Tơdrêng ƀă tơdroăng ki mơnhông ‘na pêi chiâk pêi deăng tiô troăng hơlâ cheăng kơmăi kơmok, mơngế K’Ho a pơlê kân Lạc Dương hiăng kơdo mơ-eăm pêi lo liăn ngân ing tơdroăng ki mơđah tŏn chêng, pế drôu xiâm, kế kâ vâ kum mơđah tơbleăng ăm tơmối ôm hyô. Pôa Kră Jañ K’Mơ, ối a tôh kơphô̆ Đăng Ja Rít, pơlê kân Lạc Dương tối ăm ‘nâi: pakĭng tơdroăng ki châ xo liăn ngân ing mâu kơdrum kơchâi, reăng, kơphế ƀă mâu tơmeăm khoăng ki ê, tơdroăng ki tôu chêng dêi a rơpŏng hngêi dêi pôa xuân hiăng tơ’mot lối rơpâu ngế kuăn pơlê troh tơmâng ngăn, ing mê, pro pơxúa hên dêi rơpŏng hngêi, châ xo lối 100 rơtuh liăn.

  “Apoăng nah, á tá hâi teăm ‘nâi tơdroăng pro ôm hyô, tá hâi tơmiât troh tơdroăng rak vế ƀă pơtối mơdêk dêi khôi túa, lĕm tro dêi hdroâng kuăn ngo tơná, laga, ing tơnêi têa châ mơnhông tơtêk, mê ngin hiăng tơmiât troh tơdroăng pơtối mơdêk ‘na tơdroăng tôu chêng, tơdroăng ki rak vế hngêi trá, mâu prôa dêi kuăn ngo vâ koh tơdah mâu khu ki lăm pôu ngăn troh a pơlê cheăm pa kơdâm ngo Langbiang kố, vâ kum ăm tơmối i ro, mê ngin hiăng pro tiô vêa vong ki hmâ ‘mâi on a tơdế plông, tôu chêng prôk tâ tá, rơngê ting ting, kơhnhon xuăng, vâ ing mê ai tơdroăng ki hơniâp ro, hmâ dêi pó. Kơxô̆ liăn ki tơmối troh mot ôm hyô akố á xing xoăng ăm khu tŏn chêng, khu kơhnhon xuăng, ki u ối ngin pơtối mơ’no dêi tơdroăng ôm hyô ăm dêi rơpŏng hngêi. Mâu rơpŏng ki ê ki châ pêi lo liăn ngân ing tơdroăng mơđah tŏn chêng, vâi ối pêi lo hên luâ tâ rơpŏng á”.

Ti xê to rơpŏng pôa Krăjañ K’Mơ, hên vâi krâ-nhŏng o hdroâng K’Ho hiăng ‘nâi pơtối mơdêk dêi khôi túa vêa vong hdroâng kuăn ngo tơná. Pakĭng tơdroăng tôu chêng, kơhnhon xuăng mê, vâi krâ ối teăn hmôu, jiâ, rơmoăng, pế drôu xiâm, pơchene hmê kơchâi kâ tiô khôi túa, vêa vong kuăn ngo. Nâ Dàgout Groel ối a pơlê kân Lạc Dương tối ăm ‘nâi, la lâi ai khu tơmối troh pôu ngăn, ôm hyô akố nâ châ xo dêi lối 2 rơtuh liăn ing tơdroăng tê drôu xiâm. Nâ Dàgout Groel phiu ro tối:

“Drêng tôh chôu, ngin hmâ pế drôu xiâm ƀă prông tơxông vâ tơdah mâu tơmối mot ôm hyô, xua kố cho tơdroăng cheăng vâi krâ hiăng hnê ‘măn ăm sap ing nah, ôh tá chiâng lôi, pin pơkal athế rak vế ƀă mơnhông. Hâi ki lâi ai hên khu tơmối mot ôm hyô mê rơpŏng ngin châ xo ai dâng 2 troh 2 rơtuh 300 rơpâu liăn, tâng mâu rơnó ki ôh tá ai tơmối mot ôm hyô mê ngin tê tơmeăm ăm tơmối, ai mâu rơpŏng ki ‘nâ ing tơdroăng tê tơmeăm khoăng châ xo sap ing 1 rơtuh 500 troh a 2 rơtuh liăn rêm hâi”.

Mâu ki kơnía ing khôi túa, vêa vong dêi hdroâng kuăn ngo tơná, pơlê pơla mơngế K’Ho a pơlê kân Lạc Dương hiăng mơnhông chiâng kơvâ ôm hyô, tơdroăng tê mơdró, ing mê veăng kum hơ’lêh chía mơnhông tung tơdroăng rêh kâ ối. Pôa Lơ Mu Ha Pier, Kăn phŏ hnê ngăn Vi ƀan Măt trâ̆n tơnêi têa Việt Nam pơlê kân Lạc Dương vêh mơnhên tối: tơdroăng ki tô mơđah chêng koăng ăm tơmối tơmâng ngăn ti xê to châ pêi lo liăn ngân mê ối veăng rak vế, pơtối mơdêk tơmeăm khoăng ki kơnía dêi chêng koăng Tây Nguyên:

“Cho môi ngế ki châ kuăn pơlê loi nhoăm a pơlê cheăm dêi hdroâng kuăn ngo ƀă kong ngo, ngin phiu ro păng ‘nâng drêng châ hlo hên vâi krâ-nhŏng o a Tây Nguyên ngin hiăng ‘nâi ki kơnía mê khoh pơtối rak vế ƀă mơnhông khôi túa, vêa vong dêi chal vâi krâ roh nah, môi tiah: chêng koăng, teăn ếo pơtâk, pế drôu xiâm ƀă hên hĭn mâu tơdroăng ki ê vâ kum ăm tơmối mot ôm hyô châ hêi ro drêng vâi lăm troh a kong ngo Langbiang kố, châ ngăn, châ hlo khôi túa, vêa vong kuăn ngo troh ƀă nhŏng o rêm hdroâng mơngế, mê cho tơdroăng ki á pói rơhêng vâ vâi krâ-nhŏng o kuăn ngo a kong pơlê Lâm Đồng tối tơdjuôm ƀă kuăn ngo a chêng ngo Langbiang kố tối krê pơtối rak vế, pêi pro khôi túa, vêa vong ki mê”.

Dế nôkố, pơlê kân Lạc Dương, tơring Lạc Dương, kong pơlê Lâm Đồng ai tơ’nôm 11 tíu ki mơđah chêng koăng dêi mâu rơpŏng hngêi ƀă 4 kơpong ôm hyô. Rêm hơnăm, khu kăn pơkuâ ƀă kơvâ ngăn ‘na tơdroăng cheăng hiăng po mâu lâm hnê tŏn chêng tôu koăng vâ pơtối kring vế, rak ngăn ƀă pơtối mơdêk ki kơnía dêi khôi túa, vêa vong hdroâng kuăn ngo. Ing mê, kum vâi krâ-nhŏng o pơtối mơdêk ‘na pêi cheăng kâ ƀă tơdroăng cheăng ôm hyô, tê mơdró. Hơnăm nah, lâp tơring Lạc Dương hiăng koh tơdah lối 2 rơtuh 500 rơpâu ngế tơmối mot ôm hyô.

Ƀă troăng hơlâ kố, mơni tung la ngiâ ah tơdroăng rêh kâ ối dêi hdroâng K’Ho a chêng ngo Langbiang, pơlê kân Lạc Dương, tơring Lạc Dương kô pơtối châ mơnhông hên tâ.