A roh tơpui tơno, chât roh rơkong veăng tơpui tối dêi kăn ƀô̆, khu tơrŭm pêi chiâk deăng pơtroh Kăn hnê ngăn Vi ban kong pơlê Kon Tum tơkŭm tung 7 kơvâ ki xiâm, mê cho: tŏng kum tê tơmeăm; tŏng kum kơxô̆ liăn mung; pêt mơjiâng tơmeăm ing chiâk deăng; mơ’no liăn pro hngêi trăng troăng klông; troăng hơlâ ƀă kăn ƀô̆, khu tơrŭm kuăn pơlê pêi chiâk deăng; pro mơ-éa ƀă tŏng kum khoa hok kih thuât, hnê cheăng pêi.

Ƀă mâu tơdroăng ki nhên, môi tiah: tê tơmeăm pêi lo ing chiâk deăng, tơmeăm ếo pơtâk ki teăn; yă kế chĕm tung păn mơnăn mơnôa, phon rơvât tâk pro pá tung pêt mơjiâng tơmeăm khoăng... teăng mâ mâu khu cheăng, kơvâ cheăng kong pơlê Kon Tum hiăng tiâ inhên, tơdrêng amê hnê mơhno khu kuăn pơlê pêi chiâk deăng châ tŏng kum ƀă hdrê, kơxô̆ liăn, kih thuât mơdêk pêt mơjiâng tơmeăm mơnhông mơdêk.

Tiô Kăn hnê ngăn Vi ƀan kong pơlê Kon Tum Lê Ngọc Tuấn, klêi kơ’nâi Hneăng hôp tơpui tơno kong pơlê kô tơkŭm pêi pro mâu khu troăng pêi vâ tah lôi pá puât, tŏng kum kuăn pơlê mơdêk mơnhông cheăng kâ pêi chiâk deăng, thôn pơlê rĕng ƀă krá tơniăn.