Xah prôk hêi drô troăng ƀê tong hlo tơpok to reăng ki pêt pơtăng  tơdrăng péa pâ kĭng troăng. Jâ Kpuih Hạnh, kăn hnê ngăn chi ƀô̆ hlối pro kăn thôn pơlê Neh Xo, cheăm Ia Tôr, tơring Chư Prông ăm ‘nâi, troăng to reăng kố xua mâu rơpŏng kuăn pơlê tung pơlê pêt a tơdế hơnăm nah ƀă cho môi pâ hnoăng pêi pro dêi tơdroăng mơjiâng thôn pơlê nếo a cheăm. Drêng ƀă ngiâ méa thôn pơlê cheăng kâ tơƀrê, krúa lĕm, châ ối má môi mơjiâng thôn pơlê nếo, tơdroăng rêh ối kuăn pơlê dêi pơlê Neh Xo xuân châ mơnhông tơƀrê nhên, bú ối 6 rơpŏng (tung tâi tâng kơxô̆ 150 rơpŏng) cho rơpŏng kơtiê.

Tiô jâ Kpuih  Hạnh ăm ‘nâi, ƀă tâi tâng mâu kuăn pơlê kuăn ngo môi tiah Neh Xo, vâ mơhnhôk kuăn pơlê rơtế tơrŭm môi tuăn môi mơno, mê tơdroăng pêi pro troăng lĕm djâ troăng lĕm adrối dêi kăn ƀô̆, đảng viên cho kal khât păng ‘nâng:

“Đảng viên prôk hdrối, kuăn pơlê prôk kơ’nâi. Kki hdrối đảng viên pêi pro hdrối mâu tơdroăng môi tiah pêt reăng pá kĭng péa pâ troăng, pro kơnâng, chiâ kloh ok xok, pro hngêi lăm dế, rak vế pêi pro tro tiô troăng rơhlâ, luât dêi tơnêi têa; hnê kuăn pơlê pêi cheăng kâ rơkê, mơdêk pê lo liăn, pơ’lêh tuăn tơmiât, túa pêi cheăng; ôh tá rĕng xo on veăng drêng tá hâi tro hơnăm, ăm kuăn lăm hriâm troh tá tui lui’’.

Môi tiah mê, a pơlê Bang, cheăm Ia Tôr, 11 ngế đảng viên tung chi ƀô̆ mơhnhôk rơpŏng hngêi, nhŏng o veăng tơlo liăn, ‘no hnoăng môi hâi pro troăng, ƀă pêi tro tiô mâu pơkâ pro krúa lĕm hyôh kong prâi, ‘na khăm pơlât, hnê hriâm.

Chi ƀô̆ thôn rơtế ƀă mâu kăn, Măt trâ̆n, khu grup a cheăm Ia Tôr mơhnhôk kuăn pơlê kơhnâ ‘mâi pêt kơphế, pôi tá ko loăng plâi ton hâi, hriâm ing dế rơpó toh têa ‘nâi kơdĭng ƀă xúa kơmăi kơmok tung pêi chiâk. Sap tơdế hơnăm 2023, hên hdrê loăng plâi kơnâ liăn kơtóu plâi hên, hlối ai yă kum kuăn pơlê ki pêi chiâk ai kế kâ ké ‘măn. Pôa Puih Pak, kuăn pơlê tung pơlê Bang ăm ‘nâi:

“Nah pá puât luâ tâ mê, nôkố hiăng chía iâ, mâu rơpŏng pêi cheăng kâ ai hngêi ối, ai rơxế, ôh tá ai xếo hngêi hlá xá môi tiah ton nah. Nôkố tơdroăng rêh ối hiăng xông tơƀrê tâ hdrối’’.

Nôkố, cheăm Ia Tôr, tơring Chư Prông ai lối 1.100 rơpŏng kuăn pơlê, ƀă lối 5 rơpâu 79 pơ’leăng mâ mơngế. Tung mê, kuăn ngo châ vâ chê 50%. Tung hên hơnăm mơjiâng thôn pơlê nếo, Đảng ủy cheăm hiăng pơkuâ, hnê mơhno, djâ troăng pêi pro ki tơtro sap ing cheăm troh thôn, pơlê, pơ’lêh nếo troăng pêi cheăng; tơkŭm hnê tối, mơhnhôk kuăn pơlê kơhnâ veăng pêi, chôa pê klêi mâu pơkâ.

Mơ’nui hơnăm 2023, cheăm pêi châ 19/19 tơdroăng pơkâ mơjiâng thôn pơlê nếo. Tŭm tơdroăng rêh ối Kuăn pơlê hiăng chôa pơ’lêh tơƀrê. Nôkố, kơxô̆ rơpŏng kơtiê ƀă vâ chê kơtiê tung lâp cheăm kơdroh ối pá xôp 8%; pê lo liăn rêm ngế châ 47 rơtuh liăn rêm hơnăm; tơdroăng hnê hriâm, khăm pơlât, rak ngăn ivá, rak hyôh kong prâi, pâ mâu ai hnoăng tơnêi têa, mơjiâng tơdroăng rêh ối túa lĕm tro a pơlê cheăm châ tơmâng khât; Tơdoăng kring tơniăn kal kí, bă rak tơniăn pơlê pơla cheăm bêng.

Pôa Nguyễn Quang Phương, Kăn phŏ hnê ngăn Đảng ủy cheăm Ia Tôr ăm ‘nâi, Đảng ƀô̆ pơtối xing xoăng kăn pơkuâ cheăng kal kí sap ing cheăm troh thôn, pơlê mơdêk tơƀrê mâu pơkâ mơjiâng thôn pơlê nếo. Tung mê, pơtối mơdêk hnoăng cheăng djâ troăng ahdrối dêi đảng viên vâ rơtế ƀă kuăn pơlê mơdêk pêi lo liăn ngân:

“Khu pơkuâ Đảng ủy cheăm hiăng mơjiâng pơkâ hnê hriâm, hriâm mâu pơkâ hnê mơhno ăm tơrêm ngế đảng viên, kăn ƀô̆ ƀă kuăn pơlê tung cheăm. Ing mê tơdroăng hriâm ƀă pêi pro tro tuăn mơno ki môi tiah Hồ Chí Minh hiăng hnê tối, mê rêm ngế đảng viên thế achê tâ ƀă kuăn pơlê,  tơmâng tơdroăng púi vâ dêi kuăn pơlê, tối ăm Đảng ủy, mâu kăn cheăm tơring”.

Ƀă ki môi tuăn dêi rơpó tung pêi pro mâu pơkâ, tơdroăng chêh tối, tơdroăng tơpui tơno, Đảng ủy, mâu kăn ƀă kuăn pơlê dế rơtế ƀă dêi rơpó mơjiâng tơdroăng rêh ối rế ton rế tơƀrê a tíu pơkăng kong Gia Lai.