Măng tĭng hdrối, pôa Phan Đình Trạc, Ngế cheăng tung Khu xiâm pơkuâ tơdroăng kal kí, Kăn pơkuâ Tíu xiâm Đảng, Ngế xiâm pơkuâ tơdroăng cheăng Tơnêi têa rơtế ƀă Khu kăn Kuô̆k hô̆i kong pơlê Lâm Đồng hiăng trâm mâ kuăn pơlê cho kăn ƀô̆, kong chưk pơlê kong kơdrâm Đà Lạt. Pakĭng mâu rơkong tơpui tối ‘na tâ tá tơdroăng liăn khế, liăn tŏng kum tơ’nôm ăm kăn ƀô̆ cheăng a tơring cheăm ối iâ, kuăn pơlê pơlê kong kơdrâm Đà Lạt, kong pơlê Lâm Đồng tơmâng khât troh hnoăng cheăng hbrâ mơdât kâ kơluâ liăn ngân. Ngoh Lê Xuân Ninh tối ‘na tơdroăng tơmiât tơná:

 “Tung mâu hơnăm a chê kố, hnoăng cheăng hbrâ mơdât kâ kơluâ liăn ngân hlo tơƀrê khât. Laga, u lâi mê xuân ối ai mâu khu tơrŭm, mâu tíu pêi tá hâi tro. Pơkâ thế thăm mơdêk hnoăng cheăng hbrâ mơdât kâ kơluâ liăn ngân kố kơtăng tâ, tro tâ. Drêng pơkâ tơleăng mâu tơdroăng ki kâ kơluâ liăn ngân tơdroăng ki kân ‘na cheăng kâ, á pâ thế cho athế xo tơvêh tâi mâu kế tơmeăm tơnêi têa ki tro hía”.

Tơpui a rôh trâm mâ kuăn pơlê, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn tíu xiâm Đảng, Ngế xiâm pơkuâ cheăng Tơnêi têa tối tiah kố, mâu rơkong tơpui tối, pâ thế ƀă mâu rơkong veăng tơpui dêi kuăn pơlê gá tơdrăng khât. Khu kăn Kuô̆k hô̆i kong pơlê Lâm Đồng kô tơmâng xo, chêh tơkŭm vâ pơtroh ăm Kuô̆k hô̆i tung hneăng hôp la ngiâ. Krê hnoăng cheăng hbrâ mơdât kâ kơluâ, pôa Phan Đình Trạc ăm ‘nâi ing apoăng hơnăm troh nôkố, lâp tơnêi têa hiăng pêi pro pơsăm tối, séa ngăn lối 1.800 rôh, ƀă 3.493 ngế ki tro xôi tâng pơchông ƀă khế kố hơnăm nah. Hnoăng cheăng hbrâ mơdât kâ kơluâ dế pơtối châ tơbleăng pêi kơtăng, ôh tá pơtê, ôh ti a tíu lâi mơdât pêi pro tơdâng tơ’mô tâ.

Pôa Phan Đình Trạc tối:

 “Tung hên tơdroăng tơkêa ki achê kố, troăng ki séa ngăn, riân ngăn, mơdât mâu kế tơmeăm, tài khoản vâ rak vế pêi pro mâu tơdroăng pơkâ châ Khu hnê mơhno tơmâng ngăn hnê mơhno ing apoăng ƀă rế hía rế hlo tơƀrê. Tơdroăng ki nếo tung 4 khế apoăng hơnăm kố ‘na hbrâ mơdât kâ kơluâ liăn ngân cho ing tơdroăng ki pơsăm tối apoăng ‘na mâu tơdroăng ki pro xôi ‘na cheăng kâ liăn ngân môi tiah ôh tá vâ nâp hnoăng liăn mơhá, pro xôi pơkâ ‘na tơbriât tê tơmeăm, pro xôi pơkuâ ngăn xúa tơnêi tơníu, pro hía kế tơmeăm tơnêi têa kơ koan séa ngăn hiăng pêi pro nhên ƀă pơsăm tối mâu tơdroăng ki pro xô ‘na kâ kơluâ liăn ngân pêi pro tro tâ”.

