Tĭng nău mbơh tơih, ăp năm ba năp, n’gor Đăk Lăk lĕ geh âk trong kan, nău kơl gay ma nta rnoh nuĭh kan ta ntŭk geh nău kan blău, ueh tâm di đah nău ŭch săch kan an hun hao ăp nău kan wăng sa tơm khlăy. Lvang năm 2021-2024, n’gor lĕ sŏk rlău 28 rbăn rmen prăk an hun hao rnoh nuĭh kan, geh rlău 35% lĕ rnoh tơm prăk ngih dak ta ntŭk. Tât aƀaơ, rlău 64% cán bộ, công chức, viên chức nuĭh pah kan lôch ntĭm nti, nti nău kan. Ta rơh pah kan, UBND n’gor Đăk Lăk dăn đă đah n’gâng kan Nội vụ ơm ntrŭnh nău ntĭm leo ƀư tĭng nău kơl kan đah nuĭh geh nău blău tâm ntŭk kan ngih dak, n’gâng kan ntŭk kan, rdâk njêng ntŭk kan rnoh mbrô ngih dak mpeh nuĭh gĭt blău Việt Nam. Ta meng nĕ, ăp n’gâng kan geh tât an geh rdâk njêng nău way kan, nău kơl kan gay ma ăp doanh nghiệp geh nău dơn kan tât râng trong kan ntĭm nti nău kan, geh nău kơl an geh âk nuĭh nai nti blău, nuĭh way kan, kĩ sư, nuĭh pah kan blău tât râng ăp bôk nău kan ueh di.