A kơpong tơnêi ki ôh tá hơpok lĕm dêi cheăm Ea Ñuôl, tơring Ƀuôn Đôn, kong pơlê Dak Lak deăng pêt plâi rơkúa chí lối 1,5 ha dế châ pôa Lý Mạnh Hùng, rak ngăn, poê tơkâng vâ hbrâ ăm rơnó ai plâi ki nếo. Pôa Hùng ăm ‘nâi, Rơnó plâi rơkuâ chí ai plâi, drêng lăm a kơdrum, tơmối hâk vâ châ kâ to lâi xuân hôm ƀă tăng ‘nâi ‘na tung pơla pêt, rak ngăn, krí plâi, ngế ki pơkuâ kơdrum kố xuân phiu ro xua tê plâi rơkuâ chí a kơdrum ôh tá hía liăn mung ngế ki krí, ôh tá hía liăn chơ. Pôa Lý Mạnh Hùng tối:

“Ing rôh ki pêt plâi rơkuâ chí kố rế ăm rơmối ôm hyô ngăn ƀă rế kum ăm tơdroăng pêi lo liăn rơpŏng hngêi á hlo tơnêi ki ôh tá hơpok lĕm kố dêi Ƀuôn Đôn mê gá tro ƀă loăng plâi ki kố. Loăng plâi rơkuâ chí drêng châ pêt a Tây Nguyên gá tơ’lêi rak ngăn ai reăng tiô tơná vâ. Plâi á pêi lo châ tê tơdrêng ăm tơmối ki lăm hyô ngăn pro pơxúa ăm kơxô̆ liăn châ xo xuân chía hên tơniăn ăm rơpŏng hngêi”.

Ôh ti xê pêt mâu hdrê loăng tiah hmâ, ai mâu rơpŏng kuăn pơlê ki ‘nâ a tơring Ƀuôn Đôn hiăng khên tơnôu hơ’lêh pêt mâu hdrê loăng ki nếo. Ai mâu túa pơkâ pêt mơnúa hiăng pro pơxúa ‘na liăn ngân kơnâ ƀă mơhnhôk tơdroăng ki hâk vâ tăng ‘nâi dêi tơmối troh a kơdrum loăng plâi. Ki xiâm cho kơdrum plâi hơmu, lối 1.800 xiâm dêi pôa Đỗ Trọng Huế, a cheăm Ea Huar, tơring Ƀuôn Đôn.

Pôa Đỗ Trọng Huế ăm ‘nâi, maluâ nếo bu ai 100 xiâm ai plâi, la châ xo liăn dêi rơpŏng pôa ing plâi hơmu kố châ dâng 200 rơtuh liăn tung môi hơnăm. Ôh ti xê to tiah mê, hên ngế krếo phôn êng rơhêng vâ châ lăm troh tơdrêng vâ ngăn, roê ƀă hên ki ê.

“Drêng rơpŏng á pêt ƀă séa ngăn hdrê plâi hơmu kố hlo tơƀrê, xuân tê ăm kơchô mơdró tung mâu hơnăm achê kố. Rơpŏng ai tơbleăng tung măng pơlê pơla, ai hên ngế tăng troh ƀă châ ngăn. Xua mê rơpŏng á xuân ai troăng tơmiât vâ hơ’lêh pro ôm hyô pêi chiâk deăng mê dế pâ hlá mơ-éa phêp”.

Ing tơdroăng ki ai hlâu ki rơdêi dêi tơring ƀă hlo tơdroăng ki rơhêng vâ ôm hyô ngăn dêi tơmối rế hía rế hên. Pôa Trần Văn Toàn, Kăn pơkuâ Khu pêi cheăng tơrŭm Tê mơdró ôm hyô pêi chiâk deăng Phú Nông - Ƀuôn Đôn ăm ‘nâi, Khu pêi cheăng hiăng tơrŭm ƀă mâu rơpŏng kuăn pơlê tơkŭm mơjiâng trâu mâu túa păn, pêt tơmeăm ki ai ivá rơdêi dêi tơring, môi tiah: păn tơpái, păn í, păn ká, pêt krui kân, krui ngeăm, krui ƀŏng, ka kao, plâi rơkuâ chí ƀă hên ki ê vâ ăm tơmối lăm hyô ngăn.

“Pin athế hbrâ rơnáu ƀă athế hmâ xêh tâng pin bu pro to ôm hyô ki lôi lôi tơdroăng pêi chiâk deăng mê ki hên tơdroăng ki mơnúa ngăn kô ôh tá ai. Nôkố, tơmối xuân rế hơ’lêh tiô troăng ki pêt mơnúa ƀă tăng ‘nâi tung pơla tơdah xo mâu tơdroăng pơkâ”.

Pôa Y Si Thắt Ksơr, Kăn phŏ hnê ngăn Vi ƀan tơring Ƀuôn Đôn ăm ‘nâi: Tơring tơmâng ngăn khât troh tơdroăng mơjiâng ôm hyô ro ƀă pêi chiâk deăng, thôn pơlê. Tung Pơkâ Đảng ƀô̆ tơring pơla hơnăm 2020 – 2025 ai tối nhên tơdroăng kố. Tung pơla hdrối nah, Vi ƀan hnê ngăn tơring hiăng pơcháu ăm ƀơrô ngăn Chiâk deăng ƀă mơnhông thôn pơlê tơrŭm ƀă Ƀơrô ngăn túa lĕm tro tung tơdroăng pơkâ pêi tiô troăng rơdêi dêi tơring rah xo mâu túa pơkâ tro vâ pêi.

Rơtế amê, tơring Ƀuôn Đôn ối tơmâng ngăn tơdroăng mơjiâng khu pêi cheăng tơrŭm. Troh nôkố, lâp tơring ai 19 khu pêi cheăng tơrŭm dế pêi cheăng, tung mê ai hên khu pêi cheăng tơrŭm pêi cheăng tiô túa ôm hyô – pêi chiâk deăng. Pôa Y Si Thắt Ksơr ăm ‘nâi tơ’nôm:

“La ngiâ ah ngin kô ngăn tiô tơdroăng Pơkâ 88 dêi Kuô̆k hô̆i vâ kum mâu rơpŏng ki ai ivá vâ mơjiâng. Tơdrêng amê hối tơrŭm ƀă mâu khu pêi cheăng tơrŭm, malối cho a kơpong hdroâng kuăn ngo vâ rế hía rế hơ’lêh túa tơmiât, túa pêi ‘na mơjiâng ôm hyô tro ƀă pêi chiâk deăng, thôn pơlê ƀă hên ki ê. Rế tăng cheăng pêi ăm kuăn pơlê hdroâng kuăn ngo, tơdrêng amê hlối veăng kum hơ’lêh nếo mơjiâng tơtro ƀă tpnêi tơníu dêi tơring”.

Ƀă mâu troăng prôk ki nhên, tơring Ƀuôn Đôn, kong pơlê Dak Lak dế tơmiât troh bro hên mâu tơmeăm ôm hyô, tí tăng tâi tâng vâ ki rơdêi pêi chiâk deăng, pêi tơƀrê túa pơkâ ôm hyô tro ƀă chiâk deăng vâ tơ’mot tơmối tung tơnêi têa ƀă kong têa ê, veăng kum mơnhông cheăng kâ thôn pơlê kơpong tơkăng kong.