội, Văn phòng Quốc hội rgum ƀư ăp nkô̆ nau tơm, kơt:

            “Hun hao khoa học công nghệ, rgâl blau mhe, rgâl lah nau tơm, nau ngăn gay ndâk Quốc hội mhe, blau, ƀon lan ƀư tơm, kloh rvah, blau, khoa học ndrel săk tam. Nau blau njêng mhe mra jêng ndơ dŏng tam kơl an Quốc hội uănh, mbơh luh ăp nau kan tâm di, tŏng nau dơi năn nau đă ngăn, n’hao săk tam mêt uănh ndrel nthoi dŏng khoa học, công nghệ ntĭm nti nŭih kan nâp prêh kơl an nau ntrơn rgâl mrô bah neh dak. Ƀư ngăch, geh nau tam ăp nau ntrŭnh, bôk nau kan đah Quốc hội; ntĭm nti, nchrăp nau blau mrô, kơl an ntoh măt Quốc hội drel cán bộ, công chức, viên chức tâm ntŭk kan bah Quốc hội dŏng nau kan mhe du trong săk tam tâm nau ƀư nau kan. Hun hao ntŭk ntu mrô nâp, ntuh kơl ndâk nau kan dŏng nau blau njêng mhe...kơl an nau kan bah Quốc hội”.

            Kruanh Quốc hội nkah, ân n’hao nau kơt tĭng nti nau blau ndrel dŏng nau tâm boh mĭn ndrel jao nau kan đah ăp neh dak geh nau blau tâm nau njêng mhe, nau kan mrô mhe tâm nau kan bah Nghị viện, gay hun hao ăp ntrong kan đah nau dơi ngăn bah Quốc hội Việt Nam.

            Kruanh Quốc hội mbơh nau, tâm rơh rƀŭn tal 9, tâm khay 5 tât aơ, Quốc hội mra uănh nau rgop mpeh Luật khoa học, công nghệ ndrel ntrơn rgâl mhe, uănh nchră Luật Công nghiệp nau kan mrô, gay doh rkaih nau nkol, pơk trong ân hun hao khoa học, công nghệ, ntrơn rgâl mhe, ntrơn rgâl mrô neh dak.

            Tâm nau tâm nchră nkô̆ nau, Kruanh n’gâng kan Khoa học ndrel Công nghệ Nguyễn Mạnh Hùng ân lah, tâm nau ntrŭnh mrô 57, khoa học công nghệ, rgâl mhe, blau mhe lah nau dơi gay ƀư, lah rnôk gay Việt Nam jêng dak hun hao:

            ‘Đah nau hun hao văng sa nchâp ân geh ăp nau kan leo tât nau dơi mhe ndrel nau ntrŭnh mrô 57 lah du ntrong ndơn geh nau blau mhe rgâl ngăn. Nau rđau kan nê geh 3 n’gâng lah nau nsôih tơm gay hun hao neh dak. Gay mô geh nsrŭng ba kơi, gay geh dơi rgâl mhe, gay geh dơi rlet rlau nau dơi geh văng sa ri aơ lah du trong dơm. Ri ma nơm ân uănh kơt lah du nau rgâl mhe ueh ngăn ndrel ăp ntil. Việt Nam vay geh nau dơi ndrel hun hao dăng rnôk njêng jêng du nau tât dăng mhe lam ƀon lan ndrel ăp ntil”.

            Rơh rƀŭn nkô̆ nau “Quốc hội mrô ndrel dŏng nau blau njêng mhe tâm nau ntrơn rgâl mrô bah Quốc hội” hŏ lah rjăp nau nsôih bah Quốc hội tâm nau hăn lor tâm ntrơn rgâl mrô, dŏng nau kan khoa học, công nghệ gay n’hao nau săk tam nau kan. Ăp nkô̆ nau têh ndŏ luh tâm nau ntrŭnh mrô 57 ndrel ăp nau ntrŭnh geh tât mô knŭng rƀŏng tât nau njêng mhe tâm nau kan khoa học, công nghệ, rgâl blau mhe ndrel ntrơn rgâl mrô neh dak, ma hôm ndŏ nau dơi nâp nâl ân du Quốc hội ueh mhe, kloh rvah, blau dăng lơn./.