Nênhs nhênhz chơưv viện kho moz tsiêx cxu kriê tsưr ziv qênhz pov chaz hâur têx grêix buô

Đros thiêz têx chaz buô, qir tiv zos viv lênhx nênhs nox tsuv têx kê chaz buô muôx nhoz hâur têx jâuz mor. Đhâu thâuv nox lok sik grok tâu têx chaz, kê chaz muk hâur plaz, nưk zuôr đâus, huôv hloz ntêr jux juk tuôx, gak mul trâu têx hnhur mok, lix gak đhâu trâu cêr uô pa, muk hâur têx nyar thiêz lok nhoz trâu têx lênhs, hlưz hâu, kror muôs.....

Zos lênhx nênhs moz muôx chaz nhoz hâur hnhur, thâuv zak chaz lâuk ntơư tu, muôx têx zak chaz co lok tâu trâu ntơưv ndâux plaz, cux jông xưk li zuk nox tsuv chaz yiêz, viv li têx chaz, kê chaz zuôr lok six ntâu.

Chiê lênhx nênhs sir zôngv muôx têx pâuz tâu grêix buô muôx chaz lok tsi muôx, Tiến sỹ Nguyễn Thị Lan Anh heik, tsuv tiz jông seiz njiê têx grêix ntơưv hâur pâuk blêis, grêix ndêx puôz mak pâuz. Zos qênhz pov têx luz poz jông xưk li cxur blâuv đơưz, ntơư chênhr zos kê chaz thiêz nưk khênhr chêx tsôngk, nhoz yênhx têx poz hâur grêix. Muôx têx zos chaz ntâu, thâuv txiêr, lêis kror grêix li co, têx kê chaz zuôr pôngz iz đraz por tsês. Chênhr viv li, lênhx nênhs sir zôngv tsuv tiz jông seiz thâuv zuôr grêix.

Thâuv zuôr grêix lok, zos pov grêix muôx têx luz poz đơưz lox luôx li  hâu côngz mak ntơư chênhr zos grêix tưz trâus muôx chaz. Iz chas ntơư, zos pov hâur têx grêix muôx iz thôngx, têx nyi lox luôx cxur, đơưz lok sik mê njik đax lik, đơưz liêk nhoz đros têx thôngx grêix mak co zos grêix tưz trâus muôx chaz.

Cux lơưr Tiến sỹ Nguyễn Thị Lan Anh, no zos zav moz fênhx yax nhoz chor nênhs lâuk lok sik nhuôv zâu, muôx têx tuô chor chaz lox tsuôk iz hnuz xưz, hok tuô hur si têx kê mak tas nhos iz đraz hli. Têx lênhx uô niêv uô txir tsuv gra yuôx lok trâu mê nhuôv nox, tsi tas muk tsêr kho moz. Trâus tâu moz chaz buô mak kho tâu jông.

Tiến sỹ Nguyễn Thị Lan Anh heik, moz zuôr lok six riêz nênhs thâuv têx mê nhuôv chaz gak tâu đhâu trâu cêr uô pa, têx hlaz siêz hlaz njưk, mul trâu hâur têx nyar thiêz nhoz ntơưv têx lênhs, hlưz hâu, kror muôs. Têx nhuôv chaz muk trơưl nyar txos trâu lênhx nênhs têx cêr uô pa, kror muôs lok sik hlưz hâu thiêz zuôr hloz lox, muôx ntâu jux juk tuôx. Thiêz cux seiz chor chaz co nưk jông li chas mak muôx yưv têx moz nhiêk txơưr nhiêk tsi siz thôngx. Zos chaz nhoz hâur têx grêix zuôr pov grêix su têx luz poz mê, tơưr, lox luôx nôngz tâuv, khiêr  zênhr, tsi khâuk, tsi moz; zos tiêk chaz nhoz hâur hlưz hâu, lênhx nênhs moz muôx têx tuôs têk, tuôs tơư, tuôs iz saz chêr, heik lul tsi mênhx, tsi yuô ndo kaz jông lok sik moz tâuz hâu hênhr....; zos chaz nhoz hâur kror muôs muôx têx uô trâu lênhx nênhs tsi yuô pov cêr lok sik đil muôs.....

Taz sik, lênhx nênhs sir zôngv tsuv por hưv đas jos, tsi nox têx zav nox nhôngk li: Grêix kâuz, grêix tsi tâu siêr jông, jâuz nhôngk tsi taz por vêv xênhz. Seiz shuôs jông, lar heik zos nhoz têx thax tsav muôx lênhx nênhs trâul moz chaz buô. Tsi zus têx buô tso lav yar, seiz car, qênhz shuôs jông hâux lưv qêz suô, nzuôr, tu têx qơư tuô tsênhr buô cov đu lus, hur si./.