Cưk yuôx Bôv đôiv Pênhz phax côngv têk phax tar caz moz Covid-19 thax tsav tox siêz, ntus đriv

Jok Mồ Sì San, xar Mồ Sì San, huyện Phong Thổ, nhoz kuôk tsênhv qơư xar muôx 3 six hơưv ntâu muk tơư. 80 ntâu ziv chuôz zis tsôngv box Cho nhoz no luz nênhx tưz zênhx txov nhêv, nhiv no huôv xênhz caz moz, luz nênhx tsênhv txov nhêv đuô. Txos nhiv no, jos tưz pov muôx 20 lênhx nênhs trâus cik moz Covid-19 thiêz tsênhv tâu cêv kuôk chơưv kho moz ntơưv tsêr. Pêx xênhv lok six cxơưx, viv têx qơư cêv kuôk, cxuô kror chiê chơưv kho ntơưv tsêr cux tsik truôx pês tsơưs, viv li zôngx ziv uô siz cik caz moz. Niêv tix Lò Thị Nghiệp, nhoz jok Mồ Sì San hêik:

“Cur pov zuk tsik thor jông nhoz, hnôngk, uô cuz thiêz gênhk. Cur tuk txir thiêz chuôz zis cux cxơưx, viv li hêik cur muk trâu trạm y têr chiê njuôk shuôk moz. Cur tưz tuôx trâu trạm thiêz tâu canr bôv trạm đros trâu canr bôv bôv đôiv Pênhz phax kriê cov cur zôngv cuô yuôx nzuôr têk, njuôk shuôk iz chêr thiêz njuôk shuôk sêi caz moz Covid-19”.

Xar muôx 6 six zuôr tsâuk ntux Đại úy Tạ Quang Hạnh, y sĩ Zênhx Pênhz phax Vàng Ma Chải cux tsênhv sir jos nriêr pâuz thax tsav qơư. Tix lâus li têx hâux lưv hâur têx hnuz no zos muk trâu yênhx ziv chuôz zis, paz trâu lưx lươngv y têr chơưv kho trâu chor nênhs trâus moz thiêz yax kriê trâu pox nhuôs pâuz tsưr ziv phax, tar caz moz. Tiv chôngz lênhx nênhs tsik pâuz luk tsoz tsiz, viv li tsênhv njiêz yax kriê tâu tix lâus kriz uô txix luk hêik ntơưv thax tsav qơư tsêx trung hêik kriê têx tsưr ziv phax tar caz moz gênhk thiêz têx phiv liv muôx yưv thâuv trâus moz Covid-19 cov pêx xênhv zôngx ziv pâuz tâu:

“Hâur ntu caz moz txơưr txar phiv liv li nhiv no, cur tưz muk côngv đros lưx lươngv y têr ntơưv thax tsav qơư kriz uô têx hâux lưv yax kriê pêx xênhv pâuz lok caz moz Covid-19. Thâuv muk mak cur tưz paz đros uô côngz xưv cxax yuôx, yax kriê trâu pêx xênhv pâuz uô truôx jông lơưr têx tsưr ziv phax tar caz moz, zôngv cuô yuôx nzuôr têk”.

Xar ntus đriv Mồ Sì San, huyện Phong Thổ, tỉnh Lai Châu muôx 4 jêx jok, zuôr xar 540 ziv chuôz zis, đros muôx 2.600 ntâu lênhx nênhs. Txix hâur shôngk shông txos nhiv no, sâuv thax tsav xar tưz muôx 600 ntâu lênhx nênhs muk uô jos đêz tror lok ntơưv thax tsav qơư nhoz thiêz hêik pâuz y têr, hâur co muôx zuôr xar 60 lênhx nênhs trâus moz thiêz 230 ntâu lênhx nênhs nhoz jê, njiz tâu chor nênhs moz muôx cuêz tênhv tsuv cêv kuôk ntơưv tsêr. Khov muôx lưx lươngv quân y pênhz phax paz, txos nhiv no lưx lươngv y têr xar tưz kriz njuôk shuôk caz moz trâu 220 ntâu lênhx nênhs thiêz cxax xar muôx 2.800 côngz yuôx vắc xin phax moz Covid-19 trâu pêx xênhv sâuv thax tsav. Zơưv Nguyễn Văn Luyến, trạm trưởng trạm Y têr xar Mồ Sì San, huyện phong Thổ puz pâuz: xar muôx thax tsav đar, chor lưx lươngv y têr ntơưv thax tsav qơư tsơưs, viv li njiz lok six ntâu phiv liv hâur kriz uô têx hâux lưv phax, tar caz moz thiêz tsoz phưz đas jos trâu pêx xênhv. Nhiv no, tas nro chor nênhs trâus moz thiêz chor nênhs trâus cêv kuôk, chơưv kho moz puôr lênhx zos tsuv cêv kuôk thiêz kho moz ntơưv tsêr, đros muôx chor lưx lươngv y têr sêiz shuôk. Chiê phax tar cov tâu caz moz gênhk, tsuv muôx têx sik côngv paz lok six ntâu txix chor lưx lươngv quân y pênhz phax:

“Pêz tưz hêik trâu Đảng ủy thiêz chính quyền ntơưv qơư, khov muôx chor quân y zênhx pênhz phax Vàng Ma Chải paz. Hâur ntu uô hâux lưv, lơưr tưz paz trâu pêz yax kriê têx tsưr ziv phax tar caz moz trâu pêx xênhv pâuz, cux xưk li côngz xưv tsoz phưz đas jos trâu chor nênhs trâus moz Covid-19 tsênhv cêv kuôk, chơưv kho moz ntơưv tsêr”.

Phax tar cov tâu caz moz tsik chiê siz cik đêz đar sâuv thax tsav, iz chas tsưr ziv yax kriê, chính quyền ntơưv qơư tsênhv kriz uô jông côngz xưv hêik pâuz y têr, sêiz shuôk truôx jông chor nênhs tror lok ntơưv thax tsav qơư thiêz sêiz car chor nênhs tsênhv cêv kuôk y têr ntơưv tsêr. Zơưv Tẩn Chỉn Lùng, Chủ tịch Ủy ban xar Mồ Sì San, huyện Phong Thổ puz pâuz:

“Trạm y têr xar muôx tsơưs nênhs, hâux lưv njuôk kho moz trâu pêx xênhv tsênhv uô tsik tâu sêi thiêz cxix cxuô. Quân y bôv đôiv pênhz phax tưz sik côngv đros trạm y têr xar yax kriê, hêik pêx xênhv uô truôx jông lơưr têx tsưr ziv phax, tar caz moz, paz trâu trạm y têr njuôk kho moz trâu pêx xênhv”.

Têx sik côngv jông nhoz chor chiến sĩ bôv đôiv Pênhz phax đros y têr ntơưv thax tsav nhoz chor xar ntus đriv Lai Châu tsênhv đros tas nro têz qơưk tsưx phưv jông đas jos trâu pêx xênhv. Têx cêr sik côngv co tưz paz uô truôx jông cêr sik côngv siêz nhoz quân thiêz pêx xênhv, paz muôx cêr truôx siêz đros tas nro têz qơưk phax tir tar cov tâu caz moz  Covid-19 hâur côngv thôngx./.