Bộ Nông nghiệp n’hanh Môi trường mhe kan nsum đah UBND n’gor Dak Lak ƀư Tâm nchră “Hun hao n’gâng kan sầu riêng jŏ jong”, wăch rgum nău tât râng bah kruanh rđău kan ăp n’gâng kan, doanh nghiệp, hợp tác xã n’hanh ƀon  lan kan lŏ mir.

Lôch mô hŏ tât du rach năm, rnoh hvi neh tăm sầu riêng lam dak hŏ hao âk rlău 6 tơ̆, geh bơi 180 rbăn héc-ta tâm năm 2024, rnoh âk geh play rlău 1,5 rkeh tấn, nsĭt geh tăch n’gluh rlău 3 rmen USD; rgop khlay tâm rnoh tât hun hao nkual tuch tăm, si gle, tui ka tâm ban kơt rnoh tât geh tăch n’gluh bah n’gâng  kan đŏng. Yơn lah, hun hao ngăch “ndal” hŏ ntoh âk rmoh rman đŏng rnôk 4 khay bôk năm 2025, tăch n’gluh sầu riêng hŭch âk mpeh rnoh âk geh n’hanh rnoh khlay. Bộ trưởng Đỗ Đức Duy nkah njrăng lor mô geh trong mât uănh thăng tâm di, Việt Nam mbra tŭp tâm trôm wăch wêl khuch: rmeh bưm play, jŭr thuk, roh ntŭk tăch rgâl, khuch hô tât nău nsing nơm ndơ tuch tăm Việt Nam.