Môi tung mâu tơdroăng cheăng ki xiâm tung hnoăng cheăng  “Hơnăm ối nếo tơdjuôm ivá mơjiâng thôn pơlê nếo” dêi droh rơtăm Gia Lai tơbleăng hơnăm 2023 mê cho droh rơtăm pro troăng prôk “Bâ - Ngiâ - Krúa - Lĕm” a pơlê Thơh Ga B, cheăm Čư̆ Don, tơring Čư̆ Pưh. Troăng ki kố xŏn vâ chê 1 km châ krâ 20 to pul on tơhrik kơtâu ƀă tôu mâ hâi ƀă pêt 200 xiâm loăng ngiât ƀă tâi tâng kơnâ lối 60 rơtuh liăn.

Troăng droh rơtăm bro “Bâ - Ngiât - Krúa - Lĕm” châ ăm prôk lăm hiăng kum pro hơ’lêh ngiâ méa kơpong thôn pơlê ƀă rak vế tơniăn gak kring, tơniăn troăng prôk a pơlê Thơh Ga B. Ngoh Lê Quốc Việt – Ngế ki pơkuâ ngăn Đoân Droh rơtăm cheăm Čư̆ Don, tơring Čư̆ Pưh ăm ‘nâi:

“Pêi pro tơdroăng hơnăm ối nếo mơjiâng thôn pơlê nếo a pơlê Thơh Ga B, Đoân Droh rơtăm cheăm mơhnhôk đoân viên droh rơtăm pêi pro mâu tơdroăng ki xoăng cheăng môi tiah pêt loăng drô troăng prôk, krâ ‘măn pul on tơhrik kơtâu ƀă hyôh tôu mâ hâi, pêt loăng ngiâ a mâu kơnâng ki nếo bro vâ mơjiâng mâu kơnâng ngiât lĕm. Mơhnhôk vâi krâ nhŏng o trâ văng nhâ a troăng ‘na ngiâ hngêi tơná vâ ăm gá phuâng lĕm krúa ngiât. Tung la ngiâ ah, Đoân Droh rơtăm cheăm pơtối mơhnhôk vâi krâ nhŏng o ƀă đoân viên droh rơtăm tơhrâ pêi pro mâu tơdroăng pơkâ vâ rak vế troăng prôk kố dêi droh rơtăm bâ ngiât, krúa lĕm”.

Hơnăm 2023, ƀă inâi “Hơnăm hơ’lêh kơxô̆ hiăng mơdêk rơdêi hnê tối, tŏng kum kuăn pơlê veăng hơ’lêh kơxô̆ ƀă hên tơdroăng pêi pro ai pơxúa môi tiah: Mơhno mâ ƀă tơbleăng mah QR ‘na pơxiâm vâ pêi cheăng ƀă tí tăng tơdroăng cheăng pêi; tơbleăng mâu túa pơkâ hơ’lêh kơxô̆ inâi, tíu ki pơchuât hlá mơ-éa kơxô̆ ƀă mâu túa pơkâ tôh kơphô̆ điê̆n tưh, kơpong ki xah hêi ôh ti xúa liăn mâ ƀă hên ki ê.

Nôkố, lâp kong pơlê ai 1.233 tôh hơ’lêh kơxô̆ pơlê pơla xua kăn ƀô̆ Đoân ki xiâm. Hơ’lêh kơxô̆ mâu tơdroăng cheăng dêi Đoân hiăng kum pro hơ’lêh tơdroăng pêi pro mâu hnoăng cheăng tiô Pơkâ kơxô̆ 924 dêi Ngế pro xiâm hnê ngăn Chin phuh ‘na “Kĭ pơkâ Tơdroăng hơ’lêh kơxô̆ tung mơjiâng thôn pơlê nếo, tơmiât troh thôn pơlê nếo rơkê pơla hơnăm 2021 – 2025”. Nâ Nguyễn Hoài Phương – Ngế ki pơkuâ ngăn Đoân Droh rơtăm tơring Čư̆ Pưh ăm ‘nâi:

“Vâ pêi pro inâi hnoăng cheăng hơnăm 2023, tơdroăng ki hơ’lêh kơxô̆ mâu tíu ối xuân pro pơxúa mâu tơdroăng ki tơ’lêi ăm vâi krâ nhŏng o kuăn pơlê tung tơring. Mâu vâi pú đoân viên, droh rơtăm mâu phô̆m vâ xông kân tung pơla lăm pôu mâu tíu ki xiâm gá tơ’lêi hlâu tí tăng ƀă ‘nâi nhên mâu tơdroăng kal a tíu ki mê xuân châ tơdroăng ki môi tuăn dêi vâi krâ nhŏng o kuăn pơlê xuân môi tiah mâu đoân viên droh rơtăm a tơring”.

Pêi pro mâu tơdroăng ki xoăng cheăng vâ tơdjuôm ivá mơjiâng thôn pơlê nếo, tung hơnăm 2023, Đoân Droh rơtăm kong pơlê Gia Lai hiăng tơbleăng bro 3 to kế tơmeăm droh rơtăm râ kong pơlê, 74 to kế tơmeăm râ tơring, 615 to kế tơmeăm râ cheăm ƀă 653 tơdroăng cheăng droh rơtăm veăng “Mơjiâng tơnêi tơníu bâ eăng – ngiât – krúa – lĕm, tơniăn”; tơdrêng amê hlối mơjiâng bro ƀă rơnêu 17 to troăng krâ ‘măn pul on a troăng pơlê; pêt nếo lối 996 rơpâu xiâm loăng ngiât ƀă hên ki ê.

Ngoh Đỗ Đức Thanh – Kăn phŏ pơkuâ ngăn Đoân Droh rơtăm kong pơlê Gia Lai mơnhên tối, tơdroăng tơdjuôm ivá dêi hơnăm ối nếo Gia Lai hiăng kum rơtế ƀă mâu cheăm, tơring pêi pro tơdroăng mơjiâng thôn pơlê nếo châ hên mâu tơdroăng pêi ki tơƀrê.

“Pơla hơnăm 2021 – 2025 ngin pơtối xúa hơ’lêh kơxô̆ ƀă mâu tơdroăng ki rơkê plĕng khoa hok kih thuât tung tơdroăng ki veăng mơjiâng thôn pơlê nếo. Pakĭng mê, tơdroăng ki tơrŭm ƀă rêm râ mâu kơvâ cheăng vâ pro mâu troăng hơlâ, mâu ivá cheăng vâ tŏng kum mâu vâi pú đoân viên, droh rơtăm cho tơdroăng ki tíu pêi cheăng rơhêng vâ tơmâng ngăn khât. Pakĭng pêi pro troăng hơlâ dêi tíu xiâm Đoân Droh rơtăm ngin tơmiât troh tơdroăng mơjiâng pơlê  cheăng ki tơniăn lĕm. Tơmiât troh mơjiâng 3 túa pơkâ ƀă tung hơnăm 2024 ngin mơjiâng bro a cheăm An Trung, tơring Kông Chro tung tơdroăng ki hnê mơhno dêi râ Đảng, ngin pơtối tŏng kum ăm mâu cheăm, tơring, tơkŭm mâu kơxô̆ liăn kum mâu cheăm tơring ki pêi klêi thôn pơlê nếo”.