Klêi kơ’nâi ai hnê mơhno ing Khu pơkuâ vâi kơdrâi tơring, Khu pơkuâ vâi kơdrâi cheăm Cố Lẩu, tơring Bắc Hà hiăng rah xo mâu troăng pêi troăng reăng teăng nhâ ƀă hnoăng cheăng mơjiâng thôn pơlê nếo. Troăng pơlê, thôn ai hên tŭm túa reăng môi chât chôu, sam, cúc cánh bướm, chiều tím, ƀă hiá hé. Tâi tâng pro chiâng lĕm a kơpong pơlê xiâm kơpong kong ngo tơniăn lĕm, ôh tá pơ’lok pơ’lâ.

Nâ Lùng Thị Hà, cheăm Cốc Lẩu, tơring Bắc Hà, kong pơlê Lào Cai tối ăm ‘nâi:

‘’Nâ o ối tung thôn kơbố xuân hâk vâ, môi tuăn tơdroăng kố. Tối tơdjuôm kơbố xuân hâk vâ xing xoăng hnoăng cheăng, djâ dêi pó pêt reăng, rak ngăn kơhnâ khât. Tơmeăm tung mơjiâng thôn pơlê nếo kố ƀă ngin mê cho lĕm ‘nâng. A mâu troăng kân kơbố xuân hâk vâ lăm xo reăng djâ vêh pêt vâ troăng kân rế hía rế lĕm’’.

Kố bu cho môi tung iâ hrĭng km troăng thôn pơlê nếo châ rak ƀă po rơdâ troăng pêi kơpong troăng 3 krúa, kơpong troăng thôn pơlê nếo tung kong pơlê Lào Cai. Tơ’nôm 1 to reăng, kơdroh iâ môi kơtong xok pro rơngiâp mâu hâi kong tô ó, vâ troăng pơlê krúa lĕm. Ôh tá xê to tơdroăng, mê tơdroăng pêi kố hiăng chiâng tơdroăng hlê plĕng tơdjuôm, vâ xêh dêi nâ o vâi kơdrâi a tíu kố.

Pơlê Tổng Kim cho môi tung mâu pơlê pá puât má môi dêi cheăm Vĩnh Yên, tơring Bảo Yên ƀă 100% cho vâi krâ kuăn pơlê hdroâng kuăn ngo Mông rêh ối. Khu pơkuâ vâi kơdrâi tơring ƀă kong pơlê hiăng troh a hngêi pơtâng tối mơhnhôk mâu nâ o tung cheăm mơgrúa lĕm hngêi trăng dêi tơná hdrối, kơ’nâi mê troh troăng kân thôn, pơlê.

Nôkố, tơdroăng pêt reăng ƀă rak ngăn mâu troăng kân reăng chiâng tơdroăng pêi đi đo dêi nâ o tung cheăm. Nôkố ôh tá ai xếo tơdroăng hvât sok hmâng vâ a kĭng troăng.

Nâ Sùng Thị May tối ăm ‘nâi:

“A thôn pin thế pêi krúa lĕm ăm rak vế krúa lĕm cho rak vế ăm châ tơná, ăm pơlê xiâm tơná, cho rak ăm Đảng ƀă Tơnêi têa’’.

Nôkố, kong pơlê Lào Cai ai lối 250 troăng reăng vâi kơdrâi mơngiơk nếo thôn pơlê xiâm, troăng reăng thôn pơlê nếo, kơphô̆ on tơhrik troăng reăng ƀă tâi tâng kơnâ vâ chê 3 rơtal liăn, ôh tá riân mơ’no hnoăng pêi cheăng xua mâu khu pơkuâ vâi kơdrâi tung lâp kong pơlê pêi pro. Kố cho tơdroăng châ tơƀrê dêi tơdroăng tơmiât pêi rơkê tung tơdroăng pêi pro 3 krúa lĕm ƀă tơdroăng rak vế krúa lĕm kong prâi vâi kơdrâi mâu râ.

Tơdroăng pêt reăng kĭng troăng kân hiăng troh lâp lu troh rêm thôn, pơlê. Tơdroăng mơjiâng mâu troăng kân reăng hiăng pơ’lêh hlê plĕng dêi kuăn pơlê ‘na mơgrúa lĕm kong prâi, hlê plĕng pro lĕm drô thôn, pơlê châ mơdêk nhên.

Jâ Hà Thị Khánh Nguyệt, Kăn hnê ngăn Hô̆i đong Khu pơkuâ vâi kơdrâi kong pơlê Lào Cai tối ăm ‘nâi:

‘’Rơtế ƀă roh mơhnhôk mơjiâng rơpŏng ‘’5 ôh 3 krúa’’, Khu pơkuâ vâi kơdrâi mâu râ xuân hiăng thăm pơtâng tối, mơhnhôk khu pơkuâ vâi kơdrâi vâ pêi pro mâu pơkâ tung roh mơhnhôk kố. Roh mơhnhôk kố xuân hiăng châ kơdrâm khu vâi kơdrâi veăng hên khât, hlối pêi pro tơdroăng mơjiâng thôn pơlê nếo, ki rơhêng ƀă cheăm mơjiâng thôn pơlê nếo ‘ngêi tâ, tiô troăng tơdjâk nếo’’.

Pêt reăng drô kĭng troăng kân thôn pơlê dế cho troăng pêi ki châ tơƀrê, kum rak vế hâng lông troăng tơniăn lĕm, rak vế kong prâi,  pro krúa lĕm a thôn pơlê. Ƀă troăng tơmiât pêi, ôh tá kal tăng alâi hơngế, ki lĕm đi đo troh ing tơdroăng ki tơ’lêi hlâu má môi, achê má môi tung tơdroăng rêh ối, mâu troăng reăng thôn pơlê kơnâ tơ’lêi hlâu, cho mơnhên ăm tơdroăng pơ’lêh nếo, mơnhông mơdêk mê tơdroăng mơjiâng thôn pơlê nếo hiăng djâ ăm.

Ing pêt mơnúa a mâu kơpong kuăn pơlê rêh ối djâ troăng, nôkố mâu troăng pêi pêt reăng drô mâu troăng kân thôn pơlê kơpong kong ngo châ po rơdâ a hên cheăm, pơlê. A hên tíu, tơdroăng pêt ƀă rak ngăn reăng ối rơtế ƀă tơdroăng kơpuih văng, mơgrúa troăng pơlê, thôn pơlê. Ing mê, kum mâu cheăm, pơlê pêi pro tơtro mâu pơkâ ‘na kong prâi tung tơdroăng mơjiâng thôn pơlê nếo a kơpong thôn pơlê ƀă kong ngo.