Xuân tung măng tĭng hdrối, Khu kăn Kuô̆k hô̆i kong pơlê Dak Lak hiăng ai rôh pêi cheăng ƀă Vi ƀan hnê ngăn kong pơlê ƀă mâu khu râ kơvâ cheăng. A rôh pêi cheăng, teăng mâ kăn pơkuâ khu râ, kơvâ cheăng kong pơlê Dak Lak hiăng tối hên tơdroăng xơpá ƀă pơkâ thế Tơnêi têa séa ngăn, tŏng kum ăm mơnhông cheăng kâ rêh ối pơlê pơla a kong pơlê tung la ngiâ. Tung mê, tơdroăng ki kơjo kum cho mơjiâng bro troăng prôk tơdjêp kơpong, tơdjêp tung kơpong Tây Nguyên.

Pôa Võ Ngọc Tuyên, Kăn pơkuâ Khu pơkâ ƀă ‘No liăn cheăng kong pơlê Dak Lak pâ thế:

“Tung hneăng hôp kố Kuô̆k hô̆i kô pơkâ tơbleăng troăng ‘no liăn bro troăng Gia Nghĩa – Chơn Thành mê vâ mơdêk ki tơƀrê, péa cho pêi pro châ tơdroăng ki rơhêng vâ dêi kuăn pơlê Tây Nguyên xuân khên tơnôu pơkâ thế ăm mâu troăng prôk Ƀuôn Ma Thuột – Gia Lai ƀă Gia Lai – Gia Nghĩa rĕng bro hdrối hneăng 2030. Hdrối kố nah ai tung troăng pơkâ bro troăng kân Việt Nam ối tung pơla hneăng kơ’nâi hơnăm 2030. Pin kal séa ngăn kơjo bro hdrối hơnăm 2030 mê nếo tơdjêp tơdâng tơ’mô pơla mâu troăng kân tung kơpong Tây Nguyên”.

Tơdjâk troh pêi pro mâu tơdroăng pơkâ tơnêi têa, mâu rơkong pâ thế Kuô̆k hô̆i séa ngăn hnê mơhno mâu khu xiâm, kơvâ cheăng pơtối séa ngăn mâu hlá mơ-éa luât pơkâ vâ ví tơdroăng ki ôh tá tơdâng tơ’mô. Pôa Đỗ Đức Hà, Kăn phŏ pơkuâ Tíu chêh pro Luât Dak Lak tối nhên:

“Ki khât ‘na tơdroăng pơkâ tơnêi têa ‘na hiâm mơno gá ôh ti xê cho hlá mơ-éa luât pơkâ, laga vâ tơbleăng mê a kong pơlê athế pơkâ hlá luât pêi pro, ki tơdroăng kố tiô pơkâ nhên ngăn phá tơ-ê ƀă luât. Maluâ nôkố dế pêi pro mâu tơdroăng pơkâ Tơnêi têa pin athế rơnêu ăm tro vâ môi tuăn”.

A rôh pêi cheăng, mâu kăn xuân pâ thế hên tơdroăng ki kal tơdjâk troh mâu kơvâ cheăng: kế tơmeăm khoăng tung kơdâm tơnêi, ƀaoh hiêm, luât, hơ’lêh liăn khế, hngêi ối, tơdroăng ki pro pơxúa ăm mâu ngế pêi cheăng, ƀiên chê̆ ăm kơvâ hnê hriâm, hnoăng cheăng túa pơkâ, xúa tơnêi ƀă hên ki ê. Khu kăn Kuô̆k hô̆i kong pơlê Dak Lak tơmâng xo, chêh tơkŭm mâu rơkong pâ thế vâ pơtroh ăm Kuô̆k hô̆i ƀă mâu Khu xiâm kơvâ cheăng séa ngăn.