Khế 7 pơla hdrối kố nah, a kong pơlê Bình Định, Khu ki pêi dêi hnoăng cheăng dêi pôa Trần Lưu Quang, Ngế pro xiâm phŏ hnê ngăn tơnêi têa pêi cheăng tơdrêng ƀă ‘no tơdrêng ing troăng hyôh internet ƀă 19 to kong pơlê, pơlê kong kân kơpong peăng kơnhŏng Trung bộ, a kĭng têa kơxĭ peăng tơdế tơnêi têa ƀă Tây Nguyên ‘na tơdroăng ki pêi pro mâu Tơdroăng pơkâ dêi tơnêi têa.

Pơla hơnăm 2021 – 2025, Tơnêi têa pơcháu tâi tâng kơxô̆ liăn ‘no mơjiâng bro kế tơmeăm lối 39 rơpâu rơtal ăm mâu kong pơlê ối tung kơpong peăng kơnhŏng Trung bộ, a kĭng têa peăng tơdế tơnêi têa ƀă Tây Nguyên vâ pêi pro 3 tơdroăng pơkâ dêi tơnêi têa. Nôkố, 17/19 kong pơlê tung kơpong hiăng ‘no liăn kong pơlê vâ pêi pro mâu tơdroăng pơkâ Tơnêi têa.

Tung mê, pơlê kong kân Đà Nẵng hiăng ‘no lối 93% liăn kong pơlê. Mâu kong pơlê Nghệ An, Quảng Nam, Bình Định, Khánh Hòa, Lâm Đồng ối tung khu ki xiâm tung tơdroăng ki ‘no liăn lối 30%.

Tơpui a Rôh hôp, pôa Trần Lưu Quang, Ngế pro xiâm phŏ hnê ngăn tơnêi têa tối nhên, tơdroăng pơkâ tơnêi têa tơmiât troh tơdroăng ki kum ăm kuăn pơlê a kơpong thôn pơlê, kơpong hdroâng kuăn ngo ƀă rơpŏng ki xơpá cho môi tơdroăng pêi tơtro. Tâng pơchông ƀă hơnăm 2022, mâu khu xiâm kơvâ cheăng ƀă kong pơlê hiăng ai hên tơdroăng tŏng kum. Laga a mâu kong pơlê, tơdroăng ki ‘no liăn ăm tá 3 tơdroăng pơkâ dêi tơnêi têa bu châ dâng 8%.

Tung tơdroăng ki xơpá ‘na khế hơnăm, xuân môi tiah troăng tŏng kum ối ai tơdroăng ki tơvâ, pôa Trần Lưu Quang pơkâ thế mâu kong pơlê athế mơdêk khât hnoăng cheăng, hbrâ rơnáu ƀă khŏm mơ-eăm tâ tung tơbleăng mâu tơdroăng pơkâ Tơnêi têa.

“A tơnêi têa ngin kô pôu râng dêi hnoăng cheăng hdrối ƀă kô pơtối rơnêu, hnê mơhno rĕng má môi mâu tơdroăng ki vâi pú ối tơvâ tơvân. Peăng mâu vâi pú, á pơkâ thế pôu râng dêi hnoăng, hbrâ rơnáu ƀă kơhnâ tâ tung tơbleăng mâu tơdroăng cheăng, ki lâi ối tơvâ athế êng tơnêi têa ƀă êng mâu Khu xiâm kơvâ cheăng.

Á xuân pơkâ thế mâu khu xiâm kơvâ cheăng, pái kơ koan kố pơkuâ tơrŭm tro tâ mâu kong pơlê vâ teăm tơmâng mâu tơdroăng ki tơpui ‘na mâu tơdroăng ki tơvâ”.

