Kêng măng 25/1, ta xă Ea Kao, nkual ƀon têh Buôn Ma Thuột, N’gâng kan Văn hóa, Thể Thao n’hanh Pâl nđaih Dak Lak ƀư n’glôch jêh jrô nti n’hanh mbơh ntrong kan câu lạc bộ văn hóa way ơm rnoi nuĭh Tày, Nùng, Mường xă Ea Kao. Câu lạc bộ văn hóa way ơm rnoi nuĭh Tày, Nùng, Mường xă Ea Kao geh 52 nuĭh lah kônh wa ăp rnoi nuĭh tày, Nùng, Mường ŭch, kơnh văn hòa way ơm râng.

Jêh rnôk geh nău ntrŭnh ndâk njêng, nuĭh câu lạc bộ dơi ntĭm, trêng ntĭm nău blău mprơ then, đàn tính bah nuĭh Tày, Nung; gŏ du đêt nău chĭng nuĭh Mường. Jêh 2 pơh, ăp nuĭh nti lĕ dơi gŏ uĕh 3 nău chĭng Mường n’hanh 3 nău đàn tính, mprơ then. Êng đah ăp câu lạc bộ lĕ ndâk njêng bah năp nĕ, aơ lah câu lạc bộ bôk năp geh nău tâm rgop bah âk rnoi nuĭh đah nău ŭch rgop mât ndrăy n’hanh hun hao ăp nău khlay văn hóa, nghệ thuật way ơm, nta an ntŭk pâl an kônh wa ăp rnoi nuĭh dơi răm m’ak uĕh lăng, n’hao nău tâm rnglăp.