Idrâi chêng chuât xơtó a xiâm loăng kân drêh ngiât pro tá troăng prôk Trần Quang Khải, kĭng Quảng trường 10/3, pơlê kong kơdrâm Ƀuôn Ma Thuột, kong pơlê Dak Lak rế rơngiâp tâ tung pơla hyôh kong prâi tôu mơdrăng ó tung mâu hâi pơtê pơla hdrối kố nah. Túa xuăng ki rơmuăn lĕm ƀă tơdrá chal krâ ki ro môi tiah ai ivá hrik pro kuăn pơlê ƀă tơmối ki prôk tơkâ luâ pơrá tot ngăn. Jâ Nguyễn Thị Oanh, tơmối ing kong pơlê Nam Định tối:

“Lăm akố hêi mê kơdrâ trâm vâi tŏn chêng koăng Tây Nguyên mê á ngăn hlối. Chêng koăng Tây Nguyên cho má môi, lâp tơnêi têa bu to a Tây Nguyên tê ai chêng koăng. Chêng koăng Tây Nguyên tíu lâi xuân ro”.

Tơdroăng ki mơđah tŏn chêng koăng ƀă trâm mâ ngê̆ thuât ƀă inâi “Đất nước trọn niềm vui” cho tơdroăng tơkŭm po dêi Tíu xiâm Mơhno túa lĕm tro - Tơ’noăng ivá pơlê kong kơdrâm Ƀuôn Ma Thuột tơkŭm po a Plông kân tíu xiâm pơlê kong kơdrâm klăng a rôh pơtê 30/4 ƀă 1/5 hơnăm kố.  Ƀă tơdroăng ki mơđah tŏn chêng koăng, rêi mâu proâ dêi mâu hdroâng kuăn ngo dêi mâu khu ngê̆ nhân hơnăm ối nếo dêi ƀuôn Ky, ƀuôn Kŏ Tam, Kâu lak ƀô̆ Hơdruê then pơlê kong kơdrâm Ƀuôn Ma Thuột, kơhnhon xuăng tơdjuôm dêi Kâu lak ƀô̆ Ếo xŏn Việt Nam kong pơlê Dak Lak, Khu kơhnhon xuăng Doremi Kid ƀă hên ki ê hiăng pro chiâng môi tơdroăng ngê̆ thuât ki ro. Pôa Trương Ngọc Bảy, a cheăm Ea Kuăng, tơring Krông Pač, kong pơlê Dak Lak troh ngăn tơdroăng kố hlo:

“Ai mâu hdroâng kuăn ngo, mơngế Rơđế, mơngế Tày ƀă mâu hdroâng kuăn ngo ki ê pơrá ai túa lĕm tro krê dêi vâi. Túa lĕm tro mê cho tơdroăng ki hâk tơngăm dêi kuăn pơlê, mê tơdroăng mơđah tơbleăng mâu túa lĕm tro  ăm ngin rế hía rế tơmâng xo túa lĕm tro châ po rơdâ tâ”.

Ôh ti xê to a Plông kân 10/3, tung rôh rôh pơtê leh 30/4 ƀă 1/5 pơla hdrối kố nah, hên kơpong ôm hyô a Dak Lak pơrá tơkŭm po mâu tơdroăng mơhno túa lĕm tro ngê̆ thuât djâ tơvế mơngiơk túa lĕm tro ngê̆ thuât Tây Nguyên, môi tiah: mơđah tơbleăng tŏn chêng koăng, hơdruê then prôa tĭnh, pro mâu proâ, ôu drôu xiâm, kâ kế kâ mâu hdroâng kuăn ngo Rơđế, Mnông, Lếo ƀă hên ki ê hiăng pro ăm tơmối châ mơnúa kâ, ngăn ƀă ôh tá kâi piu.

Ngoh Lý Thế Quân, tơmối ing Pơlê kong kân Hồ Chí Minh ăm ‘nâi, á ôh tá piu má môi cho tơdroăng ki tôu prôa tơnĭng ƀă proâ hdroâng kuăn ngo drêng troh a Đường sách cà phê Buôn Ma Thuột tung rôh ôm hyô troh a Dak Lak rôh kố:

“Á hlo rôh ki tôu prôa hmốu tơvât mơđah ƀă mâu proâ ki ê bro chiâng hơniâp ro mơhno túa lĕm tro kơpong tơnêi gá chía nhên, malối cho túa lĕm tro dêi mơngế Rơđế. Ing mâu idrâp hơdruê, rơngê, ting ting, ki xiâm cho mâu idrâp hơdruê dêi mâu ngế ki hơdruê, rơdêi, hơniâp, tro môi tiah vâi khĕn cho kuăn ngo kong. Tơdroăng kố á hlo a mâu tíu ki ê ôh ti ai”.

Ôh ti xê to tơmối ing mâu kong pơlê ki ê mê mâu kuăn pơlê ki dế rêh ối a Dak Lak xuân hlo kơdrâ hâk ƀă mâu tơdroăng mơhno túa lĕm tro ngê̆ thuât ki lĕm tro Tây Nguyên châ tơkŭm po tung mâu hâi hdrối kố nah. Nâ Trần Thị Đan Phương, a bêng Tân Lập, pơlê kong kơdrâm Ƀuôn Ma Thuột ăm ‘nâi:

“Môi rôh pơtê ki ton hâi la rơpŏng á rơhêng vâ ối a Ƀuôn Ma Thuột, ối a tung hngêi dêi tơná ƀă châ ngăn mâu túa lĕm tro tâ tá. Ƀă hlo tiah kố tâ tá pin ai hên tơdroăng ki hơniâp ro môi tiah mê. Rơhêng vâ Dak Lak pin kô ai mâu tơdroăng ki hơniâp ro môi tiah mê hên tâ nếo ăm hên rơpŏng, ai mâu rơpŏng ki ôh tá tơdroăng liăn ngân ôh tá ai hâi chôu ƀă ai mâu rơpŏng vâi rơhêng vâ tăng ‘nâi tơ’nôm mê xuân ôh tá khéa ƀă hlo ro, hơniâp drêng ối a hngêi”.

Cho môi kơpong tơnêi ki ai hên túa lĕm tro ƀă 49 hdroâng kuăn ngo rơtế rêh ối, pakĭng mâu tơdroăng ki pơxúa ‘na kế tơmeăm kong kế nhâ loăng ki ai xêh mê tơdroăng mơhno túa lĕm tro dêi mâu hdroâng kuăn ngo a kố cho tơdroăng ki xiâm bro châng túa lĕm krê dêi ôm hyô Dak Lak. Tí tăng mâu tơdroăng ki pơxúa mê, ôh ti xê to tung rôh leh pơla hdrối kố nah, mê mâu tíu pêi cheăng pro ôm hyô a Dak Lak tung pơla hdrối kố nah hiăng tơnôu bro chiâng mâu tơdroăng ki mơnúa ngăn hơniâp ro vâ tơ’mot ƀă râng chêng tơmối drêng troh ôm hyô a kong pơlê.

Ing mâu túa pơkâ kố chiâng ai mâu rôh ăm ôm hyô Tây Nguyên tí tăng ki lĕm ‘na túa lĕm tro pơlê pơla bro chiâng ivá krê ƀă mâu kơpong pơlê a kong ngo ki ai to khía ƀă tôu kố.