Khu tĕn ếo pơtâk chal krâ ƀuôn Mùi 2, cheăm Čư̆ Né, tơring Krông Ƀuk, kong pơlê Dak Lak nôkố ai lối 20 ngế. Kố pơrá cho mâu ngế ki hiăng hriâm klêi hneăng hriâm tĕn ếo pơtâk xua Khu ngăn vâi kơdrâi tơring tơrŭm ƀă Tíu xiâm Hnê hriâm cheăng pêi - Giáo dục thường xuyên tơring Krông Ƀuk tơkŭm po a hơnăm 2017.

Klêi kơ’nâi hriâm cheăng, mâu nâ hiăng tơkŭm vâ mơjiâng khu tĕn, tăng tơmối roê. Nâ Hoàng Thị Niệm (hdroâng Tày), Tôh trương Tôh tĕn ếo pơtâk chal krâ ƀuôn Mùi 2 ăm ‘nâi, ƀă rêm đơn kok tĕn tơmeăm, tôh kô xo ƀă pơcháu ăm mâu ngế ki tĕn ƀă kơlo liăn tĕn ing 300 – 500 rơpâu liăn rêm to tơmeăm. Tơdroăng ki tĕn tiah hmâ tĕn tung pơla toh chôu la hiăng kum mâu vâi nâ o ai tơ’nôm liăn pêi lo, rế rak vế cheăng tĕn chal krâ.

“Tơná á mê hâk vâ ƀă cheăng tĕn ếo pơtâk hdroâng kuăn ngo dêi mơngế Rơđế. Mâu rôh ki ối xo xo, mâu hâi kong mêi mê xuân chiâng vâ tĕn vâ tăng tơ’nôm liăn. Nôkố tôh tĕn tơmeăm xuân pro tơ’lêi hlâu, tăng cheăng pêi ăm mâu vâi nâ o ai liăn pêi lo đi đo”.

Pơtối ƀlêi chiâng, hơnăm kố, tơring Krông Ƀuk pơtối po lâm hnê tơdroăng ki tĕn ếo pơtâk hneăng má 2. Lâm hriâm kố pơxiâm po a tơdế khế 3 hdrối kố nah, tơ’mot châ 35 ngế hriâm. Nâ H’Hà Kpă, hdroâng Rơđế, a ƀuôn Ktơng Drun, cheăm Čư̆ Né, tơring Krông Ƀuk tối:

“Rôh apoăng nếo mot hriâm mê hlo gá pá la drêng hiăng pơxiâm pêi mê xuân hiăng hmâ, hlo hâk vâ ƀă tơdroăng ki hriâm kố. Nôkố mâu nâ o hiăng hâk vâ, hâi ki lâi xuân lăm hriâm, xo ah hmôi drêng hiăng hriâm klêi chiâng tĕnmâu tơmeăm ăm dêi tơná ah, mê nếo xo ah hmôi tâng ai môi ai tíu tê, vâ tê mâu kế tơmeăm tơná tĕn tăng tơ’nôm liăn ăm dêi tơná pin hrê”.

Rơtế ƀă cheăng tĕn ếo pơtâk chal krâ, tung hơnăm kố, tơring Krông Ƀuk kô po lâm hnê cheăng ki â khế ăm lối 300 ngế hriâm ƀă mâu kơvâ cheăng ki pơrá phá dêi rơpó, mê cho: hâng pơklĕp meăm, krâ ‘măn on tơhrik têa, chêp hmân ếo, păn mơnăn mơnoâ, pêt kơxêt. Jâ Nguyễn Thị Thu Trang, kăn phŏ pơkuâ Tíu xiâm Hnê cheăng pêi – Yăo yuk thương xuên tơring Krông Ƀuk ăm ‘nâi, mâu kơvâ cheăng cheăm pơlê hiăng tơrŭm lăm ngăn, tơbleăng tơdroăng kal tơdroăng ki rơhêng vâ hriâm cheăng dêi kuăn pơlê vâ bro túa pơkâ hnê cheăng ăm tơtro:

