Mâu hâi mơ’nui hơnăm, vâi krâ nhŏng o thôn Chiềng ƀă thôn Đừng Nhạp, cheăm tơkăng kong Ia Lốp, tơring Ea Súp, kong pơlê Dak Lak phiu ro drêng hmâ troh a 18 chôu, troăng on tơhrik ki nếo châ mố đô̆i gak tơkăng kong krâ pul on chiâng bâ eăng lĕm tung lâp thôn. Pôa Lang Văn Tuyển, ngế ki pơkuâ chi ƀô̆ thôn Chiềng ăm ‘nâi, ki eăng bâ dêi on tơhrik a troăng hiăng bâ eăng khât, drêng vêh ing pêi chiâk troh a hngêi ngế ki lâi xuân ‘nâi vêh dêi hngêi ki mê dêi hdrối nah.

Teăng amê, ai on tơhrik a troăng, a kơxê măng vâi krâ nhŏng o lo a troăng, tơpui tơno, tó ƀă dêi rơpó hlo hơniâp ro khât, nhŏng o ki rêh ối a chê rế tơrŭm ƀă dêi rơpó tâ, tơdroăng ki prôk lăm xuân hlo tơniăn tâ há:

“Ai on tơhrik bâ eăng a mâu troăng prôk mê tơdroăng ki tơklâm kơtong a troăng prôk hiăng hlo kơdroh, troăng ki kố khế hơnăm bro gá hiăng ton, mê nôkố hiăng tơ’nhiê hên, nôkố ai pul on krâ ‘măn bâ eăng kố mê tơdroăng ki prôk lăm xuân tơ’lêi hlâu tâ. Má péa, cho tơdroăng ki gak kring tơniăn châ rak vế tâ. Troăng kố gá ai pơxúa khât ƀă vâi krâ nhŏng o vâi tơkôm troăng kố kô rĕng pro klêi”.

Thiê̆u tă Vũ Văn Dương, Chính trị viên phŏ Đông mố đô̆i gak tơkăng kong Ea Hleo ăm ‘nâi, Tơdroăng ‘Bâ eăng kơpong tơkăng kong” a thôn Chiềng ƀă thôn Đừng Nhạp cho kế tơmeăm bro ki má 4 xua Đông Mố đô̆i gak tơkăng kong Ea Hleo pơkuâ tơbleăng bro a cheăm Ia Lốp. Rêm to trăng ki bro ƀă meăm thĕp ƀă mâu pul on ki ‘no bâ eăng cho 200W, xúa on tơhrik kơtâu ƀă tô trâ mâ hâi, châ krâ bro bâ eăng tiô chôu pơkâ.

Nôkố, tíu pêi cheăng kố dế pơtối krếo thế mâu khu mơdró kâ, khu ki ai hiâm mơno hơ-ui veăng tơdjuôm ivá tơbleăng bro tơ’nôm mâu tíu ki krâ pul on bro bâ eăng a kơpong tơkăng kong, kum mơdêk cheăng kâ rêh ối pơlê pơla, rak vế tơniăn gâk kring a cheăm tơring:

“Tung la ngiâ ah, tíu pêi cheăng kố kô pơtối pêi pro tiô tơdroăng ki hnê mơhno dêi Đảng ủy, Khu pơkuâ Mố đô̆i gak tơkăng kong dêi kong pơlê xuân kô tơrŭm ƀă mâu khu râ, kơvâ cheăng, cheăm, tơring vâ krếo thế mâu khu tơrŭm, mâu khu ki ai hiâm mơno hơ-ui pơtroh bro tiah lâi rế ai hên rế tro mâu tíu ki krâ pul on bro bâ eăng kơpong tơkăng kong.

Xua troăng ki krâ pul on a cheăm thôn pơlê rế hía rế hiăng hlo tơ’nhiê, vâ rak tơniăn gak kring, tơniăn, veăng kum bro tơniăn a thôn pơlê mê ngin kô tơrŭm vâ mơjiâng bro kế ki bro bâ eăng kơpong tơkăng kong”.

