Mâu khế mơ’nui hơnăm, tơdroăng pêi cheăng pêt mơjiâng tơmeăm a pơlê Đăk Xây, cheăm tơkăng kong Đăk Long, tơring Đăk Glei, kong pơlê Kon Tum pơtối  thâ. Nếo krí klêi dêi kơphế, 130 rơpŏng kuăn pơlê tung pơlê pơtối lâk dêi pôm loăng vâ teăm tê ăm hngêi kơmăi uâ mơdiê pro tơpoăng pôm. Pôa A Xôn, Kăn pơkuâ hnê ngăn Chi ƀô̆ pơlê Đăk Xây phiu ro tối ăm ‘nâi, pêt mơjiâng tơmeăm, tơdroăng rêh ối dêi vâi krâ kuăn pơlê hơnăm kố ai tơdroăng ki pơ’lêh hên kơnôm pêi tiô hnê mơhno mơjiâng thôn pơlê nếo dêi khu râ kăn pơkuâ ƀă kăn ƀô̆, mô đô̆i gak tơkăng kong Đông lêng Đăk Long:

“Khu râ kăn pơkuâ, mâu râ dêi cheăm pơtâng tối, hnê mơhno kuăn pơlê tung pơlê mâu tơdroăng pêi cheăng ki nhên vâ mơjiâng thôn pơlê nếo. Đông mô đô̆i gâk tơkăng kong Đăk Long pơtroh kăn ƀô̆, mâu mô đô̆i troh rêm rơpŏng hngêi hnê mơhno troăng pêt, rơvât phon rak ngăn rêm loăng plâi vâ châ tơƀrê cheăng kâ. Hơnăm kố vâi krâ kuăn pơlê phiu ro drêng kơphế ƀă pôm pơrá pêi châ hên. A kơpong tơkăng kong pá puât mê nếo hluâ môi hơnăm tơdroăng rêh ối pơ’lêh hên môi tiah kố cho phiu ro hên ‘nâng’’.

Đăk Long cho cheăm tơkăng kong achê kong têa pú hmâ Lếo ối tung rơpŏng pá puât dêi tơring Đăk Glei, kong pơlê Kon Tum. Pêi pro tơdroăng pơkâ xiâm tơnêi têa mơjiâng thôn pơlê nếo, tơkâ hluâ hên pá puât, troh tâi hơnăm 2022 cheăm châ 14/19 túa pơkâ cheăng.

Pôa Huỳnh Ngọc Ly, Kăn hnê ngăn Vi ƀan cheăm Đăk Long tối ăm ‘nâi, châ tơƀrê tiah kố kơnôm khu râ kăn pơkuâ cheăm hiăng mơnhông mơdêk hnoăng dêi kuăn pơlê tung mơjiâng thôn pơlê nếo.

‘’Pakĭng tơdroăng tơbleăng kum ăm Khu pơkuâ hnê ngăn Đảng, ăm khu râ kăn pơkuâ cheăm pêi pro hnoăng cheăng mơnhông mơdêk cheăng kâ – rêh ối pơlê pơla tơniăn cheăng lêng gâk kring, Đông lêng ối xing xoăng hnoăng cheăng ăm đảng viên ‘na tơdroăng pêi cheăng a mâu chi ƀô̆ a thôn, pơlê vâ teăm tơdrêng ‘nâi tơdroăng tơmiât, pói vâ, ai pơkâ troăng prôk la ngiâ, ai tơbleăng ƀă khu râ kăn pơkuâ hnê ngăn cheăng Đảng, khu râ kăn pơkuâ cheăm tung mơnhông mơdêk cheăng kâ.

Má péa nếo, cho troăng pêi kăn ƀô̆, mô đô̆i cho kuăn pơlê hdroâng kuăn ngo dêi Đông pro nhŏng o ƀă mâu rơpŏng kuăn pơlê tung cheăm vâ mơnhông mơdêk cheăng kâ rơpŏng mê. Mâu ngế ki ôh tá ai ivá tung pơlê pơla châ Đông lêng tơmâng hên ƀă pơtroh kăn ƀô̆ hnê mâu tơdroăng pêi cheăng ki nhên vâ mơnhông mơdêk cheăng kâ’’.

