Ngoh Phạm Đức Dậu ối a bêng Đoàn Kết cho ngế ki djâ troăng ahdrối djâ reăng Đào Nhật Tân ing pơlê kong kân Hà Nội mot tung Ƀuôn Hồ, Dak Lak pêt ing 10 hơnăm hdrối nah. Rơnó reăng hơnăm kố, rơpŏng ngoh hiăng ai 800 xiâm, tiô tối hdrối ngoh pêt dêi sap ing 400 troh a 600 rơpâu liăn 1 xiâm. Tiô ngoh Dậu tối ăm ‘nâi, pêt reăng đào ôh tá pá, la kal athế kơhnâ rak ngăn dêi đi đo. Vâ ga lo reăng klăng a rơnó Têt mê kal athế rak ngăn dêi i krâu, rak ki hơtô ăm xiâm loăng, rơvât phon tro rơnó, tro roh, ƀă hbrâ kơdê oâ hdrong, pơreăng tro tơdroăng ăm xiâm loăng ƀă hlá ga:

“Tơnêi khê bazan a Tây Nguyên rơbĕn, ôh tá khăng kơtô mê tơtro ƀă tơdroăng pêt reăng đào peăng kơnhŏng, xiâm loăng ga đi đo chiâng dâi lĕm. Bu kal pin pro ti lâi rơvât phon, xôh pơkeăng kơdê oâ hdrong tro rơnó mê ga kô lo reăng lĕm, tơ’mô. Hyôh kong prâi tiah nôkố loăng ga dâi lĕm, hnâng, lo reăng hên tê kô châ liăn hên vâ xah ôu kâ Têt, hơniâp ro dêi tung rơpŏng hngêi”.

Cho ngế ki ai pơlê xiâm a Hà Tĩnh hdrối nah, nôkố rêh ối a tơring Krông Pač cheăng kâ - rêh ối hiăng châ lối 10 hơnăm, ngoh Nguyễn Văn Tâm tối, hơnăm ki lâi ngoh xuân hmâ tí tăng lăm rôe reăng đào vâ xah ôm hêi a hâi Têt. Hdrê loăng đào ki pêt akố ki dâi lĕm ga ôh tá phá ki klâi ƀă loăng đào a Peăng Kơnhŏng, reăng tơpo hên, mơngiơk ga lĕm tum khê, tơkâng tơ’mô, la tê ƀă yă ki tơtro.

 “Yă tê reăng đào a pơlê kong krâm Ƀuôn Hồ ga rơpâ, reăng ga xuân lĕm. Reăng tơpo tro klăng a rơnó Têt vâ vâi krâ-nhŏng o rơnuâ tung mâu hâi Têt mê á xuân hiăng lăm rôe reăng kố. Tâng vâ pơchông ngăn ƀă reăng đào a Peăng Kơnhŏng, mê reăng đào akố xuân lĕm vâ tơdâng tơ’mô, ôh ti ai phá ki klâi”.

Dế nôkố, a pơlê kong krâm Ƀuon Hồ ai 36 rơpŏng pêt reăng đào ƀă hiăng tơrŭm mơjiâng Khu pêi cheăng tơkŭm, tâi tâng tơnêi deăng ki pêt reăng đào kố hiăng ai lối 17ha. Mâu ngế ki pêi kơdrum hơnăm kố tiô vâi tối kô mơ’no tê ai dâng 18 troh 20 rơpâu kông reăng đào, môi tiah Đào Nhật Tân, Đào Bích, Đào Phai ƀă Đào Tuyết. Tiô pôa Nguyễn Văn Thắng - Kăn pơkuâ Khu pêi cheăng tơrrŭm ‘na Mơdró kâ ƀă Tê rôe Reăng Đào Đoàn Kết tối, “Reăng đào Ƀuôn Hồ” dế nôkố hiăng châ mơnhên cho tơmeăm OCOP 3 hơlŏng ƀă dế kơdo mơ-eăm khom châ 4 hơlŏng vâ châ mơ’no tê tơngi kong têa ê:

