Ntoh ngơi ta rơh pah kan, Thủ tướng Phạm Minh Chính an lah, ăp nău nchrăp kan hôm nha geh kŏ khan âk n’hanh ntoch jong âk năm aơ, tâm rnôk nău rgâl nkô̆ ŭch hun hao nsrôih an geh rlău 8% tâm năm aơ n’hanh 2 rnoh mbrô ta ăp năm let năp tay rĭ an geh nău nsrôih âk lơn, nău nsrôih têh lơn, tâm nĕ geh ăp nău an bah ăp trong kan kŏ văk, nău kan mô dơi. Thủ tướng an lah, n’gâng kan Tơm prăk lĕ geh rdâk njêng rnoh mbrô, pă ntil an rlău 1 rbăn 500 ăp nău kan jêr, kŏ văk, yơn lah, nău ueh mbơh tơih mô geh tâm ban. Thủ tướng đă nău mĭn an geh njrăng kŏ văk, đah nău nsrôih âk ngăn, nău nsrôih têh lơn, pah kan răng dăng lơn, geh nău kan tơm, nău kan ngăn. An geh uănh nđôi tay, rdâk njêng trong kan, nău kan rmal uănh lor du đê̆ rmôt nău kan tâm nĕ geh an săch rmôt ăp nău nchrăp kan nsum, nău kan ntuh kơl tĭng trong PPP tâm ton đah ngih dak đah doanh nghiệp gay ma mbơh tơih ƀư kan.