Cho kơpong tơdjêp kĭng pơla 2 to cheăm Dak Nuê ƀă Dak Liêng mê troăng kân kơxô̆ 27 cho troăng ki tơkâ luâ ƀuôn Tơ, cheăm Dak Liêng, tơring Lak, kong pơlê Dak Lak hdrối kố nah cho môi tíu ki ôh tá krúa ‘na tơdroăng ki vâi hvât, ok xok hmâng vâ xŏn vâ chê 100m.

Vâ rơnêu tơdroăng kố, droh rơtăm 2 to cheăm Dak Liêng ƀă Dak Nuê hiăng gô̆m văng ƀă prâu tah tơdrêng amê hlối krâ camera vâ ngăn teăm châ hlo ƀă pơxâu phak mâu ngế ki pro xôi. Tiô Nâ Sao Mai Len, ngế pơkuâ Đoân cheăm Dak Liêng, ai tơmiât “krâ camera vâ pôi tá ai xếo tơdroăng ki vâi hvât xok hmâng”, tơdroăng kố hiăng châ pro ing mơ’nui khế 7/2023, hlo tơƀrê khât.

“Hdrối nah mê ngin xuân hiăng krâ kơƀeăng tơbleăng “pôi tá hvât xok” la vâi ôh tá vâ hmâng. Klêi kơ’nâi ngin pêi pro tơdroăng ki krâ camera mê xuân ai 2 tơdroăng, tơdroăng má môi tâng hlo vâi hvât xok mê ngin hnê tối gô̆m xo xok ki vâi hvât mê. Tơdroăng ki má péa mê Vi ƀan hnê ngăn cheăm pơkâ pơxâu phâk, kơlo phâk cho 1 rơtuh liăn. Tối tơdjuôm klêi kơ’nâi ngin pêi pro túa pơkâ ki krâ camera mê hên kuăn pơlê hiăng hlê xuân hiăng kơdroh tơdroăng ki hvât xok hmâng vâ. Ki hlê plĕng dêi kuăn pơlê xuân hiăng hơ’lêh, ôh tá ai ngế ki lâi bro xôi xếo”.

Nâ Phan Thị Hoa, a ƀuôn Tơ, cheam Dak Liêng, rêh ối a chê mê, xuân tối mâu tơdroăng ki hlo hiăng hơ’lêh hên khât mê:

“Ing hâi ki châ vâi krâ camera tung kố hlo hiăng hơ’lêh khât, ki hên xok ôh ti hlo vâi hvât amê xếo. pro tiah lâi vâ kong prâi tơnêi tơníu, troăng prôk krúa lĕm mê á hbrâ rơnáu veăng, xua mê cho tơdroăng cheăng pêi ki pơxúa ăm pơlê pơla”.

Vâ pôi tá ai xếo khât tíu ki hvât xok a kơpong tơdjêp kĭng, đoân viên droh rơtăm 2 to cheăm Dak Liêng ƀă Dak Nuê ối pêt nhâ pôm prế kong ăm pá pâ kĭng troăng. Troh nôkố, kơpong kố hiăng pơxiâm ai mâu reăng tơpo lĕm hlá drêh mơnâ mâ ngăn.

Tiô ngoh Phạm Ngọc Thắng, ngế pơkuâ Đoân tơring Lak, krâ camera ƀă pêt reăng vâ vâi pôi tá hvât xok hmâng vâ cho túa pơkâ ki nếo, tơmiât rơkê, tro ƀă ki khât a cheăm. Ing mê kum mơdêk hnoăng cheăng dêi droh rơtăm tung hnoăng cheăng rak vế kong prâi tơnêi tơníu, pakĭng mâu tơdroăng ki lo lăm gô̆m văng xok rak vế kong prâi tơníu krúa lĕm, hâi tơdrốu pleăng dêi hnoăng cheăng lơ Hâi tĭng ngiât hiăng châ tơkŭm po ing hdrối nah troh nôkố.

Tơdroăng ki krâ camera ƀă xúa mâu pơkâ ôh ti xê vâ nâp liăn phâk la ing tơdroăng ki pơxâu phak mâu ngế ki pro xôi mê vâ djâ troăng ăm mâu ngế ki ê mê pro tơƀrê tâ tung tơdroăng tơdjâk troh kuăn pơlê, kum vâi hlê tâ tung tơdroăng ki gô̆m văng xok.

“Ing túa pơkâ môi tiah mê mê hlo gá tro ‘ló khât, đoân viên droh rơtăm chiâng vâ tŏng kum tung hnoăng cheăng rak vế kong prâi tơnêi tơníu. Tung la ngiâ ah, Khu pơkuâ ngăn Đoân tơring tiô tối hdrối kô tơbleăng tâi tâng a 11 to cheăm, pơlê kân, rêm to cheăm kô pro môi tíu. Klêi mê mâu cheăm kô tơrŭm xêh ƀă Khu pơkuâ ngăn mâu thôn, pơlê po rơdâ túa pơkâ kố. Krâ camera kố cho tơdroăng pêi ki apoăng chiâng vâ mơdêk ki hlê plĕng dêi kuăn pơlê, tơdrêng amê hlối xúa túa pơkâ ing mê kuăn pơlê kô hlê plĕng tâ. Xuân tơngah cho tơdroăng mơhnhôk mâu vâi pú hơnăm ối nếo đoân viên, droh rơtăm mơjiâng mâu khu pêi cheăng tơrŭm gô̆m văng xok, tâng châ môi tuăn dêi kuăn pơlê veăng mê kô rế tro tâ nếo”.

Xuân tiô ngoh Phạm Ngọc Thắng, túa tơmiât pêi krâ camera ƀă pêt reăng vâ vâi pôi tá hvât xok, maluâ hiăng hlo mơdêk ki pơxúa, la ôh ti kâi pơkâ tơleăng troh tui lui dêi tơdroăng. Pôi tá hvât xok a tíu kố, vâi krâ nhŏng o chiâng vâ hvât xok a tíu ki ê, xua nôkố hên pơlê, cheăm tung tơring tá hâi ai tíu ki ok xok tơkŭm ƀă tá hâi ai rơxế ki gô̆m chơ xok. Bu drêng tơdroăng ki gô̆m ‘măn, tơkŭm, prâu tah tâp kơđu xok châ pêi pro tơdâng tơ’mô, mâu camera, kơdrum reăng, tíu ki pêt nhâ pôm prế kong nếo ôh ti ai xếo tơdroăng ki vâi hvât xok nếo châ mơdêk pơ’lêh tơdroăng ki ton xŏn.