Yăo sư- Tiê̆n sih Nguyễn Xuân Thắng, kăn pơkuâ Học viện chính trị quốc gia Hồ Chí Minh, Kăn hnê ngăn Hô̆i đong Lĭ luâ̆n Tơnêi têa veăng ai mâ ƀă tơpui hnê mơhno Hneăng hôp. Jâ Võ Thị Ánh Xuân, phŏ kăn xiâm hnê ngăn tơnêi têa, phŏ kăn xiâm hnê ngăn má môi Hô̆i đong tơ’noăng khê̆n kơdeăn Tơnêi têa; rơtế ƀă 193 ngế kăn cho mâu ngế ki kơhnâ rơkê tung tơdroăng tơ’noăng pâ nhuô̆m tơnêi têa pơla hơnăm 2020 – 2025 dêi Học viện ƀă mâu hngêi trung chính trĭ kong pơlê, pơlê kong kân ối tung Tơnêi têa veăng ai mâ a Hneăng hôp.

Tơpui hnê mơhno ƀă tơbleăng tơdroăng tơ’noăng pơla hơnăm 2025 – 2030, Yăo sư- Tiê̆n sih Nguyễn Xuân Thắng pơkâ thế: Vâ pêi pro tro hnoăng cheăng kal kí châ pơcháu, pơkâ thế mâu khu pú hên, mâu ngế krê tung Học viê̆n xuân môi tiah mâu hngêi trung chính trĭ kong pơlê, pơlê kong kân ối tung Tơnêi têa kal pơtối mơdêk khôi hmâ tơ’noăng pâ nhuô̆m tơnêi têa, ivá rơdêi dêi khu pú hên ƀă túa pơkâ “Tơrŭm – Tơniăn – Kơtăng – Mơnhông” pêi pro tro tơdroăng “Tơ’noăng tơrŭm, pơhlêh nếo tơmiât pêi rơkê ăm Học viê̆n Chính trĭ quốc gia Hồ Chí Minh rơtế ƀă lâp tơnêi mot tung chal ki nếo”.