Tung hngêi ki nếo mĕn mơjiâng, ngoh Y Huô̆t, ối a pơlê Dak Gằn, cheăm Dak Gằn, tơring Dak Mil. kong pơlê Dak Nông hơniâp ro tối ăm ‘nâi, hơnăm nah xua kong mêi hên, tơ’lêi hlâu ăm vâi krâ - nhŏng o tung tơdroăng mơdâ pêt báu klâng, pêi pêt kơphế. Kơnôm kơhnâ hriâm tâp ƀă túa pêi cheăng kâ, rơpŏng ngoh hiăng pêi lo liăn tơniăn, châ rôe mâu kơmăi kơmok vâ xúa tung pêi chiâk pêi deăng, pêi pêt mâu tơmeăm vâ kum ăm dêi 2 ngế kuăn châ hriâm tŭm têk.

“Rơpŏng á ai 3 sao báu klâng, tâng vâ riân ngăn 1 rơnó pêi châ 30 kơxâk báu, rơpŏng ngin xuân bê kâ. Pakĭng mê, ối ai 2 ha kơphế, hơnăm nah nếo châ krí xo dêi 5 tâ̆n pơ’leăng. Rơpŏng á kơdo mơ-eăm mơnhông pêi cheăng kâ, mơnhông tơdroăng rêh ối tung rơpŏng hngêi, mơ’no rôe phon rơvât, rak ngăn hdrê loăng pêt vâ hơnăm kơ’nâi ah châ pêi lo liăn hên tâ”.

A kơpong ki tơkăng pơla Dak Mil prế Čư̆ Jut, ai hên tíu ki rơnâk, văng ngo, tơnêi hmốu, prêi, khăng khoăng, mê cheăm Dak Gằn tâng vâ tối cho kơpong ki ai tơnêi khăng prêa, kơtô má môi dêi kong pơlê Dak Nông. Pôa Y Krơt, kăn pơlê Dak Sra, cheăm Dak Gằn tối ăm ‘nâi, vâ kum kuăn pơlê tơniăn ăm tơdroăng rêh ối, khu ki hnê mơhnhôk pêi chiâk deăng rêm râ hiăng đi đo chu troh a pơlê hnê tối kuăn pơlê túa ki pêi pêt, rak ngăn, xôh pơkeăng kơdê hdrong ăm mâu hdrê loăng. Ki rơhêng vâ tối, tơdroăng tơrŭm cheăng ƀă khu kuăn pơkuâ ngăn thôn, pơlê hriăn tí tăng ‘nâi ‘na hyôh kong prâi, ngăn ing long Dô-ri, cheăm Dak Rla, drô têa krông Dak Gằn vâ kuăn pơlê hrik têa tôh ăm ƀăng klâng báu a rơnó tô mơdrăng.

“Ki pá dêi vâi krâ-nhŏng o mê cho tơnêi hmốu, prêi, pêt kơphế ôh tá bê têa vâ tôh, pêt plâi nong ga ngăn tiô kơ yă a kơchơ, pêt alâi, prá, to xuân pá há, ôh tá chiâng. La tâng vâ pơchông ngăn ƀă roh hdrối nah, mê nôkố, tơdroăng rêh ối hiăng chía tâ, ôh tá ai tơdroăng ki kơklêa, ôh tá ai tơdroăng ti ai hmân êó xâp. Ƀă kơnôm ing tơdroăng tŏng kum dêi tơnêi têa, vâi krâ xuân hiăng kơdo mơ-eăm, tŏng kum dêi pó, châ mung liăn ing hngêi rak liăn vâ mơ’no tung pêi chiâk pêi deăng, ing mê, tơdroăng rêh kâ ối xuân chiá tơniăn tâ iâ”.

Tiô pôa Y Hơn, Kăn phŏ hnê ngăn Hô̆i đong cheăm Dak Gằn ăm ‘nâi, lâp cheăm ai 15 to thôn, pơlê, ai 10 hdroâng kuăn ngo nhŏng o rơtế rêh ối, vâ chê tơdế cho vâi krâ, nhŏng o hdroâng kuăn ngo. Pakĭng lối 1 rơpâu 800 ha loăng kơphế, tiu, kơxu, vâi krâ, nhŏng o mâu hdroâng kuăn ngo tung cheăm hiăng mơnhông pêt loăng plâi kâ châ dâng 1 rơpâu 400 ha. Ki rơhêng vâ tối, ƀă tơnêi pêt loăng plâi nong vâ chê 600ha, Dak Gằn châ Vi ƀan hnê ngăn kong pơlê Dak Nông hdrối cho kơpong ki pêi chiâk pêi deăng xúa kơmăi kơmok ki dâi lĕm, mơnhông tơdroăng pêt loăng plâi nong vâ mơ’no tê tơngi kong têa ê.

Hơ’lêh hdrê loăng pêt tơtro ƀă hyôh kong prâi, tơnêi tíu, mê tơdroăng cheăng kâ, pêi lo kế tơmeăm dêi Dak Gằn rế hía rế châ mơnhông. Troh tâi hơnăm 2022, lâp cheăm ối 68 rơpŏng kơtiê, châ dâng 3% ƀă 234 rơpŏng vâ chê kơtiê (châ 10,5%). Tâng vâ riân ngăn rêm ngế pêi lo vâ chê 43 rơtuh liăn. Pôa Y Hơn vêh mơnhên tối, ôh tá pơtê tơdroăng ki kơdo mơ-eăm vâ tơkâ luâ xahpá a kơpong tơnêi tíu ki khăng khoăng, mê vâi krâ, nhŏng o mâu hdroâng kuăn ngo a Dak Gằn dế rơtế tơdjuôm ivá mơno ƀă tơnêi têa kơdo mơ-eăm pêi pro klêi 19 tơdroăng mơjiâng thôn pơlê nếo:

“Vâi krâ, nhŏng o tung thôn pơlê đi đo tơrŭm, rak vế tro tiô troăng tơdjâ, troăng hơlâ dêi Đảng, mơnhông pêi cheăng kâ tung rơpŏng hngêi krá tơniăn. Vâi krâ, nhŏng o rơtế dêi pó tŏng kum túa pêi cheăng kâ, xúa khoa hok kih thuât vâ pêi pêt kơphế, kơxu, plâi nong, plâi rơbá vâ plâi châ kơtốu hên, dâi lĕm. Vâi krâ xuân hiăng rơtế vâ môi tuăn tơmâng, pêi pro tiô tơdroăng ki khu kăn pơkuâ hnê ngăn khŏm troh a hơnăm 2023 cheăm Dak Gằn mơjiâng ƀlêi chiâng cheăm thôn pơlê nếo dêi tơring Dak Mil”.

Dế nốkố, kong pơlê Dak Nông hiăng hdró tơdroăng mơjiâng long têa Dak Gang a 2 tơring Dak Mil ƀă Čư̆ Jut, tíu ki kuăn pơlê Dak Gằn kô châ xúa. Kố cho tíu ki xiâm vâ rak vế têa râ má 2 hiăng châ Khu xiâm ngăn ‘na chiâk deăng ƀă mơnhông thôn pơlê chêh kĭ tơdroăng mơ’no liăn, tâi tâng ai vâ chê 1 rơpâu rơtal liăn, bê têa tôh ăm dâng 2 rơpâu ha loăng pêt. Mot tung hơnăm 2023, kuăn pơlê Dak Gằn ai tơ’nôm hên ivá ki nếo vâ mơnhông pêi chiâk deăng, pêi lo kế tơmeăm vâ rế hiá rế phâi tơtô, hơniâp ro.