Têx kror pâuz xuz thơưx lok zav moz viêm gan (lok zos moz siêz) pâuz tsik tâu tsênhz qir tiv nhoz nhuôs zâu

Chor uô niêv uô txir tsuv uô li chak?

Zav moz viêm gan (lok zos moz siêz) pâuz tsik tâu tsênhz no zôngx ziv cik tâu lok hâur Việt Nam lok six siêz, taz sik chor nhuôs zâu nhoz pêz têz qơưk trâus moz hâur ntu đhâu lok no tsik pov chuôz ndê thiêz tsik tâu pov muôx lênhx nhuôs tưs zos tiv adenovirus uô trâus moz. Viv li, chor uô niêv uô txir tsuv sêiz shuôk jông qênhx shênhx moz thiêz têx xor mông txix Bôv Y têr chiê sêiz njuôk shuôk moz.

Têx kror muôx yưv moz thâuv trâus moz zav moz siêz pâuz tsik tâu tsênhz qir tiv no mak cux muôx njil jông li têx zav moz siêz tiv caz moz viêm gan A, B, C, D thiêz E (gênhk, tsik xar nox, ntuôr, moz plaz, hâur 3- 10 hnuz xuz thơưx; đhâu co kror muôs thiêz tơưr grêix đax, tso têx cuô jik đax tsik thôngx li cxiê hnuz, thâuv kror muôs thiêz tơưr grêix đax mak nênhs moz tsik uô cuz).

Phênhv ntâu chor nhuôs zuôr chiv chir jông moz. Đros qênhx shênhx nhiv no, chor uô niêv uô txir tsuv pâuz tsênhv txos têx kror muôx yưv li hêik tas sâur thiêz chox ciês nênhs moz tuôx trâu têx qơư y têr chiê njuôk shuôk ciês, tiv zix zos thâuv pov mê nhuôv kror muôs đax, tơưr grêix đax, tso têx cuô jik đax tsik thôngx li cxiê hnuz.

Adenovirus cik moz txix lênhx nênhs trâus moz trâu chor nênhs txơưr đuô đhâu cêr nox hâuk (têx qir muôx caz moz), cêr uô pa (li thâuv nênhs moz cxav, hnôngk muôx đros caz moz uô cik trâu chor nênhs txơưr đuô) thiêz đhâu njiz lok sik cor tâu chor nênhs trâus moz (cxov têk) lok sik (cor tâu nênhs trâus moz cxuô zav chuôz zênhx, uz no muôx caz moz, đhâu co xuôk têk cor trâu têx kror muôs, kror njưs kror ndâux mak tsik tâu nzuôr têk cov hur si).

Tsưr ziv phax tar caz moz trâu nhuôs zâu zos tsuv chox đêiv bos kror ndâux, uô vêv xênhz hur jông, nzuôr têk tsik so txix xaz phongx lok sik têx cuô yuôx nzuôr têk (tiv zix zos uô ntêx thâuv zuôr nox hâuk, đhâu muk vêv xênhz lok, uô ntêx thâuv zuôr xuôk têk cor zuk têx kror muôs, kror njưs, kror ndâux) thiêz tsuv nox siêz hâuk bâu. Chor nhuôs zâu tsuv nhoz kuôk đêz chor nênhs trâus moz./.

(Đức Anh BT-Lik Thox cxêik nhênhv)