“Mâu ngế hriâm hâk vâ khât veăng, pakĭng tơdroăng ki châ hnê cheăng tê kơtê mê mâu vâi o châ kum liăn kơjo. Ki hdrối tâ cho hnê ăm mâu vâi o ‘nâi cheăng vâ rak vế tơdroăng cheăng chal krâ dêi cheăm tơring. Mâu lâm kố cho hnê giáo dục thường xuyên ăm mâu vâi o dâng 3 khế cho mâu vâi o kô châ hbru ăm hlá mơ-éa mơnhên hriâm cheăng pêi”.

Tung lâp kong pơlê Dak Lak, ing hơnăm 2021 troh nôkố, kong pơlê hiăng hnê cheăng ăm lối 7 rơpâu ngế pêi cheăng thôn pơlê, tung mê ai lối 6 rơpâu ngế pêi cheăng cho hdroâng kuăn ngo. Tiô Khu ngăn Pêi cheăng, Mố đô̆i tro rong, rêh ối pơlê pơla kong pơlê Dak Lak, klêi kơ’nâi hnê, lối 80% ngế ki hriâm ai cheăng pêi nếo lơ châ hnê tơ’nôm rơkê ăm cheăng pêi ăm gá rơkê tâ, pêi châ liăn hên tâ.

Pôa Nguyễn Quang Thuân, kăn phŏ pơkuâ Khu ngăn cheăng pêi, mố đô̆i tro rong ƀă rêh ối pơlê pơla kong pơlê Dak Lak ăm ‘nâi, vâ hnoăng cheăng hnê cheăng pêi châ tơƀrê, tơdroăng hnê cheăng pêi kố châ mơjiâng tung tơdroăng ki séa ngăn tơdroăng ki rơhêng vâ hriâm dêi mâu ngế ki hriâm ƀă tơdroăng ki pơkâ thế dêi khu ki xúa mâu ngế pêi cheăng xuân môi tiah tơdroăng ki ai khât cheăng kâ rêh ối pơlê pơla dêi kong pơlê.

"Ngin xuân hiăng kĭ tơkêa tơdroăng kố ƀă mâu khu mơdró kâ tung, ƀă kong pơlê ki ê ki ai tơdroăng ki vâ xúa mâu ngế pêi cheăng; tơpu tơno, tơdroăng cheăng ƀă mâu hngêi trung trung kâp, kao đăng tung kong pơlê vâ thăm mơdêk tơdjêp thong tin, ăm mâu kơvâ cheăng ki vâi dế kal vâ hnê. Ƀă mâu ngế pêi cheăng ki tăng xêh tơdroăng cheăng mê ngin xuân hiăng pêi cheăng ƀă hngêi rak liăn tŏng kum rêh ối pơlê pơla. Tung túa pơkâ dêi rêm ngế pêi cheăng kô châ tŏng kum ăm mung xo kơxô̆ liăn ƀă dâng 50 rơtuh liăn tung môi ngế”.

Ing tơdroăng ki hnê cheăng pêi, kuăn pơlê a thôn pơlê a Dak Lak châ hbrâ rơnáu tŭm tơdroăng ‘na cheăng pêi ƀă ivá thưk hành, mơdêk ki rơkê dêi tơdroăng cheăng, kum vâi ai tơdroăng ƀă ai rôh tơ’lêi tăng tơdroăng cheăng pêi tơtro, pêi lo liăn. Tơdroăng ki hnê cheăng pêi tiô tơdroăng ki rơhêng vâ dêi ngế ki hriâm ƀă tung tơdroăng ki ai khât rêm tơring cheăm xuân hiăng veăng kum hơ’lêh tơdroăng cheăng pêi, tơdroăng cheăng kâ, pro ivá ăm mơnhông cheăng kâ rêh ối pơlê pơla.