Pêi pro tiô tơdroăng Tơkêa bro ‘’Pêt 1 rơtal xiâm loăng ngiât pơla hơnăm 2021-2025” dêi Ngế pro xiâm hnê ngăn Chin phuh, Lâm Đồng xo pêt 50 rơtuh xiâm loăng tŭm túa. Riân troh tâi hơnăm 2023, Lâm Đồng hiăng pêt 26,3 rơtuh xiâm loăng, châ 52,5% tiô pơkâ. Vâ tơniăn tơdroăng pêt loăng ngiât ki u ối, tung hơnăm 2024, Lâm Đồng pơkâ pêt lối 13,6 rơtuh xiâm loăng ngiât tung lâp kong pơlê.

Tơbleăng a leh mơhnhôk, pôa Nguyễn Thái Học, Kăn hnê ngăn Đảng ki pơtân dêi kong pơlê Lâm Đồng tối, rêm xiâm loăng ngiât pêt hâi kố kô  veăng ‘mâi mơnhông lĕm nhâ loăng kong kế hyôh kong prâi, mơdêk ki xâp rơngiâp lĕm dêi kong ƀă hbrâ ví hyôh kong prâi hơ‘lêh, môi tung mâu tơdroăng pơloăng mơnúa kân ki kuăn mơngế dế trâm. 

Klêi leh mơhnhôk, ai lối 1.000 ngế kăn ƀô̆, mâu kăn pơkuâ mâu kơ koan, mâu ngế pêi cheăng rêm kơ koan, mâu lêng tơplâ, kuăn pơlê ƀă mâu tơmối ki lăm ôm hyô hiăng veăng pêt 2.000 xiâm loăng hngó 3 kơtâ hlá ƀă 750 xiâm reăng mai anh đào pêt drô rơnâk văng Prenn Đà Lạt.