Tsôngv box Thái li lênhx pox niêv nghệ nhân

      Suôz gâux jông, sưv jê no zos pos Điêu Thị Siêng nhoz jok Bản Đêu, xã Nghĩa An, thị xã Nghĩa Lộ. Pos li luz nênhx hloz lox đros suôz kênhx, suôz trax, hâur đhiê pax vuôs xòe thiêz têx suôz gâux jông.

Muôx 5 shông pos Siêng tưz pâuz hu gâux, 8 shông tưz muk hu gâux trâu sơưr đơưk mnôngs thiêz txos muôx 15 shông mak muôx lok six chôngz nênhs pâuz txos. Hội uô nghệ thuật chor mênhx cxưx tsơưs nênhs thôngz têz qơưk, lok sik chor jiês uô ntơưv tiv phaz, pos têx suôz gâux puôr lênhx tâu khơưk muôz huy chương cuz.

Nhiv no, đros siêz xar jax gâux co tsik trâus pôngz plox, pos Siêng tưz kriê trâu chor nhuôs zâu. Pos kriê jông trâu chor nhuôs pâuz tâu têx jax gâux, đhâu co thiêz kriê tsưr ziv hu gâux li chak cov jông. Pos cux hêik pâuz têx kror jông hâur zuk têzqơưk li chor jax gâux, suôz gâux trâu chor nhuôs pâuz tuôr chiê. Pos Điêu Thị Siêng hêik:

“Nhiv no chor nhuôs zâu tsik yuô tsov cưv txos vênhx huôv mênhx cxưx. Cux tiv chor nhuôs hnor thiêz mnôngs tsik ntâu. Kror no uô trâu cur tsuv sir jos chiê tuôr chiê thiêz kruôz kriê chor vênhx huôv mênhx cxưx trâu hâur zuk côngv thôngx”.

Đros kriê têx jax gâux suôz gâux thiêz têx kror jông hâur vênhx huôv mênhx cxưx Thái, nhiv no pos Điêu Thị Siêng tsênhv kriê trâu chor nhuôs zâu 6 jax pax vuôs xòe lâul, cux xưk li chor jax pax vuôs xòe yiêz.

Kror zôngx ziv thâuv cơưv xòe zos lênhx tưs cux pâuz tâu sêi, taz sik kror phiv liv zos uô chak cov đhiê tâu chor pax vuôs xòe co jông, sơưr đơưk nhiêv. Pâuz li co pos Siêng tưz sir jos kriê trâu chor nhuôs zâu chiê chor nhuôs muôx six hơưv pâuz thiêz txơưx tâu chor jax pax vuôs xòe co. Đros thiêz têx jax pax vuôs xòe lâul, pos Siêng tsuv kriê trâu chor nhuôs zâu pâuz cov tsênhz yênhx kror lơưv mak li kriê jux juk đhiê cov zos. Txos nhiv no, nhoz xã Nghĩa An, qơư pos Siêng uô nênhx nhoz muôx yênhx châuv lênhx nhuôs zâu pâuz xòe jông, chor hluôk nxêik Thái mak lênhx tưs cux pâuz. . Lường Thị Hằng, jok Đêu 2, xã Nghĩa An, thị xã Nghĩa Lộ puz pâuz:

“Xuz thơưx cơưv cux phiv liv hênhr taz sik tâu pos Siêng kriê iz kro jux juk viv li cur cux cơưv tâu. Thâuv ntêx no mak muôx tsơưs nênhs cơưv xưz, nhiv no mak muôx chôngz nênhs tuôx cơưv. Pêz lok six shir phaz viv tâu cơưv zuk mênhx cxưx lok chor vênhx huôv jông”.

Đros zuk têx gôngr côngv hâur tuôr chiê, phuôx huiz têx kror jông hâur vênhx huôv mênhx cxưx Thái, pos Điêu Thị Siêng tưz tâu khơưk kruô zos Nghệ nhân dân gia ntâu shông lok no. Txơưv muôx ntâu hâux lưv hâur nriêr têx ntâuz ntơưr phưx vưv trâu tuôr chiê, kruôz kriê, taz sik txos thâuv chêix ntux yiêz lok, pos Điêu Thị Siêng cux tsênhv sir jos hu têx gâux đros siêz xar txos sơưr đơưk muôx luz nênhx tsâu sor thiêz shir phaz./.

(Đinh Tuấn-Lik Thox cxêik nhênhv)