Tơdroăng tơkŭm po kơmăng (14/5) a Hngêi rơhdruê kân Hà Nội, mơhno tơdroăng tuăn pâ mơnê trâu hơngế ƀă tuăn pâ nhuô̆m tá kâi tối dêi kuăn pơlê lâp tơnêi têa ƀă Pôa Hồ Chí Minh, Kăn xiâm hnê ngăn tơnêi têa hneăng apoăng – Kăn ki kân rơkê păng ‘nâng, Ngế khên tơnôu pro tơleăng lĕm hdroâng mơngế, Ngế ki châ ô eăng khôi túa lĕm ki má môi.

Ing mâu tơdroăng ngê̆ thuât ki má môi, tơdroăng mơnhên hnoăng roh ton nah, râ troăng tơdjâ ƀă tơmeăm ki kơnía kân ki Pôa Hồ Chí Minh, Kăn xiâm hnê ngăn tơnêi têa hneăng apoăng lôi ăm kăch măng Việt Nam ƀă ăm tơdroăng mơnhông dêi hdroâng mơngế. Tơdroăng ngê̆ thuât châ klâ chiâng 3 tơdroăng ing um o kŭn Nguyễn Sinh Cung drêng ối kŭn nah hên tơdroăng ki pói vâ; Mâu kơteăng chêng Pôa prôk hluâ lâp kơpong ti tăng troăng tŏng gum tơnêi têa; Um méa Pôa Hồ rêh môi tiah kuăn pơlê há, ngiâ méa têm rơpiêt, rơkong tó lĕm ƀă kuăn pơlê, mâu lêng..., tâi tâng châ vêh mơhno ing tơdjêp pơla ngê̆ thuât mơđah tơbleăng ƀă mâu um ki xup, djâ troh tơdroăng ki châ hlo pêng păm tơdroăng tâ rơrêk, pro tâ tung hiâm mơno rêm ngế.