Klêi kơ’nâi Ngế xiâm pơkuâ  ‘na chiâk deăng ƀă mơnhông thôn pơlê hôp tơpui klêi ƀă hlối châ kĭ Pơkâ kơthô ƀă Khu xiâm ngăn tíu tê mơdró kăng kong dêi Sinuâ ‘na tơdroăng Việt Nam tê khu pâu yến ăm kong têa Sinuâ, kŏng ti yến sào Thành Dung, tơring Krông Pač, kong pơlê Dak Lak hiăng chêh hồ sơ tê pâu yến ăm kong têa ê ƀă troh khế 11/2023, Khu mơdró châ peăng Khu xiâm pơkuâ ngăn tê mơdró kăng kong Sinuâ vâ.

Tung rôh tê ăm kong têa ê ki apoăng, Kŏng ti tê khu tơmeăm 300 kĭ pâu Yến, ƀă yă 12 rơtal liăn. Lâp tung kong pơlê Dak Lak nôkố ai lối 1.000 rơpŏng păn chêm yến, ƀă dâng 1.300 rông yến. Tơdroăng tê ăm kong têa ê ki păng ‘nâng khu pâu yến ki apoăng dêi Dak Lak ai pơxúa kal khât xua Sinuâ cho kong têa ki rôe hên pâu yến tung lâp plâi tơnêi nốkô.

Tê ăm kong têa ê ki păng ‘nâng, kô kum khu mơdró păn yến sào dêi kong pơlê ai rôh vâ châ tê a kơchơ ki kân, hlối pro pơxúa cheăng kâ kân ăm mơngế ki păn yến ƀă mâu khu mơdró ki tê chêm yến.