Rmôt hăn kan bah N’gâng kan njrăng, rdâng srê ji, N’gâng kan dak si mhe geh nar pah kan đah N’gâng kan dak si n’gor Dak Lak gay mêt uănh nau kan njrăng rdâng rtoh luh dak tâm n’gor Dak Lak. Tĭng nau mbơh, tâm năm 2023, Dak Lak mô geh nŭih kơp dơn geh ntưp ma srê rtoh luh dak, yơn tât n’gul năm 2024, nau ji aơ hŏ hao ngăch bơi tât 900 nŭih, ndrel ma 31 nŭih ji rubella. 3 khay bôk năm 2025, rnoh nŭih ntưp srê rtoh luh dak lŏ hao âk, đah 206 nŭih, hao 100% rđil rơh aơ năm e, rgum âk ngăn tâm nkuăl Buôn Đôn, Krông Pắc, M’Drak ndrel Ea Súp.

30% nŭih geh nau ji rtoh luh tâm Dak Lak tam kon se ntơm du năm tât 4 năm, âk ngăn lah kon se ê geh chuh vắc xin njrăng ji. Năm e, rnoh geh chuh vắc xin njrăng rtoh luh dak tâm Dak Lak geh 95%, yơn 2 khay bôk năm aơ rnoh aơ geh 15%. Wa Võ Hải Sơn, Groi Kruanh N’gâng kan njrăng srê ji mbơh, mra ndăn ăp tu tơm gay ma mbơh pă vắc xin ân n’gor Dak Lak, đăp mpăn nau geh rnoh chuh vắc xin ân kon se./.