Kố cho tíu pêi cheăng râ tơring ki apoăng dêi kong pơlê Dak Lak châ mơnhên tối pê klêi tơdroăng mơjiâng thôn pơlê nếo pơla hơnăm 2016- 2020. Pơlê kong kơdrâm Ƀuôn Ma Thuột ai 21 tíu pêi cheăng xiâm ƀă 8 to cheăm dêi 13 to bêng, kơxô̆ pơ’leăng mâ kuăn pơlê lối 380 rơpâu ngế, mê cho 40 hdroâng kuăn ngo rơtế rêh ối.

Drêng tơbleăng pêi tơdroăng mơjiâng thôn pơlê nếo, pơxiâm ing mâu cheăm bú iâ. La ga, ƀă tơdroăng tơrŭm môi tuăn, mơ-eăm tơkâ luâ xơpá, pơloăng mơnúa, mơ-eăm dêi Đảng ƀô̆, mâu kăn ƀă kuăn pơlê dêi pơlê kong kơdrâm Ƀuôn Ma Thuột hiăng mơ-eăm vâ tiô tơdroăng tơƀrê tâi tâng. Hơnăm 2018, pơlê kong kơdrâm hiăng ai 8/8 to cheăm châ kăn xiâm hnê ngăn Vi ƀan kong pơlê Dak Lak pơkâ mơnhên cho cheăm mơjiâng thôn pơlê nếo, rĕng lối 2 hơnăm tâng vâ pơchông ƀă tơdroăng kơkâ.

Luâ 10 hơnăm pêi pro tiô tơdroăng mơjiâng thôn pơlê nếo, pơlê kong kơdrâm Ƀuôn Ma Thuột ai hên pơ’lêh luâ pơkâ, tâi tâng mâu troăng prôk tung pơlê kong kơdrâm châ tơniăn tiô pơkâ mơjiâng thôn pơlê nếo, pơlê kong kơdrâm Ƀuôn Ma Thuột xuân hiăng djâ troăng a hdrối tung kong pơlê ‘na mơnhông mơdêk pêi cheăng tơrŭm, tôh pêi cheăng tơrŭm ƀă mơnhông mơdêk mâu tơmeăm pêi lo OCOP. Chiâng pơlê kong kơdrâm Ƀuôn Ma Thuột mơ-eăm troh hơnăm 2025, ai 8/8 to cheăm châ mơnhên tối thôn pơlê cheăng kâ rêh ối tiô túa nếo.