Jâ Ka Hằng cho môi tung mâu ngế kuăn pơlê pêi chiâk a thôn Dàrahoa, cheăm Hiệp An, tơring Đức Trọng (Lâm Đồng) xuân pêi lo liăn hên tâ hơnăm nah, kơnôm ‘nâi xúa kơmăi kơmok ki dâi lĕm tung pêt kơchâi, reăng. Jâ Ka Hằng ăm ‘nâi, kơchơ tê mơdró reăng tung hơnăm 2023 iâ ngế rôe, yă hlối rơpâ tâ, la kơphế tê yă kơnâ. Tơ’nôm amê, kơnôm mơdêk ki dâi lĕm tung pêi pêt ƀă hlối krúa lĕm, mê ƀă 3 sao kơchâi, reăng ƀă kơphế, rơpŏng hngêi xuân châ xo dêi vâ châ tơdế rơtal liăn. Jâ Ka Hằng, tối:

“Hơnăm kố, mơhé cheăng kâ tơdjuôm ối xơpá la tơdroăng rêh ối dêi kuăn pơlê tíu kố xuân pơtối râk ki tơniăn tâ to lâi hơnăm hdrối. Kơnôm kuăn pơlê mơ-eăm hriâm, xúa khoa hok kih thuât tung pêi chiâk  deăng pêt kơchâi, reăng tiô mơngế ki vâ rôe hiăng tơhrâ hdrối vâ tơniăn ƀă mơdêk pê lo liăn. Nôkố hngêi ki lâi xuân châ ’no liăn mơjiâng pêi lĕm, troăng prôk hơlâ troăng pơlê xuân hiăng châ ok ƀê tông, tơdroăng rêh ối dêi kuăn pơlê hiăng mơnhông tơƀrê hên tâ tâng vâ pơchông ƀă hdrối nah”.

Hiệp An ai 2.460 rơpŏng, tung mê hdroâng kuăn ngo 37%. Lâp tung cheăm ai vâ chê 2.500ha tơnêi pêi chiâk, ki hên xuân pêi tiô troăng rơhlâ xúa kơmăi ki dâi lĕm mê kơxô̆ liăn châ xo tâng riân rêm kơpong tơnêi pêt châ 420 rơtuh liăn/ha/hơnăm. Nôkố hiăng ai 750 rơpŏng veăng pêi cheăng tơrŭm pêt kơchâi reăng ƀă tê tơmeăm pê lo ing chiâk deăng. Mơdêk kơlo pê lo riân rêm ngế châ vâ chê 70 rơtuh liăn/ngế/hơnăm. Troh nôkố, kơxô̆ rơpŏng kơtiê hên ó bú ối 19 rơpŏng, châ 0,58%.

Tiô pôa K’Lèn  krâ pơlê , ối a pơlê K’Long, ing tơdroăng ki pá puât tung pêi chiâk deăng nah, ki hên kơnôm to a báu ki pêt môi hơnăm môi rơnó, kuăn pơlê a kố hiăng khên tơnôu xúa ki rơkê dêi khoa hok kih thuât tung pêi pêt loăng plâi, pơ’lêh pêt kơchâi, reăng tŭm túa ki tê châ liăn hên. Kơnôm ing mê, tơdroăng rêh ối tơmeăm khoăng hiăng tơtêk ƀă tuăn ngôa kuăn pơlê hiăng tâ hơniâp ro hên tâ tâng vâ pơchông ñă hơnăm hdrối. Hngêi ki lâi xuân kơhnâ pêi cheăng kâ, ôh tá ai tuăn tơmiât kơnôm to a tơnêi têa veăng kum môi tiah hdrối nah. Cheăng kâ hiăng xông tơƀrê, kuăn pơlê hiăng hlê iâ ƀă hiăng ‘nâi tơdroăng cheăng tơná ƀă pơlê, ƀă thôn pơlê rế ton rế mơnhông tơƀrê. Tơdroăng tơrŭm dêi rơpó mơjiâng thôn pơlê nếo mơnhông tơƀrê tung rêh ối hiăng ƀă dế tơbleăng troh lâp lu tung rêm khu râ kuăn pơlê. Pôa K’Lèn krâ pơlê phiu ro  tối:

