Aơ lah rơh rƀŭn ntoh măt Quốc hội ƀư du ntil nau kan tal 7 bah năm kan Quốc hội gưl 15, tâm rnôk lam ntrong kan chính trị dôl ndal ƀư ăp nau kan rgum ăp ntŭk kan. Mpeh nau aơ, Kruanh Quốc hội Trần Thanh Mẫn mbơh, rơh ngoai, ăp ntŭk kan hŏ dăp rgum ntrong kan, rơh 2 lŏ rgâl Hiến pháp, rgâl du đê̆ luật ndrel dăp 50% ăp ntŭk kan hành chính bah n’gor. Rơh rƀŭn tal 9 nchrăp nchră tâm bơi tât 2 khay, tâm rnôk aơ gay sŏk nau rgop bah ƀon lan mpeh nau rgâl Hiến pháp. Ngăn lah, ntơm dŭt khay 4 tât bôk khay 5, Uỷ ban Rnâng kan Quốc hội kŏ rƀŭn nchră âk gay dăp rgum ntŭk kan gưl kan. Kruanh Quốc hội Trần Thanh Mẫn lah rjăp:

            ‘Ăp nau tă geh ueh, rgâl tâm nau kan ndâk pháp luật tâm rơh rƀŭn tal 7, tal 8 ndrel rơh rƀŭn ndal tal 9 mhe rlau ƀư rjăp nau tâm di bah nau ntrŭnh rgâl mhe nau kan tâm nau ndâk njêng pháp luật kŏ kơt lah nau khlay ngăn bah ăp rơh rƀŭn nchră ăp nau kan tâm nau ân đăp mpăn nau dơi nâp bah nau nchrăp luật rnôk mbơh ma Quốc hội, Gâp đă, ân lŏ ƀư ân jru lơn ndrel ƀư ân tam lơn nau ntrŭnh rgâl mhe nau mĭn kan gay ndâk pháp luật, gay ngăch leo nau ntrŭnh bah Đảng lăp tâm nau ngăn bah nau rêh. Ăp nau ndâk njêng luật, ntŭk kan ndơn nau ƀư tât lôch đah nau nchrăp luật ân tât rnôk Quóc hội ân geh ƀư ngăn”.

            Tâm rơh rƀŭn, ăp ntoh măt Quốc hội hŏ tâm nchră tât Luật Công nghiệp nau kan mrô. Wa Nguyễn Thị Thu Nguyệt, rmôt kan ntoh măt Quốc hội n’gor Dak Lak kŏ tâm ban nau mĭn đah nau nchrăp luật, geh ăp nkô̆ mhe ntoh tâm ăp nau ntrŭnh, kơt lah drăp ndơ mrô, tuch tăm mro, nau kan công nghệ mrô...Rgop nau ngăn tâm nau nchrăp, wa Nguyễn Thị Thu Nguyệt ân lah, tĭng nkô̆ nau Điều 10 mbơh luh du đê̆ nau đă đăp măpn ân nau kan mrô, yơn nau ntrŭnh rnă njrăng mạng ndrel đăp mpăn rnoh geh hôm nsum nsum, mô tŏng nau dơi n’hêl mpeh nau geh dŏng nau kan ndrel nau mât ƀư:

            ‘Tâm rnôk ntrơn rgâl mrô nar lơn ma hun hao ri rnoh mrô săk nơm ndrel rnoh mrô ntŭk ƀư kan tăch rgâl ân jêng du drăp ndơ geh rnoh khlay ngăn, nkre kŏ lah nkô̆ nau lơh bah ăp nau nkri tă bah dih. Nau mô tŏng nau dơi mât nâp bah nau kan n’hêl, nau ƀư nau kan mât njrăng nâp kŏ jêng ăp nau khuch, nau roh, nau mpơl mô lah geh bu lơh tât rnoh mrô, ndri ma gâp đă Rnâng kan nchrăp kan gay ntrŭnh ăp nau dơi ân rjăp mpeh nau đăp mpăn trong mạng ndrel ăp nau ntrŭnh aơ ân nsing tâm nau geh dơi bah dak ba dih kơt lah nau dơi yor N’gâng kan Công an ndrel N’gâng kan Khoa học ndrel Công nghệ hŏ ntrŭnh bah năp nơh”.

            Hôm wa Phạm Trọng Nghĩa, rmôt kan ntoh măt Quốc hội n’gor Lâm Đồng, đă:

            ‘Uănh gay ntop nau kan hun hao công nghệ mrô gay đăp mpăn nau dơi bah neh dak tâm trong mạng, đăp mpăn rnă njrăng mạng, đăp mpăn rnoh mrô, đăp mpăn nau mbơh mpôn bah ntŭk kan ndrel êng săk. Aơ lah 1 tâm 5 nau mĭn rđau đă tâm nau ntrŭnh mrô 57. Tal bar, đă ân geh uănh ntop nau ntrŭnh ƀư rgum nau tâm ƀah mrô gay ăp nŭih ƀon lan, ngănlah rmôt mô geh dơi kơt nŭih rnoi mpôl đê̆ tâm nkuăl jru, ngai, hôm âk nau jêr, ê geh nau kơl an ngăn tă bah nau hun hao nau nau kan mrô gay mô geh nŭih geh nchlơi êng ba kơi tâm rnôk hun hao nau kan mrô tâm dak nơm”.

            Djăt ndrel mbơh ăp nau kan ăp ntoh măt Quốc hội, lah Kruanh n’gâng kan Khoa học ndrel Công nghệ Nguyễn Mạnh Hùng lah rjăp, Đảng ndrel Ngih dak hŏ năl nau kan mrô lah nau kan tơm, geh nau dơi leo nau dăng ndrel ngăn ngên geh nau tâm di ma nau geh dăng dơi bah Việt Nam, geh nau ntrŭnh ntrŭnh gay dơi hun hao văng sa ndrel rêh jêng mrô lah nsum tâm rnôk mhe.

            Ntoh nau tâm nar rƀŭn lôch, Groi Kruanh Quốc hội Trần Quang Phương kơp dơn, rnê prêh nau râng tŏng, nau kan prêh bah ăp rmôt kan ntoh măt Quốc hội ƀư du nau kan, ăp ntŭk kan n’gâng kan. Ăp ntoh măt Quốc hội ƀư du nau kan hŏ geh ăp nau nchrăp nkô̆ nau ân nâp rjăp, ăp nau rgop mbơh đă geh nau dơi ndâk ƀư ân gleh, tâm di, mbơh nkoch ân tâm di jru rjăp ngăn./.