Nău tâm leo ngêt cà phê kah khlay rêng lam hvi, njêng luh ntŭk tăch rgâl săk geh đah rnoh khlay rlău cà phê tăch rgâl ngăn. Saơ geh trong dja, âk doanh nghiệp ta Gia Lai hŏ dâk leo lor ntuh kơl ăp tŏng rêng, rƀŏng tât nău kan jĭr êng ntơm bah yơng ntil, mât chăm tât nkret njêng jru. Wa Nguyễn Tiến Định - Giám đốc Công ty Cổ phần Cà phê Việt Nam United, nkuâl Chư Prông, Gia Lai an gĭt:

“Mpôl hên saơ cà phê kah khlay lah trong rƀŏng bah n’gâng kan cà phê lam ntŭr neh yor mpôl hên mô gŭ bah dih. Tâm rnôk pah kan đah rnăk ƀon lan mpôl hên lor nchrăp tâm pă nău gĭt đah nuĭh ƀon lan kan lŏ mir gay khân păng wât tăch dơi cà phê rnoh khlay lơn ri ân n’hao săk kah cà phê gay nsĭt geh wăng sa uĕh  lơn” 

Mô dơn lah nău nkoch bah doanh nghiệp, cà phê kah khlay njêng ăp nău rgâl tâm nău kan tuch tăm bah nuĭh ƀon lan n’hanh ăp hợp tác xã đŏng. Ntơm bah uănh khlay rnoh âk play rgâl jêng nău kan tuch tăm jŏ jong, kônh wa hŏ dŏng trong mât chăm hữu cơ, sơch klêh, rao play n’hanh ih ta ndrơng.  

Ta nkuâl Đăk Đoa, Hợp tác xã Nông nghiệp n’hanh Dịch vụ Lam Anh hŏ geh nău dơi đah trong mât chăm hữu cơ an rêh jêng êng. Ndơ cà phê kah khlay bah hợp tác xã mô dơn geh kơp dơn OCOP 4 sao gưl n’gor, ma hôm leng dơi âk ntŭk tăch rgâl khăch kho tâm n’hanh bah dih dak. Wa Lê Hữu Anh - Giám đốc HTX nkoch:

“Ma rup gui nuĭh ƀon lan kan lŏ mir ngăn, geh nău nsing nơm têh tâm rnoh khlay bah găr cà phê, mpôl hên hŏ rgâl trong mât chăm tơm tăm, n’hao rnoh kah uĕh ndơ geh ƀư. nău dja mô dơn kơl n’hao rnoh khlay cà phê ma hôm rgop jut jăng ji ngot n’hŭch ach o, kơl kônh wa ƀư geh ndrŏng bah tơm cà phê nơm.” 

Aƀaơ, Gia Lai hŏ jêng 34 rêng tâm rgop kan tuch tăm nkre đah tăch cà phê, đah lĕ rngôch rnoh hvi rlău 43.500 ha; rgum 26 doanh nghiệp n’hanh 8 hợp tác xã. Âk doanh nghiệp hŏ nănh tăm cà phê hữu cơ, ntuh kơl nkret njêng jru gay n’hao săk kah n’hanh n’hao rnoh khlay ndơ tăch.  Gay cà phê săk kah âk n’hanh cà phê kah khlay rlău rnoh têh âk bah ăp trong ntĭt leo, n’gâng kan ăp nkuâl tâm n’gor dôl an ƀư âk trong ntop kơl ngăn ngăn, bah nău dăp rgum nkual tăm tât buăt nthoi doanh nghiệp đah ntŭk tăch rgâl dak bah dih. Wa Đoàn Ngọc Có – Groi Giám đốc Sở Nông nghiệp n’hanh Môi trường n’gor Gia Lai an gĭt:

“Tât năm 2030, rlău ma nău hun hao cà phê kah khlay 2.340ha Gia Lai mbra n’hao 80% rnoh hvi neh tăm cà phê bah lam n’gor dơi mât chăm tĭng di rnoh kơp dơn. Rlău ma nău he hun hao cà phê kah khlay n’hanh cà phê tĭng di rnoh gay tŏng di đah ntŭk tăch rgâl, Gia Lai dôl nsrôih wăch rgum ntuh kơl gay rdâk njêng nhih máy nkret njêng jru play cà phê gay n’hao rnoh âk nkret njêng jru cà phê ta n’gor, tâm ban kơt n’hao rnoh khlay ndơ geh ƀư bah cà phê đŏng.”

 Đah ăp nău nsrôih mô gŭ rlu bah doanh nghiệp, ƀon lan kan lŏ mir n’hanh n’gâng kan ta ntŭk, cà phê Gia Lai dôl tĭng kơn mpơl ntŭk gŭ khlay ta bản đồ cà phê săk kah lam ntŭr neh. Nău rgâl bah tuch tăm mbrach lêng jêng rgum tâm săk kah n’hanh rnoh khlay nâp dăng, nsĭt tay nău geh wăng sa âk lơn an nuĭh ƀon lan kan lŏ mir đŏng, nkre rgop n’hao săk ntơ lư cà phê Việt Nam.