Jâ Đinh Thị Ngoại, Kăn Chi hô̆i pơkuâ ngăn vâi kơdrâi pơlê Lơk, cheăm Nghĩa An, tơring Kƀang ăm ‘nâi, pêi pro tơdroăng tơdjuôm ivá mơjiâng thôn pơlê nếo, 5 hơnăm hdrối nah, vâi krâ nhŏng o tung pơlê veăng kum lối hrĭng hâi pêi cheăng ƀă lối 1 rơtal liăn, mơhnŏng ‘nhiê tah dêi mâu kơnâng vâ po rơdâ troăng prôk tung thôn pơlê, bro nếo 4 to troăng lăm ngi klâng. 5 rơpŏng kơtiê châ tŏng kum bro ăm hngêi ối.
Hơnăm 2022, pêi lo liăn rêm ngế châ 41 rơtuh liăn tung môi ngế, kơxô̆ rơpŏng kơtiê kơdroh hên, tung pơlê ôh tá ai xếo hngêi ki xi kơchoh. Jâ Đinh Thị Ngoại ăm ‘nâi:
“Tung tơdroăng pơkâ mơjiâng thôn pơlê nếo, vâi krâ nhŏng o tung pơlê Lơk hiăng kơhnâ veăng, pêi pro, tơrŭm ƀă dêi rơpó, mơjiâng bro troăng prôk ok ƀê tong, troăng prôk tung thôn pơlê. Klêi kơ’nâi xúa mâu khoa hok kih thuât tung pêi pêt kế tơmeăm khoăng mê pêi lo liăn dêi kuăn pơlê hiăng châ chía hên, pơlê krúa lĕm tâ, cheăng kâ mơnhông mơdêk tâ tâng pơchông ƀă hdrối nah”.
Pơlê Lơk cho 1 tung kơxô̆ 206 to thôn, pơlê hdroâng kuăn ngo a kong pơlê Gia Lai hiăng hơ’lêh mâu kơvâ cheăng drêng tơbleăng pêi pro pơkâ kơxô̆ 12 dêi Khu pơkuâ ngăn Đảng kong pơlê ‘na thăm mơdêk pơkuâ dêi rêm râ Đảng ‘na mơjiâng pơlê thôn pơlê nếo tung kuăn pơlê hdroâng kuăn ngo. Tiah mê, ƀă kơxô̆ liăn tơnêi têa ƀă kơxô̆ liăn veăng tơlo ing pơlê pơla vâ chê 1.500 rơtal liăn, rơtế ƀă tơdroăng ki veăng kum lối 96.500 hâi pêi cheăng, ƀă kuăn pơlê pleăng lối 400.000 met karê tơnêi.
Klêi kơ’nâi 5 hơnăm, nôkố lâp kong pơlê ai 110 to thôn, pơlê hdroâng kuăn ngo pêi klêi thôn pơlê nếo, tơdroăng rêh ối dêi vâi krâ nhŏng o rế hía rế châ mơdêk. Vâ pơtối mơdêk ki tơƀrê ing mâu kơxô̆ liăn veăng tơlo kum ing pơlê pơla kum kuăn pơlê kơdroh kơtiê krá ton, a Rôh hôp mơgêi 5 hơnăm pêi pro Pơkâ 12, pôa Hồ Văn Niên – Kăn pơkuâ hnê ngăn Đảng kong pơlê Gia Lai pơkâ thế:
“Khu pơkuâ tơdroăng kal kí athế veăng kum kơhnâ, tơbleăng tơdâng tơ’mô, tơƀrê, đi đo, pơtối ƀă pêi pro tơƀrê khât; mơhnhôk ƀă xúa tơƀrê, tơdroăng mơhnhôk tơlo mâu kơxô̆ liăn sap ing mâu tơdroăng pơkâ, tơdroăng tơkêa; kum kuăn pơlê châ xúa mâu kơxô̆ liăn mung. Mâu khu râ, kơvâ cheăng dêi kong pơlê teăm ‘nâi mâu tơdroăng ki xơpá, tơvâ vâ hnê lơ teăm pơkâ thế khu ki ai hnoăng pơkuâ séa ngăn, tŏng kum. Khŏm mơ-eăm pêi pro kơtăng tâ nếo, vâ tơƀrê dêi tơdroăng pơkâ 12 gá châ troh ƀă kuăn pơlê’.
Viết bình luận