Ntênhk hu plis thiêz tik bê trâu mê nhuôv

          Trơưk li pêz Hmôngz chax chês, huôv tsar cêr uô nênhx đhâu ntâu tiêv lok, thâuv xênhz zus tâu mê nhuôv pur 3 têis cik, niêv txir tsuv hu plis thiêz tik bê trâu tus mê nhuôv ntơư, cov tus mê nhuôv co njux plis muôx bê lok đros chuôz zis huôv tsar cêr uô nênhx nhoz. “Iz lênhx mê nhuôv thâuv xênhz zus tâu, tus mê nhuôv co njux plis tsik tâu muôx tsưr, thâuv tik bê tas trâu, njux plis thiêx lok đros tus mê nhuôv co. Zos mê nhuôv tsik muôx njux plis, tus mê nhuôv co zuôr trâus muôx moz gênhk, tsik yuô khênhr hloz”.

          Thâuv hu plis thiêz tik bê, niêv txir tsuv bax iz gơưv kêiz chox lok hu plis, zos muôx buô cux tuô iz tus mê nhuôv buô đros thiêx txâuk nox. Thâuv hu plis trâu tus mê nhuôv co, tsuv tâu hu 2 jiês, jiês 1 zos hu thâuv gơưv kêiz tsik tâu tuô; jiês 2 zos hu thâuv hâu gơưv kêiz siêr thiêz tsuv muôx iz luz kê đros, đros trâu iz tus shaz. Nzơưs x Thox, nhoz qơư tsês chuôz zênhx tỉnh Điện Biên hêik pâuz: “Pêz Hmôngz xav tiêk: njux plis cux li mê nhuôv zâu, lox sik nhiêv kê; chênhr zos li hêik ntơư, tsuv muôx kêiz, muôx kê chiê hu njux plis lok tsêr đros tus mê nhuôv ntơư”.

           Đhâu hu plis, tik bê tas, uô tâu tiêr jâuz mor grêix siêr, hu têx cưr tix nênhx tsa đros nox pluôk mor hu plis tik bê, sik đros phôngv côngz jông trâu tus mê nhuôv co cov tsik muôx moz gênhk. Thiêz thâuv, tus niêv xênhz zus mê nhuôv ntơư tsik tâu pur hli, cưr tix nênhx tsa cxênhz jê muôx hâux lưv muk lok đhâu, cux tsik tâu kaz hnaz, trâu khâu lok hâur tsêr; lar hêik zos chor pox niêv tsênhv taz tov xênhz tuz ci hâur chêr, tsuv tâu chêir, zos tsik chêir, zuôr tiêv tus niêv tsênhv nhoz đruôz hli ntơư mik, tus niêv co zuôr tsik muôx mik trâu mê nhuôv nox. Nzơưs x Thox, nhoz qơư tsês chuôz zênhx tỉnh Điện Biên hêik pâuz nzir: “Chor pox niêv tsênhv taz tov xênhz tuz ci hâur chêr, zos tuôx muk trâu chuôz zis tsênhv taz tov nhoz đruôz hli, têx jiês cux zuôr uô trâu tus niêv nhoz đruôz hli ntơư tsik muôx mik trâu mê nhuôv nox. Chênhr zos li hêik ntơư, thiêx tâu chêir thâuv tus niêv tsênhv nhoz đruôz hli”

          Zos xênhz zus mê nhuôv ndax trâu tsiêz 30, hâur 3 hnuz xênhz zus tâu mê nhuôv hâur shôngk shông yiêz, zos muôx kruô tuôx uô si, sêiz shuôk cưr tix nênhx tsa txos hâur chuôz zis; tus kruô ntơư tsuv tâu uô niêv txir  puôs; uô li ntơư, tus mê nhuôv co thiêx khênhr hloz tsik muôx moz gênhk thiêz njiz ntâu cêr vav mênhx hâur luz nênhx. Nzơưs x Thox, nhoz qơư tsês chuôz zênhx tỉnh Điện Biên hêik pâuz nzir: “Niêv txir puôs tsuv zos chor chuôz zis muôx luz nênhx jông, khưr tâu nox tâu hnar; tus mê nhuôv co thiêx zuôr muôx cêr vav mênhx đros chuôz zis”.

          Thâuv tưz uô niêv txir puôs mê nhuôv, tsuv muôz niêv txir puôs sêiz tsiv grê thiêz thâuv txos trâu  têx hnuz tsiêz, tsuv muk paz niêv txir puôs uô cxuô zav hâux lưv iz zav li zuk chuôz zis hâur tsêr. Nzơưs x Thox, nhoz tỉnh Điện Biên hêik pâuz: “Hnuz xiêz 1 tsiêz, tus mê nhuôv puôs ntơư tsuv tuô iz gơưv kêiz gra muk puz trâu niêv txir puôs. Taz sik nhiv no cux zos uô tsơưs,  2-3 shông mak li uô iz jiês, tsik nhoz li đrav ntêx”./.

                                                                                                                               (Tsu cxêik nhênhv-VOV4)