Klêi kơ’nâi pơkâ Geneva (7/1954), tơnêi têa pơtân tro tơklâ, Khu xiâm kal kí pơkâ mơjiâng Khu râ kăn pêi cheăng lêng ki rơhêng vâ tối cho ƀă hnoăng po troăng tŏng kum ton xŏn pơla peăng Kơnhŏng tơnêi têa ƀă peăng Hdroh. Hâi lơ 19/5/1959 cho hâi hdró ki kal dêi tơdroăng po troăng Trường Sơn – troăng kân Hồ Chí Minh ƀă châ rah xo cho Hâi mơjiâng dêi Mô đô̆i Trường Sơn khên tơnôu.

Vâ pêi mơjiâng tơdroăng mê nah Trường Sơn khên tơnôu, chât rơpâu ngế kăn ƀô̆, mâu lêng, droh rơtăm djâ troăng ahdrối, kuăn pơlê ki veăng tơplâ hiăng pleăng rơxông hơnăm ối nếo, tung mê lối 2 rơpâu ngế kăn ƀô̆, mâu lêng, droh rơtăm djâ troăng ahdrối hiăng pleăng châ chăn, kơxêng, mơheăm chá, vâ chê 3 rơpâu ngế lêng, rơpâu ngế tro trếo ‘mêi da cam.

Xông tơpui akố, pôa Phạm Minh Chính, Ngế pro xiâm hnê ngăn Chin phuh mơnhên ƀă tối mơhno hiâm mơno pâ mơnê tơdroăng ki pleăng dêi châ chăn mơheăm chhá, pleăng hnoăng cheăng, veăng kum kân kĭn dêi mâu rơxông Mô đô̆i Trường Sơn. Ngế pro xiâm hnê ngăn tơnêi têa tối ăm ‘nâi, klêi kơ’nâi tơnêi têa môi tuăn, Mô đô̆i Trường Sơn châ troh pêi hnoăng cheăng mơjiâng cheăng kâ, pro hơlêm tơdroăng ki châi heăng tơplâ xâ.

Ƀinh đoân 12 châ mơjiâng tiô tơdroăng ki pơtối rak pêi tiô khu Mô đô̆i Trường Sơn. Ngế pro xiâm hnê ngăn tơnêi têa phiu ro hdrối tơdroăng mơnhông dêi Ƀinh đoân 12 – Kŏng ti xiâm Mơjiâng tơmeăm khoăng Trường Sơn tá mâu tơdroăng râ, pơkâ pêi, tơdroăng châ tơƀrê pêi pro hnoăng cheăng kal kí; pơtối mơnhên tíu cheăng, ki loi tơngah, inâi Trường Sơn, veăng tung tơdroăng mơnhông dêi tơnêi têa.