Ki nhên, kong pơlê hiăng tơdah 123.500 tơmối tung tơnêi têa ƀă lối 1.500 tơmối lâp plâi tơnêi, tâi tâng roh tơmối tâk lối 8% tâng pơchông ƀă roh kố hơnăm hdrối. Tâi tâng kơbong ối tơdâng dêi mâu tíu ăm ối châ dâng 75%. A mâu hngêi ăm tơmối kâ koi ối pơtê kơpong tíu xiâm pơlê kong kơdrâm Ƀuôn Ma Thuột ƀă mâu homestay kĭng têa kroăng, têa plông, tâi tâng xúa kơbong ối pơtê châ lối 90%.

Tâi tâng pêi lo liăn ôm hyô dêi kong pơlê Dak Lak roh kố châ 62,5 rơtal liăn. Tiô jâ Nguyễn Thụy Phương Hiếu, Kăn phŏ pơkuâ ‘na khôi túa lĕm tro, tơ’noăng ivá ƀă ôm hyô Dak Lak, kong pơlê ai hên tơmeăm vâ mơnhông mâu tơdroăng ôm hyô ngăn loăng pơlái kong kế, pơtê, ôm hyô châ tâ, ôm hyô pơlê pơla, ôm hyô ƀă pêi chiâk deăng.

Xua roh pơtê leh kố tro rơnó tô, kong prâi mâu hâi hiăng hluâ kong tô ó xua mê mâu tơdroăng ôm hyô kố cho tơdroăng ki rah xo má môi dêi hên tơmối ôm hyô.

Tung rôh leh lơ 30/4 ƀă lơ 1/5 hơnăm kố, pơlê kong kơdrâm Đà Lạt, kong pơlê Lâm Đồng tơ’mot lối 170.000 hdroh ngế, tâk vâ chê 42% tâng pơchông ƀă hơnăm nah. Klêi tăng, mâu veăng ăm koi pơtê riân a mâu hngêi ăm tơmối kâ koi ối pơtê sap 1-5 hơlŏng mê tung kong pơlê tung mâu hâi hdrối kố nah châ 80%, mâu tíu pơtê ối ki ê xuân ối rak a kơlo 75%. Tơdrêng ƀă ivá pêi cheăng ‘mâi rơnêu pro kơphô̆, mơdêk tơdroăng mơdró kâ ôm hyô, tung rôh leh kố pơlê kong kơdrâm Đà Lạt po mơhno túa lĕm tro, hơdruê xuăng, tơ’mot hên ngế troh ƀă ai tiô mơngế vâ hyô ngăn, pơtê ối dêi tơmối tung tơnêi têa ƀă kong têa ê.

Tung kơxô̆ 170 .000 tơmối troh ôm hyô, pơtê a pơlê kong kơdrâm Đà Lạt tung mâu hâi ki kố, ai 162 rơpâu 800 ngế tơmối tung tơnêi têa. Mơhé tơmối lâp plâi tơnêi troh ôh tá hên, bú tơ’mot châ 7 rơpâu 200 ngế la xuân tâk 60% tâng vâ pơchông ƀă hơnăm nah.