Măng 6/4, rlau 1.500 ntoh măt ndrel âk rbăn nŭih ƀon lan Dak Lak hŏ ndrel uănh bôk nau ƀư njroh mprơ “Nau mprơ nkoch đăp mpăn”, di nkah 50 năm nar rklaih miền Nam, đăp mpăn neh dak. Đah nau khlay bah nau dơi rklaih Buôn Ma Thuột, pơk trong ân nau dơi lơh đăp mpăn năm 1975, bơi tât 250 nŭih nghệ sĩ, tahen, nŭih râng njroh mprơ ndrel ƀư ăp nau mprơ bah rnôk rhơn Tây Nguyên rklaih đăp mpăn ndrel rƀŏng tât tâm Sài Gòn. Yuh Nguyễn Thị Thuý Diễm, tâm Phường Tân An, nkuăl ƀon têh Buôn Ma Thuột, nkoch: ‘Bôk nau kan aơ ƀư ueh ngăn ndrel dŭt têh đŏng. Lĕ ma ngih hên rhơn, hăn uănh nau njroh mprơ aơ, saơ ueh ndrel ăp nŭih tât uănh ri rhơn m’ak, dŭt n’hâm geh nau nkah ngăn”.

         Êng nau uănh tĭng ăp jâng bah tahen rklaih bah ăp phóng sự ơm, ăp ntoh măt ndrel nŭih uănh hôm geh djăt nau nkoch tă bah sân khấu bah Trung tướng, Nŭih janh dăng bah tahen ƀon lan Đoàn Sinh Hưởng, Kruanh rmôt Đại đội 9 ơm, Trung đoàn Tăng thiết giáp 273, nŭih hŏ ƀĭt ndeh sar 980 lơh tâm sư bộ 23 Việt Nam Cộng hoà ta Buôn Ma Thuột ta lơ 10/3/2975. Ndeh sar 980, rnôk aơ jêng n’hâm dăng bah nau ơm, tâm rkum rup dah geh dơi rklaih Buôn Ma Thuột. Trung tướng Đoàn Sinh Hưởng mbơh, păng dŭt rhơn rnôk 21 năm tâm lơh nsĭt nau đăp mpăn neh dak, nkre lah rhơn yor ăp nau tă geh tâm n’gul rach năm ma aơ: ‘Rhơn ngăn rnôk nơm tă geh râng tâm rnôk tâm lơh khlay kơt nê ndrel đah ăp nŭih tahen nơm ndrel hŏ ƀư jêh nau kan. Jêh rlau 50 năm plŏ ta aơ ri neh dak nơm geh rgâl âk ngăn ndrel ngăn lah Buôn Ma Thuột rnôk aơ êng ngăn, nê lah du nau rhơn”.

         Tâm Ngih săm ƀŭt Quân sự Quân khu y (Quận 12, nkuăl ƀon têh Hồ Chí Minh) kŏ mhe geh Bôk nau ƀư njroh mprơ nkah 50 năm Nar rklaih miền Nam, đăp mpăn neh dak nkô̆ “50 năm-nau rhơn mhe bah neh dak”. Bôk nau kan hŏ ntoh nau ueh, nau dăng, nau khlay bah nau ơm bah Nar rklaih miền Nam, đăp mpăn neh dak. Bah nê ƀư rjăp nau rđau kan ueh ang bah Đảng ndrel Kruanh Hồ Chí Minh; n’hâm dăng ndrel nau nsôih, ân geh nau dơi bah tahen ndrel ƀon lan Việt Nam, rmôt tâm rnglăp lam rnoi mpôl. Nkre nkah nau kơl an bah ăp rmôt hŏ tâm lơh, roh hoach, ƀư jêng nau dơi têh nâp; ndâk nuih n’hâm rŏng dak, nau rhơn bah cán bộ, tahen, ƀon lan tâm nau kan ndâk njêng ndrel mât neh dak, ndâk neh dak, lăp tâm rach năm hao săk bah rnoi mpôl. Wa Tô Văn Luận, groi nŭih kan bah Jrâu kan mbơh nchră nau hành chính Ngih săm ƀŭt Quân sự Quân khu 7 mbơh nau:" Lơ 30/4 dăp tât geh nau khlay ngăn tâm nau nkah ơm bah lam đảng, lam tahen, lam ƀon lan. Cán bộ tahen tâm rmôt tahen dôl khuh răm ƀư ăp nau kan gay nkah nau dơi rklaih. Ngih săm ƀŭt Quân sự Quân khu 7 kŏ ƀư âk nau kan, tâm nê geh nau đăp mpăn ân rmôt râng nau leo hăn tahen tâm rnôk nkah. Săk gâp kŏ kơt lah ăp cán bộ, tahen ndrel ăp rơh mom ri bah ăp phim ndah nkoch nau ơm kŏ geh ntĭm nti, ăp nŭih kŏ rhơn ndrel nkah ngăn rơh che mbŏ hăn lor hŏ huk nting mham yor nau đăp mpăn rnoi mpôl”.

         Thượng uý Phạm Duy Hưng, Kruanh rmôt Đại đội Công binh, N’gâng kan rđau tahen nkuăl ƀon têh Hồ Chí Minh, nkoch: ‘Rhơn ngăn rnôk dăch tât nar lễ têh bah nŭih ƀon lan lam dak lah nsum ndrel nkuăl ƀon têh Hồ Chí Minh lah êng, di nkah 50 năm nar rklaih miền Nam, đăp mpăn neh dak. Lah “tahen Wa Hồ” ri nơm saơ ăp nar lễ aơ lam dak kŏ rƀŏng tât nkualư ƀon têh, nau kan bah săk nơm ân geh n’hao tay, nkre mêt uănh nau đăp mpăn ân ăp nar ƀư lễ, nkre đăp mpăn geh ƀư ân nơih, mô ân geh nau roh đăp mpăn, ne elah nau kan bah nô, oh tahen công binh bah nkual ƀon têh”.

         Bah nau nkoch tă bah Trung tướng Đoàn Sinh Hưởng, nŭih tă ƀĭt ndeh sar 980 lơh lăp tâm ntŭk gŭ bah phung rlăng tâm Buôn Ma Thuột, ân tât nau rhơn ngăn bah ƀon lan ndrel tahen om nar aơ, ăp bôk nau kan ƀư jroh mprơ hŏ jêng ntung nthoi ueh đah nau ơm ndrel nau ueh. Nuih n’hâm tahen Wa Hồ mô êng rêh tâm nau dơi tâm lơh ơm kăl e ma hôm rêng lam tâm ăp nau mpât rgâl bah nau rŏng dak, ăp nau kan ngăn yor nau hun hao bah neh dak rnôk aơ./.