Jêh rơh Rƀŭn tal 3 Ban Ntĭm rđău Trung ương mpeh n’glôch jêh Nghị quyết 18 ôi 14/4, Thủ tướng Phạm Minh Chính lĕ ký nău ntrŭnh 758, an trong nchrăp ƀư dăp tay ntŭk kan hành chính n’hanh ndâk njêng ntrong ƀư n’gâng kan 2 gưl. Tĭng trong nchrăp, N’gâng kan Nội vụ mbra an ntĭm rgum lăp nsum ntŭk kan hành chính, uănh mât tay n’gâng kan, dăp cán bộ tĭng trong dơh ngăch, săk rnglăy, đăp mpăn nău ŭch rhŏ kan nsum bôk năp. Ăp nău ntĭm aơ an jêh bah năp lơ 25/4. Nkre, N’gâng kan lĕ đŏng đah nău kan ntĭm mpeh trong kơl prăk khay, ntop kơl, tâm pă cán bộ mô way kan, lôch jêh bah năp lơ 30/7.

N’gâng kan prăk kaih dơi jao ntĭm tâm pă prăk, mkra drăp ndơ, neh ntu, ngih pah kan, kơt trong kan jao an sam ƀŭt sam tra, drăp ndơ, lôch jêh bah năp lơ 25/4. N’gâng kan Xây dựng mât uănh ntĭm tâm pă ngih pah kan mhe an n’gâng kan ƀon lan n’hanh ăp ngih pah kan geh tât. Thủ tướng đă ăp n’gâng kan, nău kan nchrăp lor tâm rgop, tĭng ƀư ngăch, tâm pă na nê̆ nuĭh, na nê̆ nău kan, đăp mpăn ăp ntŭk mbơh ƀư ntrong kan n’gâng kan ƀon lan mhe bah lơ 1/7/2025; uănh an tŏng ăp nău dơh an nuĭh ƀon lan, lơn lah kon hŏk rnôk dăp tay xă, phường, ngih dak si nkuăl.