A rôh hôp tơpui tơno, Ngế xiâm ngăn ‘na chiâk deăng ƀă mơnhông thôn pơlê Lê Minh Hoan ăm ‘nâi, pêi chiâk deăng, kuăn pơlê pêi chiâk, mơjiâng thôn pơlê nếo châ Đảng, Tơnêi têa ƀă Chin phuh  Việt Nam tối “cho ki pơxúa hlâu dêi tơnêi têa, kâi trâng râng dêi tơdroăng cheăng kâ’’.

Tung mê pêi lo báu phái chơ kơvâ pêi cheăng xiâm, ôh tá xê to kum rak tơniăn ‘na kế kâ ăm tơnêi têa mê ối veăng kum tung mơnhông cheăng kâ dêi tơnêi têa xuân môi tiah mơhno hnoăng cheăng dêi Việt Nam tung tơdroăng rak tơniăn ‘na báu phái, kế kâ lâp plâi tơnêi.

Vâ tơbleăng tơdroăng Tơkêa bro mơnhông po rơdâ 1 rơtuh ha báu phái ki krúa lĕm ƀă ‘no iâ tê têa ‘mêi, Việt Nam kal mơhnhôk tăng mâu khu xiâm ƀă ki rơkê kih thuât, môi tung mâu tơmeăm khoăng ki kal cho “Tơdroăng Hơ’lêh nếo Hriăn plĕng ‘na báu phái, kế kâ” a Việt Nam châ mơjiâng tiô hriăn plĕng dêi Hneăng hôp tơpui ‘na cheăng kâ lâp plâi tơnêi, ƀă tơdroăng pơkâ tơrŭm ƀă mâu khu cheăng hơ’lêh nếo tung tơnêi têa ƀă kong têa ê vâ mơdêk tơdroăng xúa kŏng ngê̆ kơxô̆ vâ mơnhông tơƀrê ki pơxúa tung pêi chiâk deăng ki rơkê plĕng.