Rơtế prôk ƀă mố đô̆i gâk tơkăng kong Dak Lak tung tơbleăng mâu tơdroăng ki krâ pul on bro bâ eăng a kơpong tơkăng kong tung pơla hdrối nah ai hên khu tơrŭm, mâu ngế krê ƀă mâu khu ki tŏng kum kế tơmeăm. Nâ Bùi Thị Nữ teăng mâ dêi khu tŏng kum kế tơmeăm NDC, lo ing Pơlê kong kân Hồ Chí Minh lăm troh a cheăm tơkăng kong Ia Lốp ăm ‘nâi, hlo tơdroăng ki pá puât dêi kuăn pơlê ƀă tơdroăng ki xơpá dêi mâu kăn ƀô̆, lêng krâ kơlŏng ngiât, mê khu kố hiăng ƀă dế mơhnhôk vâ tŏng kum tơ’nôm hên tơdroăng ki pêi pro ai pơxúa:

“Á hlo Mố đô̆i gak tơkăng kong mê gá lĕm tro khât ƀă đi đo rơtế prôk kum kuăn pơlê. Kuăn pơlê tíu tơkăng kong vâi xơpá khât, vâi rêh ối a kơpong xơpá ôh tá mơhúa môi tiah pin ối a pơlê kong kân ôh mê á rah xo kơpong tơkăng kong kố vâ kum vâi krâ nhŏng o môi iâ kế tơmeăm vâ vâi kơdroh iâ ki xơpá. Ƀă khu ngin kô rah xo Mố đô̆i gak tơkăng kong xua mâu vâi ngoh kố kơhnâ tŏng kum vâi krâ nhŏng o. Pakĭng tơdroăng ki bro bâ eăng kô ai hên mâu tơdroăng ki ê mê khu ngin kô xing xoăng hâi khế vâ pơtối séa ngăn”.

Klêi kơ’nâi 3 hơnăm tơbleăng tơdroăng “bâ eăng kơpong tíu tơkăng kong” troh nôkố, Mố đô̆i gak tơkăng kong dêi kong pơlê Dak Lak hiăng pro châ lối 10 to troăng ăm mâu thôn, pơlê a 4 to cheăm tơkăng kong dêi 2 tơring Ea Súp ƀă Ƀuôn Đôn, ƀă kơxô̆ liăn lối hrĭng rơtuh. Đăi tă Đỗ Quang Thấm, kăn phŏ pơkuâ hnê ngăn đảng Mố đô̆i gak tơkăng kong kong pơlê Dak Lak ăm ‘nâi, tơdroăng kố dế bro tơdjâk rơdêi, rơtế ƀă kế tơmeăm mơjiâng bro dêi mâu krâ kơlŏng ngiât mê hên khu tơrŭm, mâu ngế krê hiăng ƀă dế veăng kum pro hơ’lêh ngiâ méa thôn pơlê, mơjiâng thôn pơlê nếo a tíu tơkăng kong. Ing mê, kum hnoăng cheăng rak ngăn, rak vế hnoăng pơkuâ tơnêi tơníu, gak kring tíu tơkăng kong tơnêi têa tơniăn lĕm tâ.

“Pêi pro tơdroăng mơjiâng thôn pơlê nếo, mê ngin tơrŭm ƀă cheăm tơring tơbleăng túa pơkâ krâ pul on bro bâ eăng a kơpong tíu tơkăng kong. Nôkố ngin xuân hiăng tơbleăng mâu tơdroăng pơkâ a mâu cheăm tơkăng kong, veăng kum pêi pro tro hnoăng cheăng pơkâ mơjiâng thôn pơlê nếo. Ing mê, pêi pro tro hnoăng cheăng mơhnhôk, hnê tối kuăn pơlê pêi pro tro tơdroăng pơkâ dêi Đảng, luât dêi Tơnêi têa, malối cho mơdêk hnoăng cheăng dêi kuăn pơlê ƀă hnoăng cheăng mơjiâng, rak ngăn, rak vế hnoăng pơkuâ, gâk kring tíu tơkăng kong tơnêi têa”.

Mâu tíu ki bro bâ eăng kơpong tíu tơkăng kong dêi mố đô̆i gâk tơkăng kong dế bro pơxúa tơdroăng ki phiu ro ăm vâi krâ nhŏng o kơpong tơkăng kong kong pơlê Dak Lak. Ôh ti xê kum ăm ngiâ méa thôn pơlê tíu tơkăng hơ’lêh mơngiơk, mâu tơdroăng ki mê ối kum tơrŭm pơla khu lêng ƀă kuăn pơlê rế hía rế achê ƀă dêi rơpó tâ, tơdroăng rak ngăn, rak vế tíu tơkăng kong rế hía rế hlo tơƀrê tâ.