“Khu pêi cheăng tơrŭm hiăng kĭ tơkêa krếo thế mâu ngế ki rơkê má môi ‘na tơdroăng hnê pêi pêt, rak ngăn reăng đào troh vâ kum hnê ăm kuăn pơlê, vâ kơ châ pêt mơjiâng reăng ki tơxâng ai tŭm tơdroăng vâ châ tê mơ’no tơngi kong têa ê, ƀă hnối tơbleăng mơhno troh lâp plâi tơnêi. Khu pêi cheăng tơrŭm xuân hnê tối ‘na kŏng ngê̆, hdrê pêt ăm kuăn pơlê a mâu kong pơlê ƀă kong pơlê Dak Lak, ngế ki lâi kal vâ kô pơrá châ tŏng kum vâ pêt mơjiâng tăng pêi lo liăn ngân”.

Tung hâi Leh mơhnhôk pêt loăng “Đi đo koh tơbâ hnoăng Pôa Hồ” hơnăm 2023 pơlê kong krâm Ƀuôn Hồ, kong pơlê Dak Lak hiăng pêt châ 400 xiâm reăng đào vâ pro rơnuâ, pro lĕm ăm troăng kơphô̆. Ki păng ‘nâng ăm pơlê kong krâm Ƀuôn Hồ ăm hlo, tíu ki kố ‘na hyôh kong prâi rơngiâp lĕm, tơnêi hơpok lĕm tơtro ƀă tơdroăng pêt reăng đào. Ki nhên, hiăng ai hên rơpŏng rêh ối a pơlê kong krâm Ƀuôn Hồ pêi pêt, rak ngăn ƀă chôa mơnhông pro kro mơdrŏng kơnôm ing tơdroăng tê reăng đào a roh Têt, rơngó hơngui troh.

Pôa Đặng Gia Duẩn - Kăn hnê ngăn Vi ƀan pơlê kong krâm Ƀuôn Hồ tối, ki păng ‘nâng ăm hlo akố, tíu ki kố hyôh kong prâi ga tơtro, tơnêi tíu hơpok lĕm tơtro ƀă tơdroăng pêt reăng đào. Hiăng ai hên rơpŏng hngêi rêh ối a pơlê kong krâm Ƀuôn Hồ pêt ƀă chôa ‘lâng pro kro ing tơdroăng tê reăng đào a rơnó Têt, rơngó hơngui troh. Xua ti mê, tơdroăng ki mơhnhôk pêt vâ chê 400 xiâm loăng đào cho tơdroăng cheăng ki nếo,po troăng prôk ki nếo ăm kuăn pơlê châ mơnhông tơdroăng rêh kâ ối. Ƀuôn Hồ kô ai môi to troăng ki to reăng đào, cho tíu ki vâ xup um a rơnó hơngui kố ah. Drêng mê, vâi krâ-nhŏng o kô ai ivá, ai roh tơ’lêi vâ po rơdâ tơnêi tíu, chiâk deăng. Kố cho roh ki pơxiâm vâ mơdêk tơdroăng mơjiâng inâi reăng đào Ƀuôn Hồ chiâng tơmeăm ki dó OCOP ƀă kô chiâng inâi krê xêh, veăng kum ăm pơlê kong krâm kô châ ai 10 tơmeăm khoăng OCOP a hơnăm 2025 ah.

Tung mâu hâi achê pơla kố ah, drêng hiăng ai tŭm tơmeăm, bê tơdroăng, pơlê kong krâm Ƀuôn Hồ kô tơkŭm po “Hâi leh reăng đào”, klêi mê, kô po “Leh tơbleăng reăng đào Ƀuôn Hồ” vâ to’mot hên khu ki mơ’no liăn cheăng ƀă mơnhông ôm hyô ăm pơlê kong krâm tung la ngiâ. Ki kal má môi, tơdroăng ki mơnhông pêt reăng đào kô mơjiâng chiâng túa lĕm tro krê xêh dêi môi kơpong ki lĕm ro, rơkê plĕng, tơrŭm nhŏng o.