“Sap xúa mâu tơdroăng ki rơkê plĕng khoa hok kih thuât tung pêi chiâk deăng tiô troăng rơhlâ pêi chiâk xúa kơmăi ki dâi lĕm, tơdroăng cheăng kâ dêi kuăn pơlê hiăng mơnhông tơƀrê hên tâ hdrối. Tơdroăng rêh ối cheăng kâ pơ’lêh ƀă mơnhông tơƀrê, ki hlê plĕng ƀă hnoăng cheăng pêi tơdjuôm rơtế ƀă mâu kăn mơjiâng pơlê kro mơdrŏng hiăng châ kuăn pơlê  vâ pêi pro. Ngế ki lâi xuân hbrâ tí tăng ‘nâi mâu tơdroăng ki rơkê khoa hok kih thuât châ xúa tung pêi chiâk,  tơmâng khât ‘na cheăng kâ, hiăng mơdrŏng xuân ối vâ kro mơdrŏng tâ nếo”.

Pôa Nguyễn Văn Khanh, Kăn phŏ hnê ngăn Đảng ủy cheăm Hiệp An ăm ‘nâi, khoh ai tiah mê, cho môi tơdroăng mơ-eăm khât vâ hlê plĕng tung tơdroăng pơ’lêh tuăn tơmiât túa pêi cheăng dêi kuăn pơlê kuăn ngo K’Ho tối krê, kuăn pơlê tung cheăm tối tơdjuôm. Xua hiăng hlê tung tơdroăng xúa kơmăi kơmok ki dâi lĕm tung pêi chiâk deăng, tơmâng khât a tơdroăng pê lo tơmeăm ing chiâk deăng tiô mơngế vâ rôe hiăng chêh inâi tơhrâ hdrối, mê drêng trâm pá tơdjuôm dêi tơdroăng cheăng kâ ƀă liăn ôh tá kơnâ, kơxô̆ liăn pê lo dêi kuăn pơlê a Hiệp An xuân ối ra a kơlo ki tơniăn.

Kơnôm ing mê, mâu pơkâ ki kal tung pêi hnoăng cheăng mơnhông cheăng kâ-rêh ối, tơdroăng pơkâ mơjiâng thôn pơlê nếo dêi cheăm xuân tơniăn tiô tơdroăng hiăng pơkâ.

“Mơjiâng thôn pơlê nếo mơdêk tơƀrê mê cheăm hiăng tối tơbleăng ƀă pêi châ tơƀrê ki môi tuăn dêi kuăn pơlê. Kuăn pơlê hlê plĕng nhên tơdroăng kố ƀă mơ-eăm mơhông cheăng kâ-rêh ối, túa lem tro mơnhông tơƀrê. Mơhé hơnăm kố cheăng kâ xơpá tơdroăng  tơdroăng rêh ối dêi kuăn pơlê xuân châ tơniăn, tơmeăm khoăng châ mơjiâng pro hên. Mâu pơkâ ki kong pơlê tơbleăng pêi troh nôkố hiăng pêi tơƀrê. Tung hơnăm 2023 mê cheăm kô châ mơnhên tối thôn pơlê nếo mơnhông tơƀrê’’.

Tơdrêng ƀă ki rơdêi ‘na mơnhông pêi chiâk xúa kơmăi ki dâi lĕm, cheăm Hiệp An ối ai tơmeăm khoăng kân ‘na mơnhông ôm hyô ƀă tê mơdró cho kong pơlê ki ối a hơlâ troăng peăng hdroh vâ mot a pơlê kong kơdrâm Đà Lạt, kong pơlê Lâm Đồng ƀă hên kơpong, tíu ôm hyô ki kân dế chôa lâng mơnhông tơƀrê. Kố cho mâu tơdroăng ki tơ’lêi hlâu vâ cheăm Hiệp An pơtối hơ’lêh nếo, ôh tá pơtê mơnhông tơrêm hâi.