Hơnăm 2022, kong pơlê Kon Tum ai 7 cheăm châ plah thôn pơlê nếo, tung mê ai cheăm tơkăng kong Sa Loong, tơring Ngọc Hồi tơkăng ƀă kong têa pú hmâ Kul. Tung tơdroăng mơjiâng thôn pơlê nếo, kơnôm mơnhông hiâm mơno Rŭm môi tuăn, khu râ kăn pơkuâ, kuăn pơlê ƀă kăn ƀô̆ mâu mô đô̆i gâk tơkăng kong hiăng tơdjuôm, môi hiâm mơno tơleăng hên tơdroăng ki tô tung cheăm.

Pôa Nguyễn Hữu Bảng, Kăn hnê ngăn Vi ƀan cheăm Sa Loong mơnhên, vâ cheăm châ plah thôn pơlê nếo ai tơdroăng veăng kum kân kĭn dêi kăn ƀô̆, mô đô̆i Đông gâk tơkăng kong Sa Loong:

‘’Vâ ăm cheăm Sa Loong mơ’nui hơnăm 2022 châ plah thôn pơlê nếo, tung mâu hơnăm hiăng hluâ tơdroăng tơrŭm pơla Đông ƀă cheăm ngin hmâ tơpui ƀă dêi pó Đồng ƀă cheăm cho môi ƀă tung tơdroăng tơrŭm cho tro lĕm. Pói vâ mâu hơnăm pơtối tơdroăng tơrŭm kố kô troh lâp lu tâ nếo vâ tơdroăng mơnhông mơdêk cheăng kâ – rêh ối pơlê pơla, cheăng lêng tung cheăm châ tơniăn lĕm tâ’’.

Tơdjuôm ivá, môi hiâm mơno rơtế khu râ kăn pơkuâ, kuăn pơlê 13 cheăm tơkăng kong dêi kong pơlê Kon Tum mơjiâng thôn pơlê nếo, Khu xiâm pơkuâ Mô đô̆i gak tơkăng kong dêi kong pơlê Kon Tum pơtroh chât ngế kăn ƀô̆ lăm pêi cheăng ăm 11 cheăm; xing xoăng đảng viên a mâu đông veăng pêi cheăng a 71 chi ƀô̆ thôn; pro nhŏng o, pơkuâ lối 1.000 rơpŏng tung kơpong tơkăng kong; kum kuăn pơlê mơnhông mơdêk pêt mơjiâng tơmeăm, mơjiâng hngêi trăng, troăng klông ƀă rơpâu hâi pêi cheăng.

Mâu troăng pêi kum kuăn pơlê xăm kơklêa kơdroh kơtiê, mơjiâng thôn pơlê nếo châ tơƀrê hên pro pơ’lêh tơdroăng rêh ối ƀă ngiâ méa thôn pơlê tơkăng kong. Thiê̆u tă Nguyễn Doãn Hải, Cheăng kal kí phŏ Đông mô đô̆i gak tơkăng kong Sa Loong, tối ăm ‘nâi:

‘’Hdrối nah, kuăn pơlê tiô khôi túa ton bu chối, pêt môi hơnăm môi rơnó pêi lo ôh tá châ hên. Đông mô đô̆i gâk tơkăng kong kum kuăn pơlê troăng pêi klâng pêt báu môi hơnăm châ péa rơnó pêt châ hên. Khu pơkuâ hnê ngăn Đảng, Khu hnê mơhno Đông tơrŭm ƀă khu râ kăn pơkuâ, kăn ƀô̆ mô đô̆i chu kum kuăn pơlê xut tah hngêi pơtân rĕng kêi đeăng thôn pơlê nếo. Rơpŏng ki lâi ôh tá ai hnoăng tơnêi têa mê kăn ƀô̆ mô đô̆i kum hâi pêi cheăng vâ rơpŏng kơdroh môi iâ pá puât ‘na cheăng kâ’’.

Troh tâi hơnăm 2022, kong pơlê Kon Tum ai 43 cheăm châ plah thôn pơlê nếo. Tung mê krê troăng tơkăng kong xŏn lối 292 km tơkăng péa kong têa pú hmâ Lếo ƀă Kul ai lối 6 tung 13 cheăm châ plah thôn pơlê nếo, tung mê tơring Ngọc Hồi ai 5 cheăm ƀă tơring Ia H’Drai ai 1 cheăm châ plah thôn pơlê nếo. Tơdroăng pêi pro châ tơƀrê Pơkâ xiâm tơnêi têa mơjiâng thôn pơlê nếo dế kum 13 cheăm tơkăng kong, ối 4 tơring Đăk Glei, Ngọc Hồi, Sa Thầy ƀă Ia H’Drai dêi kong pơlê Kon Tum rế hía rế pơ’lêh tơdroăng rêh ối.