Hên tơmeăm OCOP dêi Dak Lak hiăng tối rơdêi ki lĕm, tơngah ôh ti xê ƀă mâu ngế ki roê kâ tung tơnêi têa mê ối mơ-eăm troh lâp plâi tơnêi. Ki hên môi tiah tơmeăm OCOP ki ai hlâu 5 hơlŏng kloăng mắc-ca Dak Lak ki lĕm dêi Kŏng ti Tơlo liăn Damaca Nguyên Phương, tơring Krông Năng. Tơkâ luâ mâu tơdroăng pá puât apoăng, ƀă tơdroăng ki mơ-eăm dêi tơná, hơnăm 2021, kloăng mắc-ca Dak Lak ki lĕm dêi kŏng ti hiăng châ mơnhên OCOP 4 hơlŏng.

Klêi kơ’nâi 3 hơnăm, tơkâ luâ hên rôh ki mơnhên tối kơtăng, nôkố tơmeăm kố hiăng châ mơnhên tối ƀă kơxô̆ điêm ki hên 100/100 điêm, ƀă chiâng tơmeăm ki ai hlâu 5 hơlŏng dêi kong pơlê. Tiô jâ Nguyễn Thị Thu Phương, Kăn pơkuâ Kŏng ti tơlo liăn Damaca Nguyên Phương, ing rôh tơmeăm châ mơnhên OCOP 4 hơlŏng, kơchơ tê mơdró châ po rơdâ tơdroăng ki tê.

“Tơmeăm dêi Damaca Nguyên Phương hăng ai mâ a lối 47 to kong pơlê pơlê kong kân dêi Nhuk. Ƀă kơchơ tê mơdró Hàn Quốc mê xuân châ mơ’no mâu lô tơmeăm ki apoăng vâ tê. Nôkố ngin dế pêi cheăng ƀă mâu kong têa ki ai hlâu môi tiah kong têa Sinuâ, mâu kong têa ki ê a mâu kong têa Arab mê tơngah tung la ngiâ ah kô châ xo tơdroăng ki lĕm tro ing mâu kong têa ki ki mê”.

Xuân cho môi tung mâu tơmeăm tung inâi tơmeăm ki ai hlâu 5 hơlŏng dêi Dak Lak veăng mơnhên tối tơmeăm OCOP râ tơnêi têa la ngiâ, Kơphế kơchiâk Kiên Cường dêi Kŏng ti pêi cheăng tiô rơnó môi tung khu Kiên Cường, pơlê kong kơdrâm Ƀuôn Ma Thuột, kong pơlê Dak Lak hiăng tơkâ luâ rôh ki pơtối pêi pro séa ngăn dêi tơná. Tơmeăm kố hiăng châ hbru ăm hlá mơ-eá mơnhên tơmeăm OCOP 4 hơlŏng ing hơnăm 2021.

Ƀă tơdroăng ki thế rế hía rế hên dêi mơngế ki roê kâ mê khu mơdró kâ athế pơtối hơ’lêh nếo mơdêk râ hơlŏng vâ pêi pro châ tơdroăng pơkâ thế dêi kơchơ tê mơdró tung tơnêi têa vâ tê ngi kong têa ê. Pôa Hoàng Mạnh Cường, ngế pơkuâ khu mơdró kâ ăm ‘nâi kơphế kơchiâk Kiên Cường hiăng châ tê ngi kong têa Nhuk, Hàn Quốc, Phlippines ƀă Australia.

“Rế hía pin athế rế pêi pro tro tâ nếo vâ hlo hnoăng cheăng, tíu ối ƀă tíu tâng dêi tơná a kơchơ tê mơdró. Má 2, tung roê xúa rế hía rế ai hên ngế ki vâ tơmâng troh ki dâi lĕm ing mâu hlá mơ-éa mơnhên. Mơnhên tơmeăm OCOP kố mơhno xuân môi tiah tối nhên ƀă kơchơ mơdró tiah kố, tâi tâng vâi athế tơhrâ ƀă athế pêi tơdrăng ƀă tro drêng vâi hiăng châ mơnhên. Ing mê, bro chiâng ai môi kơchơ mơdró athế ai tơdroăng ki tro tâ”.

Dak Lak nôkố ai 237 tơmeăm OCOP châ ing 3 troh 4 hơlŏng, 2 tơmeăm ki ai hlâu 5 hơlŏng. Tiô pôa Nguyễn Hoài Dương, Kăn pơkuâ Khu ngăn chiâk deăng ƀă Mơnhông thôn pơlê dêi kong pơlê, kố cho kơxô̆ ki ối iâ ƀă 1 kong pơlê ki ai hên ki pơxúa ‘na pêi chiâk deăng, thôn pơlê môi tiah Dak Lak. Vâ mơdêk tro tâ nếo ki ai hlâu, ki pơxúa kố, tung la ngiâ ah, Khu ngăn Chiâk deăng ƀă Mơnhông thôn pơlê kô tơrŭm ƀă mâu kơvâ cheăng ki ai tơdjâk troh pơtối tŏng kum mâu khu pơkuâ OCOP mơdêk ki dâ dêi tơmeăm hiăng ai, xuân môi tiah mơjiâng pro tơmeăm nếo tiô ing tơdroăng mơjiâng bro, uâ pơliê ƀă tê, pơkâ tơmiât châ inâi tơmeăm OCOP râ tơnêi têa.

“Khu ngăn chiâk deăng đi đo ai tơdroăng, troăng hơlâ, túa pơkâ vâ rơtế ƀă mâu cheăm tơring tŏng kum mơjiâng mâu kơpong pêt mơjiâng tơkŭm, tơkŭm pêt bro tiô troăng pơkâ tro chưng nhâ̆n, ai xiâm kối mơjiâng bro tơmiât troh rak vế tơniăn, rak vế kong prâi tơnêi tơníu, pêi pro châ tơdroăng rơhêng vâ mâu tơdroăng pơkâ thế ki kơtăng dêi mâu kong têa môi tiah Nhuk lơ Châu Âu”.

Chiâng hlo mâu khu pơkuâ OCOP Dak Lak hiăng hbrâ rơnáu tung tơdroăng ki ăm kế tơmeăm pêi lo ing chiâk deăng ing “pơlê cheăm” troh a kong têa ê. Dak Lak xuân tơngah mâu tơmeăm ki ai ivá rơdêi dêi kong pơlê môi tiah: kơphế, tiu, kơxu, báu phái, mắc-ca ƀă hên ki ê drêng châ tơmeăm OCOP 5 hơlŏng chiâng vâ xúa tro rôh tơ’lêi ing mâu tơkêa tê mơdró tơniăn krê chal nếo ki Việt Nam dế cho tơnêi têa vâ châ tơrŭm ƀă tê a kơchơ tê mơdró kong têa ê.