Tiô Khu xiâm pơkâ ƀă ‘no liăn cheăng, nôkố mâu tơdroăng pơkâ Tơnêi têa ối xơpá, tơvâ tung tơdroăng pơkuâ, tơkŭm pêi pro. Ki nhên mâu tơdroăng kố châ kĭ, pơkâ kơxô̆ liăn xo hdrối klêi kơ’nâi hâi khế pơkâ kơxô̆ liăn ki krâ kơvâ hơnăm liăn Tơnêi têa pơla hơnăm 2021 – 2025 dêi mâu kong pơlê, xua mê, tơdroăng ki xing xoăng liăn vâ pêi mâu tơdroăng pơkâ tiô kơxô̆ pơkâ gá xơpá vâ tơniăn chiâng.

Kơxô̆ liăn ăm hnoăng cheăng châ pơcháu tiô rêm hơnăm ƀă xoăng tiô kơlo pro ăm kong pơlê xơpá tung tơdroăng mơnhên ki kal dêi hneăng pêi pro ƀă hơ’lêh kơxô̆ liăn dêi mâu tơdroăng pơkâ kal tung tơdroăng ki hmâ ƀă tơdroăng ki ai khât.

Pôa Trần Văn Sơn, ngế pơkuâ Ƀơrô cheăng Chin phuh ăm ‘nâi:

“Pái tơdroăng pơkâ dêi tơnêi têa, nôkố Chin phuh mơjiâng 26 khu tơrêm ngế cheăng tung Chin phuh pơkuâ xiâm lăm troh tơdrêng a rêm kong pơlê. Pơla hdrối nah Chin phuh pơkâ mơ’no 1 khế lăm troh tơdrêng vâ tŏng kum mâu tơdroăng ki xơpá. Xua nôkố lăm chu troh a kong pơlê hlo xơpá tơvâ khât mê athế tơkŭm tŏng kum, mê athế tŏng kum sap ing tơdroăng ki ai khât a mâu kong pơlê”.

Vâ pơtối mơdêk rĕng tơdroăng ki ‘no liăn pêi pro mâu tơdroăng pơkâ dêi tơnêi têa ƀă pêi pro tơƀrê Pơkâ kơxô̆ 100 dêi Hneăng hôp má 5 Kuô̆k hô̆i hneăng 15, Ngế pro xiâm hnê ngăn Chin phuh pơkâ thế, mâu khu xiâm, kong pơlê tiô troăng, hnoăng cheăng châ pơcháu tơdrêng tơrŭm ƀă Khu xiâm ngăn liăn ngân ƀă mâu khu xiâm, kơvâ cheăng, kơ koan pơkuâ tơdroăng tơkêa vâ tơbleăng kơlo liăn pêi cheăng hơnăm 2024 ƀă 2025 ăm mâu khu xiâm, kơ koan Tơnêi têa ƀă kong pơlê tro tơdroăng pơkâ a tơdroăng pơkâ 38 hơnăm 2023 dêi Chin phuh.

Vi ƀan hnê ngăn hdroâng kuăn ngo rĕng pơkuâ po, tơrŭm ƀă mâu khu xiâm, kơvâ cheăng, kơ koan pơkuâ tơdroăng tơkêa séa ngăn tâi tâng Tơdroăng pơkâ tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă kong ngo pơla hneăng má I; bro hồ sơ pơkâ mơ’no ‘mâi rơnêu tơdroăng Pơkâ kĭ pơkâ Tơdroăng tro tiô pơkâ, tơniăn, hlá mơ-éa chêh bro dêi luât ‘na ‘no liăn cheăng tơdjuôm; tơbleăng ăm Ngế pro xiâm hnê ngăn Chin phuh ƀă rơtế pơtroh ăm Khu xiâm pơkâ ƀă ‘no liăn cheăng tung khế 8 hơnăm 2023.

Khu xiâm ngăn liăn ngân rĕng po, tơrŭm ƀă mâu khu xiâm, kơ koan ki ai tơdjâk pro klêi tơdroăng ki rơnêu, ‘mot tơ’nôm mâu tơdroăng pơkâ ‘na kơxô̆ liăn ăm tơdroăng cheăng pêi pro mâu pơkâ dêi tơnêi têa.