Tâm rnôk hăn khâl, wa Tập Cận Bình hŏ geh rơh tâm nchră đah ăp kruanh gưl têh bah Đảng, Quốc hội, Chính phủ Việt Nam. Bar ding tâm ban ŭch ân rôih sŏng ntrŭt ntrôl n’gâng kan tâm rnglăp Việt Nam - Trung Quốc. Bar ding tâm ban ŭch ntik n’hao uĕh nău khlay kan bah “Hiệp định tâm boh wăng sa lam lĕ rngôch nkual” (RCEP) n’hanh Hiệp định dah rŏng tăch rgâl ASEAN - Trung Quốc (ACFTA) ntrŭt ntrôl tăch rgâl bar ding hun hao tĭng trong rƀŏng tâm ban geh. N’hao dăng tâm pă kan, rgop kan nsum tâm ăp trong kan âk ding, kơt Liên hợp quốc, Rgum nchră tâm boh wăng sa châu Á - Thái Bình Dương (APEC), Rgum nchră tâm boh Á - Âu (ASEM), Hiệp hội ăp dak Đông Nam Á (ASEAN), tâm kơl nsum tâm ntŭk tâm rlong lăp ăp ntŭk kan dak bah dih. Bar ding tâm ban ŭch mât kân n’hanh nkra tâm di nău tâm rkeh, mât nău kan têh tâm rnglăp Việt – Trung. Tâm rnôk hăn khâl, bar ding hŏ ký ton âk siƀŭt tâm boh tâm ăp trong kan buăt nthoi trong ndeh, trong loih, uănh năl kah uĕh, nuh srê mpông n’har lăp, tăch rgâl ndơ tuch tăm, njrăng n’gang neh dak, khoa học công nghệ, văn hóa, thể thao, ntĭm nti, ndơ dŏng rêh an ƀon lan, tơm nuĭh kan, nkoch trêng nău lư n’hanh tâm boh n’gor tâm dâng... Tổng Bí thư, Kruanh dak Tập Cận Bình lah uĕh mpeh nău wơt ăp dăp, dêh bên n’hanh tâm rnglăp; dăn jă Tổng Bí thư Tô Lâm n’hanh Kruanh dak Lương Cường ơm khâl tay Trung Quốc./.