Jâ Vũ Thị Hương Giang, Kăn pơkuâ Thảo Cẩm Viên tối ăm ‘nâi:  tơ'noăng rôh kố châ tơkŭm po kân, ai lối 50 kơbong mơđah tơbleăng 149 mâu kơƀăn kâ chal krâ dê pái kơpong tơnêi, ing mê veăng kum mơđah tơbleăng túa lĕm tro kế kâ, ki xiâm dêi rêm kơpong.

Tơdroăng ki tí tăng ‘nâi kế kâ Việt Nam kô châ xoăng bro chiâng 3 kơpong Huế - Sài Gòn - Hà Nội ƀă mâu kơƀăn tiô khôi hmâ dêi kơpong tơnêi pơlê kong xiâm Huế ton nah, lơ mâu kế kâ ki kơhiâm dêi Sài Gòn ƀă hên mâu kế kâ ki kơhiâm dêi peăng Hdroh ƀă châ kâ mâu kơƀăn ki kơhiâm krê dêi pơlê kong xiâm Hà Nội, rơtế ƀă hên mâu kế kâ ki kơhiâm dêi kơpong tơnêi Tây Nguyên.

Tơdroăng kố ối ai veăng dêi mâu ngế ki rơkê pế pơchên bro kế kâ mơđah tơbleăng bro mâu kế kâ khôi hmâ Việt Nam. Tơ’noăng kế kâ pơxiâm ing hâi lơ 26/4 troh lơ 1/5. Jâ Vũ Thị Thương Giang ăm ‘nâi tơ’nôm:

“Ƀă inâi “Tơnêi têa tơrŭm chiâng môi”, ngin xo tơdroăng ki xiâm dêi rôh leh tơ’noăng kố cho kế kâ athế mơhno ki kơhiâm lĕm krê dêi mâu kơpong Kơnhŏng – Peăng Tơdế - Peăng Hdroh. Tơdroăng kố ai ki veăng dêi hên hĭn mâu vâi krâ ki rơkê, vâi veăng bro kơƀăn akố hlối ƀă hlối tơbleăng ăm mâu tơmối châ ‘nâi châ kâ”.